Rules Change from october: എൽപിജി സിലിണ്ടറുകൾ മുതൽ പെൻഷൻ വരെ… ഈ മാസം മാറ്റം വരുന്ന അഞ്ച് കാര്യങ്ങൾ ഇതെല്ലാം

ന്യൂഡൽഹി: 2025 ഒക്ടോബർ 1 മുതൽ രാജ്യത്ത് നിരവധി പ്രധാനപ്പെട്ട നിയമങ്ങളിലും സാമ്പത്തിക കാര്യങ്ങളിലും മാറ്റങ്ങൾ വരുന്നു. എൽപിജി സിലിണ്ടർ വില, ആർബിഐയുടെ റിപ്പോ നിരക്ക്, യുപിഐ നിയമങ്ങൾ, റെയിൽവേ ടിക്കറ്റിങ്, ദേശീയ പെൻഷൻ സിസ്റ്റം (എൻപിഎസ്) തുടങ്ങിയ സുപ്രധാന മേഖലകളിലെ ഈ പരിഷ്കാരങ്ങൾ സാധാരണക്കാരുടെ ദൈനംദിന ജീവിതത്തെയും ബഡ്ജറ്റിനെയും നേരിട്ട് ബാധിക്കും. ഒക്ടോബർ ഒന്ന് മുതൽ നിലവിൽ വരുന്ന പ്രധാന മാറ്റങ്ങൾ എന്തൊക്കെയാണെന്ന് വിശദമായി നോക്കാം:

റിപ്പോ നിരക്ക്

ഒക്ടോബറിലാണ് ആർബിഐയുടെ പണ നയ സമിതി (Monetary Policy Committee – MPC) യോഗം ചേരുന്നത്. ഈ യോഗത്തിൽ റിപ്പോ നിരക്ക് 0.25% കുറയ്ക്കാൻ സാധ്യതയുണ്ടെന്നാണ് സാമ്പത്തിക വിദഗ്ധർ അഭിപ്രായപ്പെടുന്നത്. റിപ്പോ നിരക്ക് കുറഞ്ഞാൽ ബാങ്കുകൾ വായ്പകളുടെ പലിശ നിരക്കുകൾ കുറയ്ക്കാൻ സാധ്യതയുണ്ട്. ഇത് ഭവന വായ്പ, വ്യക്തിഗത വായ്പ എന്നിവ എടുത്തവർക്ക് ആശ്വാസമാകും, അവരുടെ ഇഎംഐ (EMI) തുക കുറയും.

യുപിഐ സേവനം

യുപിഐ (UPI) പ്ലാറ്റ്‌ഫോമിൽ ഒക്ടോബർ മുതൽ പിയർ-ടു-പിയർ (Peer-to-Peer – P2P) സേവനം നിർത്തലാക്കും. അതായത്, ഇനി സുഹൃത്തുക്കളിൽ നിന്നോ ബന്ധുക്കളിൽ നിന്നോ യുപിഐ വഴി പണം കടം വാങ്ങാൻ കഴിയില്ല. കൂടാതെ, യുപിഐയുടെ ‘കളക്ട് അഥവാ പൾ ട്രാൻസാക്ഷൻ’ (Collect or Pull transaction) സൗകര്യവും നിർത്തലാക്കും. ഡിജിറ്റൽ ഇടപാടുകൾ കൂടുതൽ സുരക്ഷിതമാക്കാനും തട്ടിപ്പുകൾ തടയാനും വേണ്ടിയാണ് ഈ മാറ്റങ്ങൾ.

എൽപിജി സിലിണ്ടർ വില

ഒക്ടോബർ 1 മുതൽ എൽപിജി സിലിണ്ടർ വിലയിലും മാറ്റം പ്രതീക്ഷിക്കുന്നു. ഏറെക്കാലമായി വില മാറ്റമില്ലാതെ തുടരുന്ന 14 കിലോ ഗാർഹിക സിലിണ്ടറുകൾക്ക് ഈ മാറ്റം ബാധകമാകും. എടിഎഫ് (ATF), സിഎൻജി (CNG), പിഎൻജി (PNG) വാതക വിലകളും പുതുക്കി നിശ്ചയിക്കാൻ സാധ്യതയുണ്ട്. ഈ മാറ്റം അടുക്കള ബഡ്ജറ്റിനെ നേരിട്ട് ബാധിക്കും.

Also Read: Thrissur Attack On Police: പ്രതിയെ പിടിക്കുന്നതിനിടെ ആക്രമണം; രണ്ട് പോലീസുകാർക്ക് കുത്തേറ്റു, 5 പേർക്ക് പരിക്ക്

റെയിൽവേ ടിക്കറ്റ് ബുക്കിങ്

ഓൺലൈൻ ടിക്കറ്റ് ബുക്കിംഗിലെ തട്ടിപ്പുകൾ തടയാനും സുരക്ഷ വർദ്ധിപ്പിക്കാനുമായി റെയിൽവേ പുതിയ നിയമം കൊണ്ടുവരുന്നു. ഒക്ടോബർ മുതൽ, ടിക്കറ്റ് ബുക്കിംഗ് ആരംഭിച്ച് ആദ്യത്തെ 15 മിനിറ്റിനുള്ളിൽ ഐആർസിടിസി (IRCTC) വെബ്സൈറ്റിലോ ആപ്പിലോ ആധാർ വെരിഫിക്കേഷൻ പൂർത്തിയാക്കിയവർക്ക് മാത്രമേ ടിക്കറ്റ് ബുക്ക് ചെയ്യാൻ കഴിയൂ. കമ്പ്യൂട്ടറൈസ്ഡ് കൗണ്ടറുകൾ വഴി ടിക്കറ്റ് എടുക്കുന്നവർക്ക് നിലവിലെ രീതിയിൽ മാറ്റമില്ല.

എൻപിഎസ് പരിഷ്കാരങ്ങൾ

ദേശീയ പെൻഷൻ സിസ്റ്റത്തിൽ (NPS) ഒക്ടോബർ 1 മുതൽ മൾട്ടിപ്പിൾ സ്കീം ഫ്രെയിംവർക്ക് (MSF) നടപ്പാക്കും. ഇതോടെ സർക്കാർ ജീവനക്കാരല്ലാത്തവർക്കും കോർപ്പറേറ്റ് പ്രൊഫഷണലുകൾക്കും മറ്റ് ജീവനക്കാർക്കും ഒരൊറ്റ പാൻ നമ്പർ ഉപയോഗിച്ച് ഒന്നിലധികം പദ്ധതികളിൽ നിക്ഷേപിക്കാൻ സാധിക്കും. ഇത് നിക്ഷേപകർക്ക് കൂടുതൽ സൗകര്യവും പോർട്ട്ഫോളിയോ വൈവിധ്യവൽക്കരണവും നൽകും.

ഓൺലൈൻ ഗെയിമിങ്

ഓൺലൈൻ ഗെയിമിംഗ് കമ്പനികൾക്ക് സർക്കാർ കർശന മേൽനോട്ടം ഏർപ്പെടുത്താൻ തീരുമാനിച്ചു. പുതിയ നിയമങ്ങൾ പ്രാബല്യത്തിൽ വരുമ്പോൾ, കളിക്കാരെ തട്ടിപ്പുകളിൽ നിന്ന് സംരക്ഷിക്കാൻ കമ്പനികൾ കർശനമായ നിയന്ത്രണങ്ങൾ പാലിക്കേണ്ടിവരും. ഇത് ഗെയിമിംഗ് വ്യവസായത്തിൽ സുതാര്യതയും സുരക്ഷയും ഉറപ്പാക്കും.