KSHB Recruitment 2025: എൻജിനീയറിങ് കഴിഞ്ഞവരാണോ? നല്ല ശമ്പളത്തോടെ സര്‍ക്കാര്‍ ജോലി നേടാം; അറിയേണ്ടതെല്ലാം

പ്രതീകാത്മക ചിത്രം

നല്ല ശമ്പളത്തോടെ സർക്കാർ ജോലി ലക്ഷ്യമിടുന്ന ഉദ്യോഗാർത്ഥികൾക്ക് ഇതാ ഒരു സുവർണാവസരം. കേരള സംസ്ഥാന ഭവന നിർമാണ ബോർഡ് എക്സിക്യൂട്ടീവ് എൻജിനീയർ നിയമനത്തിനായി അപേക്ഷ ക്ഷണിച്ചു. കരാർ അടിസ്ഥാനത്തിലാണ് നിയമനം. മാർച്ച് 28 ആണ് അപേക്ഷ സമർപ്പിക്കാനുള്ള അവസാന തീയതി.

എക്സിക്യൂട്ടീവ് എൻജിനീയർ തസ്തികയിലേക്ക് അപേക്ഷിക്കുന്നവർക്ക് പ്രായം 58 വയസ് കവിയരുത്. അംഗീകൃത സ്ഥാപനം/ സർവകലാശാലയിൽ നിന്നും സിവിൽ എൻജിനീയറിങ്ങിൽ ബിടെക് അല്ലെങ്കിൽ ബിഇ ബിരുദം നേടിയവർക്ക് അപേക്ഷ നൽകാം. കേരള സർക്കാർ വകുപ്പുകൾ / കെ.പി.ഡബ്ല്യു.ഡി / കേന്ദ്ര സംസ്ഥാന പൊതുമേഖലാ സ്ഥാപനങ്ങൾ എന്നിവയിൽ ഏതിലെങ്കിലും 15 വർഷത്തെ പ്രവൃത്തി പരിചയം ഉണ്ടായിരിക്കണം. അല്ലെങ്കിൽ എക്സിക്യൂട്ടീവ് എൻജിനീയർ (സിവിൽ) തസ്തികയിലോ അതിലുമുയർന്ന തസ്തികയിലോ മൂന്ന് വർഷത്തെ പ്രവർത്തി പരിചയം നിർബന്ധം.

കൂടാതെ കെട്ടിടനിർമാണ മേഖലയിൽ മുൻകാല പ്രവൃത്തി പരിചയം, പ്രോജക്ട് മാനേജ്‌മെന്റ്‌, കൺസ്ട്രക്ഷൻ മെത്തഡോളജീസ് & സേഫ്റ്റി സ്റ്റാൻഡേർഡ്സ് കോൺട്രാക്ട് അഡ്മിനിസ്ട്രേഷൻ, എൻജിനീയറിങ് സോഫ്റ്റ്‌വെയറുകൾ, തുടങ്ങിയ മേഖലകളിലുള്ള അറിവ് അഭികാമ്യം.

ALSO READ: ഒരു ലക്ഷം വരെ ശമ്പളത്തോടെ ബാങ്കിൽ ജോലി നേടാം; എക്സിം ബാങ്കിൽ ഒഴിവ്, അറിയേണ്ടതെല്ലാം

ഓൺലൈനായല്ല അപേക്ഷ സമർപ്പിക്കേണ്ടത്. വിശദമായ ബയോഡാറ്റ ഉൾക്കൊള്ളിച്ച് ‘സെക്രട്ടറി, കേരള സംസ്ഥാന ഭവന നിർമാണ ബോർഡ് ഹെഡ് ഓഫീസ്, ശാന്തി നഗർ, തിരുവനന്തപുരം, 695001’ എന്ന മേൽവിലാസത്തിലേക്കാണ് അപേക്ഷ അയക്കേണ്ടത്. ഇപ്പറഞ്ഞ മേൽവിലാസത്തിൽ മാർച്ച് 28 ന് വൈകിട്ട് 5 മണിക്ക് മുമ്പ് അപേക്ഷ ലഭ്യമാക്കണം. അല്ലെങ്കിൽ ഉദ്യോഗാർത്ഥികൾക്ക് secretarykshb@gmail.com എന്ന ഇമെയിൽ മുഖാന്തരവും അപേക്ഷ സമർപ്പിക്കാവുന്നതാണ്. വിശദവിവരങ്ങൾക്ക് കേരള സംസ്ഥാന ഭവന നിർമാണ ബോർഡിന്റെ ഔദ്യോഗിക വെബ്‌സൈറ്റായ www.kshb.kerala.gov.in സന്ദർശിക്കുക.