MG University: റെക്കോർഡ് വേഗത്തിൽ ബിരുദ പരീക്ഷാഫലം പ്രസിദ്ധീകരിച്ച് എംജി സർവ്വകലാശാല
MG University Exam Results : അവസാന സെമസ്റ്റർ ബിരുദ പരീക്ഷ കഴിഞ്ഞ് പത്താം ദിവസമാണ് ഫലം പ്രസിദ്ധീകരിച്ചത്. കാലിക്കറ്റ് സർവ്വകലാശാലയുടെ പാത പിന്തുടർന്നാണ് എം.ജി സർവകലാശാലയും ഫലപ്രഖ്യാപനത്തിൽ വേഗത കൂട്ടിയത്.
കോട്ടയം: കലിക്കറ്റ് സർവ്വകലാശാല Jറെക്കോഡ് വേഗത്തിൽ ഫലം പ്രഖ്യാപിച്ചതിനു പിന്നാലെ അതേ പാത പിന്തുടർന്ന് മഹാത്മാഗാന്ധി സർവകലാശാലയും. ഇത്തവണ റെക്കോർഡ് വേഗത്തിലാണ് ബിരുദ പരീക്ഷാഫലം സർവ്വകലാശാല പ്രസിദ്ധീകരിച്ചത്. ഫലം പ്രഖ്യാപിച്ചതിനു പിന്നാലെ ഉന്നതവിദ്യാഭ്യാസ മേഖലയുടെ കുതിപ്പാണ് ഇതിലൂടെ വ്യക്തമാകുന്നതെന്ന് ഉന്നതവിദ്യാഭ്യാസ-സാമൂഹ്യനീതി വകുപ്പ് മന്ത്രി ഡോ. ആർ. ബിന്ദു പ്രതികരിച്ചു.
അവസാന സെമസ്റ്റർ ബിരുദ പരീക്ഷ കഴിഞ്ഞ് പത്താം ദിവസമാണ് ഫലം പ്രസിദ്ധീകരിച്ചത്. കാലിക്കറ്റ് സർവ്വകലാശാലയുടെ പാത പിന്തുടർന്നാണ് എം.ജി സർവകലാശാലയും ഫലപ്രഖ്യാപനത്തിൽ വേഗത കൂട്ടിയത്. ഈ വർഷം ഏപ്രിൽ, മെയ് മാസങ്ങളിൽ നടന്ന ആറാം സെമസ്റ്റർ റെഗുലർ ബി.എ, ബി.എസ്.സി, ബി.കോം, ബി.ബി.എ, ബി.സി.എ, ബി.എസ്.ഡബ്ല്യു, ബി.ടി.ടി.എം, ബി.എസ്.എം, ബി.എഫ്.എം തുടങ്ങിയ പരീക്ഷകളുടെ ഫലമാണ് കഴിഞ്ഞ ദിവസം പ്രസിദ്ധീകരിച്ചത്.
ALSO READ – സാങ്കേതിക വിദ്യാഭ്യാസം ഇനി മലയാളം ഉൾപ്പെടെയുള്ള പ്രാദേശിക ഭാഷകളിലും
ഒൻപത് കേന്ദ്രങ്ങളിലായാണ് മൂല്യനിർണയ ക്യാമ്പു നടന്നത്. ഇവിടെ രണ്ടു ലക്ഷത്തോളം ഉത്തരക്കടലാസുകൾ പരിശോധിച്ചു. പരിശോധന മെയ് 14ന് പൂർത്തീകരിച്ചതായി അധികൃതർ അറിയിച്ചിരുന്നു. മൂല്യനിർണയത്തിനു ശേഷം ടാബുലേഷനും അനുബന്ധ ജോലികളും സമയബന്ധിതമായി തീർത്തിരുന്നു. ഇങ്ങനെ കൃത്യമായി നടന്ന പ്രവർത്തനങ്ങളുടെ ഫലമായാണ് ഫലം വേഗത്തിൽ തയ്യാറാക്കിയത്. ഇതിനായി സർവ്വകലാശാലയിലെ പരീക്ഷയുമായി ബന്ധപ്പെട്ട സെക്ഷനുകൾ അവധി ദിവസങ്ങളിലുൾപ്പെടെ പ്രവർത്തിച്ചു എന്ന് അധികൃതർ അറിയിച്ചു. ഈ നേട്ടം അഭിമാനകരമാണെന്ന് മന്ത്രി പറഞ്ഞു.
മൂല്യ നിർണയ ജോലികൾ ചിട്ടയോടെ പൂർത്തീകരിച്ച അധ്യാപകരേയും ക്യാമ്പുകൾക്ക് മേൽനോട്ടം വഹിച്ചവരേയും മന്ത്രി അഭിനന്ദിച്ചു. കൂടാതെ പരീക്ഷാവിഭാഗത്തിലെ ജീവനക്കാരേയും ഏകോപനച്ചുമതല നിർവ്വഹിച്ച വൈസ് ചാൻസലർ തൊട്ട് സിൻഡിക്കേറ്റ് അംഗങ്ങൾ വരെയുള്ള സർവ്വകലാശാലാ നേതൃത്വത്തിനേയും അഭിനന്ദിക്കാൻ മന്ത്രി മറന്നില്ല.
