NCERT: 9 മുതൽ 12 ക്ലാസ് വരെയുള്ള പാഠപുസ്തകങ്ങളുടെ വില കുറയും; 20 ശതമാനം വില കുറക്കാൻ NCERT

എൻസിഇആർടി (image credits:X)

ന്യൂഡൽഹി: ഒൻപത് മുതൽ 12-ാം ക്ലാസ് വരെയുള്ള പാഠപുസ്തകങ്ങളുടെ വില കുറയ്ക്കാൻ നാഷണൽ കൗൺസിൽ ഓഫ് എജ്യുക്കേഷണൽ റിസർച്ച് ആൻഡ് ട്രെയിനിങ് (എൻസിഇആർടി). വിലയിൽ 20 ശതമാനം കുറവ് വരുത്തുമെന്ന് എൻസിഇആർടി തിങ്കളാഴ്ച പ്രഖ്യാപിച്ചു.  അടുത്ത അധ്യയന വർഷം മുതൽ പ്രാബല്യത്തിൽ വരും. എൻസിഇആർടി ഡയറക്ടർ ദിനേശ് പ്രസാദ് സക്ലാനിയാണ് ഇക്കാര്യം അറിയിച്ചത്.

ഇതാദ്യമായാണ് പാഠപുസ്തകങ്ങളുടെ വില ഗണ്യമായി കുറയ്ക്കുന്നതെന്ന് എൻസിഇആർടി ഡയറക്ടർ ദിനേശ് പ്രസാദ് സക്ലാനി പറഞ്ഞു. “ഈ വർഷം പേപ്പർ സംഭരണത്തിൽ എൻസിഇആർടി വളരെയധികം കാര്യക്ഷമത കൊണ്ടുവന്നു, കൂടാതെ ഏറ്റവും പുതിയ പ്രിൻ്റിംഗ് മെഷീനുകളുള്ള പ്രിൻ്ററുകളും ഉൾപ്പെടുത്തിയിട്ടുണ്ട്. ഈ ആനുകൂല്യം രാജ്യത്തെ വിദ്യാർത്ഥികൾക്ക് കൂടി വ്യാപിപ്പിക്കാൻ എൻസിഇആർടി തീരുമാനിച്ചു, സക്ലാനി പറഞ്ഞു. “അടുത്ത അധ്യയന വർഷത്തേക്ക്, 9-12 ക്ലാസുകളിലെ എല്ലാ പാഠപുസ്തകങ്ങളും നിലവിലുള്ള വിലയേക്കാൾ 20 ശതമാനം വിലക്കുറവിൽ എൻസിഇആർടി വിൽക്കും. ഇത് എൻസിഇആർടിയുടെ ചരിത്രത്തിൽ അഭൂതപൂർവമായ കാര്യമാണ്,” അദ്ദേഹം പറഞ്ഞു.

Also Read-Christmas Exam Question Paper Leak: ചോദ്യ പേപ്പർ ചോർച്ചക്ക് പിന്നിലാര്? അന്വേഷണം ക്രൈംബ്രാഞ്ചിന്

ഡൽഹിയിലെ എൻസിഇആർടി ആസ്ഥാനത്ത് ഓഡിറ്റോറിയം നിർമിക്കുന്നതിനുള്ള ഭൂമി പൂജയ്ക്കിടെ സംസാരിക്കുകയായിരുന്നു സക്ലാനി. ചടങ്ങിൽ കേന്ദ്ര വിദ്യാഭ്യാസ മന്ത്രി ധർമേന്ദ്ര പ്രധാൻ അധ്യക്ഷ വഹിച്ചു.എൻസിഇആർടി ഭാരതത്തിൻ്റെ അഭിമാനമാണെന്നും രാജ്യത്തിൻ്റെ വിദ്യാഭ്യാസ സമ്പ്രദായത്തിൻ്റെ ആണിക്കല്ലാണെന്നും അദ്ദേഹം പറഞ്ഞു, ഇത് ഒരു സ്ഥാപനം മാത്രമല്ല, രാജ്യത്തിൻ്റെ ഒരു കൂട്ടായ അക്കാദമിക് ശേഖരമാണെന്നും അദ്ദേഹം പറഞ്ഞു. ചടങ്ങിനിടെ എൻസിഇആർടിയും ഫ്ലിപ്കാർട്ടും തമ്മിൽ പാഠപുസ്തകങ്ങളുടെ വ്യാപ്തി വർധിപ്പിക്കാൻ ധാരണാപത്രം ഒപ്പുവച്ചു. ഇതോടെ പാഠപുസ്തകങ്ങളുടെ ലഭ്യത വർദ്ധിപ്പിക്കുമെന്നും രാജ്യത്തുടനീളമുള്ള വിദ്യാർത്ഥികളുടെ വീട്ടുവാതിൽക്കൽ പുസ്തകം എത്തിചേരുമെന്നും മന്ത്രി പറഞ്ഞു. അതേസമയം, 1-8 ക്ലാസുകളിലെ പാഠപുസ്തകങ്ങൾ കോപ്പി ഒന്നിന് 65 രൂപ നിരക്കിൽ ചില്ലറ വിൽപ്പന തുടരും.

ഓരോ വർഷവും 300 ശീർഷകങ്ങളിലായി ഏകദേശം നാല് മുതൽ അഞ്ച് കോടി പാഠപുസ്തകങ്ങൾ എൻസിഇആർടി അച്ചടിക്കുന്നത്. ആമസോൺ പോലുള്ള ഇ-കൊമേഴ്‌സ് പ്ലാറ്റ്‌ഫോമുകളുമായുള്ള പങ്കാളിത്തത്തിലൂടെ എൻസിഇആർടി അടുത്തിടെ അതിൻ്റെ വ്യാപനം വിപുലീകരിച്ചു, ഇത് രാജ്യത്തുടനീളമുള്ള യഥാർത്ഥ പാഠപുസ്തകങ്ങൾ ലഭിക്കുന്നത് സു​ഗമമാക്കുന്നു.