Dhyan Sreenivasan: ‘നിന്നെപ്പോലെ ഇൻ്റർവ്യൂ കാരണമല്ല എല്ലാവരും സിനിമയിലെത്തുന്നത്’; ധ്യാൻ ശ്രീനിവാസനെ ട്രോളി നീരജ് മാധവ്
Neeraj Madhav Trolls Dhyan Sreenivasan: ലവ് അണ്ടർ കൺസ്ട്രക്ഷൻ എന്ന സിനിമയുടെ പ്രമോഷൻ ഇൻ്റർവ്യൂവിനിടെ ധ്യാൻ ശ്രീനിവാസനെ ട്രോളി നീരജ് മാധവ്. ധ്യാനെപ്പോലെ ഇൻ്റർവ്യൂ കാരണമല്ല തങ്ങൾ സിനിമയിലെത്തുന്നത് എന്നായിരുന്നു നീരജ് മാധവിൻ്റെ ട്രോൾ.
ധ്യാൻ ശ്രീനിവാസനെ ട്രോളി നീരജ് മാധവ്. ധ്യാനെപ്പോലെ ഇൻ്റർവ്യൂ കാരണമല്ല, അഭിനയം അറിയാവുന്നത് കൊണ്ടാണ് തങ്ങളൊക്കെ സിനിമയിലെത്തുന്നതെന്ന് നീരജ് മാധവ് പറഞ്ഞു. താൻ നായകനായി പുറത്തിറങ്ങുന്ന ലവ് അണ്ടർ കൺസ്ട്രക്ഷൻ എന്ന ജിയോഹോട്ട്സ്റ്റാർ ഒറിജിനൽ മായാളം വെബ് സീരീസുമായി ബന്ധപ്പെട്ട അഭിമുഖത്തിലാണ് നീരജ് മാധവ് ധ്യാനെ പരിഹസിച്ചത്.
‘പ്രമോഷന് വരാൻ ഏറ്റവും മടിയുള്ളത് ആർക്ക്’ എന്ന ധ്യാൻ ശ്രീനിവാസൻ്റെ ചോദ്യമാണ് തുടക്കം. ഇതിന് നീരജ് മാധവ്, ‘ഇൻ്റർവ്യൂ കൊടുക്കാൻ തനിക്ക് ഇഷ്ടമല്ല’ എന്ന് മറുപടി പറയുന്നു. ‘അതെന്താടാ’ എന്ന് ധ്യാൻ ചോദിക്കുമ്പോൾ ‘എനിക്ക് നിന്നെപ്പോലെ ഇങ്ങനെ പറയാനുള്ള കഴിവില്ല’ എന്ന് നീരജ് തിരിച്ചുപറയുന്നു. ‘നീ ഒരു പെർഫോർമർ അല്ലേ?’ എന്നാണ് ധ്യാൻ്റെ പിന്നീടുള്ള ചോദ്യം. ‘സ്റ്റേജിൽ പെർഫോം ചെയ്യുന്നുണ്ടല്ലോ. ഇൻ്റർവ്യൂവിനെയും ഒരു പെർഫോമൻസായിട്ട് കണ്ടാൽ പോരേ?’ എന്ന ചോദ്യത്തോട്, ‘ഇങ്ങനെയുള്ള ഇൻ്റർവ്യൂ ആണെങ്കിൽ കുഴപ്പമില്ല, അല്ലാതെയുള്ള ഇൻ്റർവ്യൂവിൽ രസകരമായി പെരുമാറാൻ അറിയില്ല. അതുകൊണ്ട് താൻ ഇൻ്റർവ്യൂ കൊടുക്കാറില്ല’ എന്ന് നീരജ് പറയുന്നു. ‘ഇൻ്റർവ്യൂ കൊടുക്കാറില്ല, അതുകൊണ്ടിപ്പോ സിനിമയുമില്ല’ എന്നാണ് ധ്യാൻ ഇതിനോട് പ്രതികരിക്കുന്നത്.
ധ്യാൻ്റെ ഈ പ്രസ്താവനയെയാണ് നീരജ് ട്രോളിയത്. ‘നിന്നെപ്പോലെ എല്ലാവരും ഇൻ്റർവ്യൂ കാരണമല്ല സിനിമ പിടിയ്ക്കുന്നത്, അഭിനയിക്കാനുള്ള കഴിവ് കൊണ്ടും സിനിമ കിട്ടും’ എന്ന് എന്ന് പറയുമ്പോൾ മറ്റുള്ളവർ ചിരിക്കുകയാണെങ്കിലും ധ്യാൻ ശ്രീനിവാസൻ മറുപടിയില്ലാതെ നിൽക്കുകയാണ്. ‘പ്രമോഷന് വേണ്ടിയല്ലാതെ വെറുതെ ഇൻ്റർവ്യൂ കൊടുക്കാറില്ല’ എന്ന് രംഗം മയപ്പെടുത്താൻ നീരജ് പറയുന്നുണ്ട്.
വിഷ്ണു ജി രാഘവ് സംവിധാനം ചെയ്യുന്ന ജിയോഹോട്ട്സ്റ്റാർ ഒറിജിനൽ വെബ് സീരീസാണ് ലവ് അണ്ടർ കൺസ്ട്രക്ഷൻ. രജപുത്ര വിഷ്വൽ മീഡിയയുടെ ബാനറിൽ തുടരും സിനിമയുടെ നിർമ്മാതാവായ എം രഞ്ജിത്താണ് ഈ വെബ് സീരീസിൻ്റെയും നിർമ്മാണം. ഫെബ്രുവരി 28 മുതൽ സീരീസ് ജിയോഹോട്ട്സ്റ്റാറിൽ സ്ട്രീം ചെയ്ത് തുടങ്ങും. ജിയോയും ഹോട്ട്സ്റ്റാറും ലയിച്ചതിന് ശേഷം ജിയോഹോട്ട്സ്റ്റാറിലെത്തുന്ന ആദ്യ മലയാളം വെബ് സീരീസാണ് ലവ് അണ്ടർ കൺസ്ട്രക്ഷൻ. നീരജ് മാധവും ഗൗരി ജി കൃഷ്ണനും പ്രധാന വേഷങ്ങളിലെത്തുന്ന സീരീസിൽ അജു വർഗീസ്, ആനന്ദ് മന്മഥൻ തുടങ്ങിയവരും അഭിനയിച്ചിട്ടുണ്ട്. അജയ് ഡേവിഡ് കാച്ചപ്പള്ളി ക്യാമറയും ഗോലി സുന്ദർ സംഗീതസംവിധാനവും നിർവഹിച്ചിരിക്കുന്നു.
