Fejo’s Viral Track: ദലീമയും ഫെജോയും ചേർന്നപ്പോൾ സംഭവിച്ച വൈറൽ ട്രാക്ക്… തരംഗമായി പുതിയ മലയാളം റാപ്പ്
Fejo’s Viral Hip-Hop Track Vazhikatti: ഫെജോ തന്നെയാണ് വരികൾ എഴുതിയതും ഈണം നൽകിയതും. ജെഫിൻ ജസ്റ്റിന്റെ ബീറ്റും ആഷ്ബിൻ പോൾസന്റെ മിക്സിംഗും ഗാനത്തെ അന്താരാഷ്ട്ര നിലവാരത്തിലെത്തിക്കുന്നു.
Fejo, Daleema Song
കൊച്ചി: മലയാളം ഹിപ്-ഹോപ്പ് രംഗത്തെ മുൻനിര താരം ഫെജോയുടെ പുതിയ ഗാനം വഴികാട്ടി സംഗീത പ്രേമികൾക്കിടയിൽ തരംഗമാകുന്നു. പഴയകാല മലയാളം ഗാനത്തിന്റെ സാമ്പിളുകൾ ഉപയോഗിച്ച് നിർമ്മിച്ച ഈ ഗാനം വിന്റേജ് ടച്ചും ആധുനിക റാപ്പ് ശൈലിയും ഒത്തുചേരുന്ന വേറിട്ടൊരു അനുഭവമാണ് സമ്മാനിക്കുന്നത്. റിലീസ് ചെയ്ത് ചുരുങ്ങിയ ദിവസങ്ങൾക്കുള്ളിൽ തന്നെ 20 ലക്ഷത്തിലധികം കാഴ്ചക്കാരുമായി യൂട്യൂബ് ട്രെൻഡിംഗിൽ മുന്നേറുകയാണ് ഈ ഗാനം.
തികച്ചും വ്യത്യസ്തമായ ഒരു അനിമേഷൻ വീഡിയോയിലൂടെയാണ് ‘വഴികാട്ടി’ ദൃശ്യാവിഷ്കരിച്ചിരിക്കുന്നത്. തന്റെ സ്വപ്നങ്ങൾക്ക് പിന്നാലെ പായുന്ന ഒരു സാധാരണക്കാരന്റെ ജീവിതവും അപ്രതീക്ഷിതമായുണ്ടാകുന്ന ട്വിസ്റ്റുകളുമാണ് ഇതിവൃത്തം. തമാശയും പ്രതീക്ഷയും കോർത്തിണക്കിയാണ് റാംബ്രൂ ഈ വീഡിയോ സംവിധാനം ചെയ്തിരിക്കുന്നത്.
അണിയറപ്രവർത്തകർ
ഫെജോ തന്നെയാണ് വരികൾ എഴുതിയതും ഈണം നൽകിയതും. ജെഫിൻ ജസ്റ്റിന്റെ ബീറ്റും ആഷ്ബിൻ പോൾസന്റെ മിക്സിംഗും ഗാനത്തെ അന്താരാഷ്ട്ര നിലവാരത്തിലെത്തിക്കുന്നു. ദലീമ പാടിയ പഴയകാല ഗാനത്തിന്റെ വരികൾ ഉൾപ്പെടുത്തിയാണ് ഫെജോ ഈ മ്യൂസിക് എക്സ്പിരിമെന്റ് നടത്തിയിരിക്കുന്നത്. മലയാളം ഇൻഡിപെൻഡന്റ് മ്യൂസിക് (Indie Music) രംഗത്തിന് പുതിയ ദിശാബോധം നൽകുന്നതാണ് ഈ ഗാനം. ആരെങ്കിലും ഒരാൾ എപ്പോഴും ശരിയായ വഴി കാട്ടിത്തരാനുണ്ടാകും എന്ന ശുഭാപ്തിവിശ്വാസമാണ് ഗാനം മുന്നോട്ടുവെക്കുന്നത്. അർജുൻ ശശി, ഡബിൾ ജെ ദി റാപ്പർ എന്നിവരുടെ സാന്നിധ്യവും അണിയറയിലുണ്ട്.
