Shine Tom Chacko: ഷൈന് നാളെ പത്തുമണിക്ക് നേരിട്ട് ഹാജരാവണം; വീട്ടിലെത്തി നോട്ടീസ് നല്കി പോലീസ്
Kochi Police Issue Notice to Shine Tom Chacko: കൊച്ചിയിലെ സ്വകാര്യ ഹോട്ടലിൽ ലഹരി റെയ്ഡിനിടെ ഓടിയതിനെ കുറിച്ച് ബോധിപ്പിക്കാൻ വേണ്ടിയാണ് നടനോട് നേരിട്ട് ഹാജരാകാൻ ആവശ്യപ്പെട്ടത്. നാളെ രാവിലെ പത്തുമണിക്ക് എറണാകുളം നോര്ത്ത് എസ്ഐക്ക് മുമ്പില് ഹാജരാവാനാണ് നിര്ദേശം.
കൊച്ചി: നടൻ ഷൈൻ ടോം ചാക്കോ നാളെ നേരിട്ട് ഹാജരാകണമെന്ന് ആവശ്യപ്പെട്ട് നോട്ടീസ് നൽകി പോലീസ്. കൊച്ചിയിലെ സ്വകാര്യ ഹോട്ടലിൽ ലഹരി റെയ്ഡിനിടെ ഓടിയതിനെ കുറിച്ച് ബോധിപ്പിക്കാൻ വേണ്ടിയാണ് നടനോട് നേരിട്ട് ഹാജരാകാൻ ആവശ്യപ്പെട്ടത്. നാളെ രാവിലെ പത്തുമണിക്ക് എറണാകുളം നോര്ത്ത് എസ്ഐക്ക് മുമ്പില് ഹാജരാവാനാണ് നിര്ദേശം.
തൃശ്ശൂരിലെ നടന്റെ മുണ്ടൂരിലെ വീട്ടിൽ നേരിട്ടെത്തി പോലീസ് നോട്ടീസ് കൈമാറി. ഓടിരക്ഷപ്പെട്ടതിന്റെ കാരണം നോർത്ത് പോലീസ് സ്റ്റേഷനിലെത്തി നേരിട്ട് ബോധിപ്പിക്കണമെന്നാണ് നോട്ടീസിൽ പറയുന്നത്. റെയ്ഡ് നടന്ന ഹോട്ടലിൽ നിന്ന് മറ്റൊരു ഹോട്ടലിലെത്തി മുറിയെടുത്ത ഷൈന് അവിടെ നിന്ന് തൃശൂര് വഴി രക്ഷപ്പെട്ടെന്നാണ് പോലീസിന്റെ പ്രാഥമിക നിഗമനം.
അതേസമയം തൃശൂർ വഴി നടൻ തമിഴ്നാട്ടിലേക്ക് രക്ഷപ്പെട്ടെന്നാണ് സൂചന നിലവിൽ ഇയാൾ പൊള്ളാച്ചിയിലെ റിസോർട്ടിലാണെന്നാണ് വിവരം. ഇതിനിടെ ഷൈനിന്റെ മുറിയിലെത്തിയ രണ്ട് യുവതികളോട് പോലീസ് വിവരങ്ങൾ അന്വേഷിച്ചു. ഇതിൽ ഒരു യുവതിയുമായി ഷൈൻ സാമ്പത്തിക ഇടപാട് നടത്തിയെന്നാണ് കണ്ടെത്തൽ. ഇവർക്ക് ലഹരി ഇടപാടുമായി ബന്ധമില്ലെന്നാണ് പോലീസ് പറയുന്നത്.
കഴിഞ്ഞ ദിവസം രാത്രിയാണ് കൊച്ചിയിലെ സ്വകാര്യ ഹോട്ടലില്നിന്ന് ഷൈൻ ഇറങ്ങിയോടിയത്. ഡാന്സാഫ് സംഘം എത്തിയപ്പോള് ഷൈന് ഇറങ്ങി ഓടിയതിന്റെ സിസിടിവി ദൃശ്യങ്ങൾ പുറത്ത് വന്നിരുന്നു.
അതേസമയം ഷൈനിനെതിരെ കടുത്ത നിലപാടിലേക്കാണ് താരസംഘടനയായ അമ്മ നീങ്ങുന്നത്. വിൻ സിയുടെ പരാതിയിൽ തിങ്കളാഴ്ചക്കുള്ളിൽ നടൻ വിശദീകരണം നൽകണമെന്നാണ് ആവശ്യം. അല്ലാത്തപക്ഷം ഷൈനിനെ സംഘടനയിൽ നിന്നും പുറത്താക്കണമെന്ന് ആവശ്യപ്പെട്ട് അച്ചടക്ക സമിതി ജനറൽ ബോഡിയോട് ശുപാർശ ചെയ്യും.
