Viral news: ഇവിടെ നൂറു വയസ്സുകാരി പട്ടിണി സമരത്തിലാണ്…. സ്വപ്നം സ്വന്തം നാട്ടിലേക്കൊരു വഴി

Dumak-village in Uttarakhand -Photo News9

ചമോലി : നൂറു വയസ്സിലും ഊർജസ്വലരായി നടക്കുന്ന ഹിമാലയത്തിലെ മലയോര മേഖലയിൽ ഉള്ളവർക്ക് പുത്തരിയല്ല. എന്നാൽ നൂറാം വയസ്സിൽ നിരാഹാര സമരം നടത്താൻ ചില്ലറ ധൈര്യം പോരാ. ഉത്തരാഖണ്ഡിൽ, പ്രത്യേകിച്ച് ഉയർന്ന കുന്നുകളുള്ള പ്രദേശങ്ങളിൽ റോഡ് കണക്റ്റിവിറ്റി ഒരു ഗുരുതരമായ പ്രശ്നമാണ്.

പതിറ്റാണ്ടുകളായി നല്ല റോഡുകളില്ലാത്തതും, റോഡുകൾക്കായുള്ള ഗ്രാമവാസികളുടെ ദീർഘകാല ആവശ്യങ്ങളും അധികൃതർ ശ്രദ്ധിക്കാറുപോലുമില്ല. ചമോലി ജില്ലയിലെ ദുമാക് ഗ്രാമത്തിൽ നടന്ന സമരങ്ങളും ഇത്തരത്തിൽ ശ്രദ്ധിക്കാതെ പോവുകയായിരുന്നു. എന്നാൽ ദുമാക്കിൽ താമസിക്കുന്ന 100 വയസുകാരിയായ ബച്ചി ദേവി ഈ ആവശ്യം നിറവേറ്റുന്നതിനായി മരണം വരെ നിരാഹാരം ആരംഭിച്ചതോടെ കഥ മാറി.

40 ദിവസമായി ഗ്രാമവാസികൾ നിരാഹാരത്തിലാണ്

കഴിഞ്ഞ 40 ദിവസമായി ഗ്രാമവാസികൾ റിലേ ഉപവാസത്തിലാണ്. 100 വയസ്സുള്ള ബാച്ചി ദേവിയും ഇതിൽ പങ്കെടുക്കുന്നു. പ്രായമായിട്ടും, ബാച്ചി ദേവി തൻ്റെ ആവശ്യങ്ങളിൽ ഉറച്ചുനിൽക്കുന്നു. ആവശ്യം നടക്കുന്നതുവരെ നിരാഹാരം അവസാനിപ്പിക്കില്ലെന്ന് അവർ പ്രസ്താവിച്ചിട്ടുണ്ട്.

ഉത്തരാഖണ്ഡിലെ ചമോലി ജില്ലയിലെ ജ്യോതിർമഠിലുള്ള ഒരു ഗ്രാമമാണ് ദുമാക്. ജ്യോതിർമഠിൽ നിന്ന് 52 ​​കിലോമീറ്ററും ഗോപേശ്വരിലെ ജില്ലാ ആസ്ഥാനത്ത് നിന്ന് 119 കിലോമീറ്ററും അകലെയാണ് ഈ ​ഗ്രാമം. ദുമാക് ഒരു ഗ്രാമപഞ്ചായത്ത് കൂടിയാണ് ഇത്. 68 വീടുകളുള്ള ഏകദേശം 311 ആളുകളും ഇവിടെ താമസിക്കുന്നുണ്ട്.

ആവശ്യം ലഭിക്കാത്തിടത്തോളം ഉപവാസ സമരം തുടരും

കഴിഞ്ഞ കുറച്ച് വർഷങ്ങളായി ഗ്രാമവാസികൾ നേരിടുന്ന പ്രശ്‌നങ്ങൾ കണ്ടറിഞ്ഞ്, സാംജി മുതൽ മൈക്കോട്ട് ദുമാക് കൽഗോത്ത് വരെ റോഡ് നിർമ്മിക്കണമെന്നും ദീർഘകാലമായി കെട്ടിക്കിടക്കുന്ന നിർമ്മാണ പ്രവർത്തനങ്ങൾ എത്രയും വേഗം പുനരാരംഭിക്കണമെന്നും ബച്ചി ദേവി ആവശ്യപ്പെടുന്നു. അടുത്തിടെ ഈ ഗ്രാമവാസികൾ മെഴുകുതിരി മാർച്ച് സംഘടിപ്പിച്ച് പ്രതിഷേധം ശക്തമാക്കിയിരുന്നു.

തൻ്റെ ആവശ്യങ്ങൾ അംഗീകരിക്കുന്നത് വരെ നിരാഹാരം അവസാനിപ്പിക്കില്ലെന്ന് ബച്ചി ദേവി വ്യക്തമാക്കി. ഈ വിദൂര ഗ്രാമങ്ങളുടെ അടിസ്ഥാന ആവശ്യങ്ങൾ സർക്കാർ എപ്പോൾ പരിഹരിക്കും, ഗ്രാമീണരുടെ ആവശ്യങ്ങൾ എപ്പോൾ ഗൗരവമായി എടുക്കും എന്ന ചോദ്യമാണ് ബച്ചി ദേവിക്ക് ഉന്നയിക്കാനുള്ളത്.