Iran Israel Conflicts: ഇസ്രയേൽ പ്രധാനമന്ത്രിയെ വിളിച്ച് മോദി; ആശങ്ക അറിയിച്ചു, യുഎഇ പ്രസിഡന്റുമായും സംസാരിച്ചു

Pm Modi And Netanyahu

ന്യൂഡൽഹി: പശ്ചിമേഷ്യയിലെ സംഘർഷം അതീവ ഗുരുതരമായി തുടരുന്ന സാഹചര്യത്തിൽ ഇസ്രയേൽ പ്രധാനമന്ത്രി ബെഞ്ചമിൻ നെതന്യാഹുവുമായി ഫോണിൽ സംസാരിച്ച് പ്രധാനമന്ത്രി നരേന്ദ്ര മോദി. യുഎഇ പ്രസിഡന്റ് ഷെയ്ഖ് മുഹമ്മദ് ബിൻ സയിദ് അൽ നഹ്യാനുമായും അദ്ദേഹം സംസാരിച്ചു. നിലവിലെ സംഘർഷത്തിൽ ഇന്ത്യക്കുള്ള കടുത്ത ആശങ്ക അദ്ദേഹം ഇരുനേതാക്കളെയും അറിയിച്ചു.

രാജ്യങ്ങൾ തമ്മിലുള്ള സംഘർഷം എത്രയും വേഗം അവസാനിപ്പിക്കണമെന്നും നയതന്ത്ര ചർച്ചകളിലൂടെ സമാധാനം പുനഃസ്ഥാപിക്കണമെന്നും നെതന്യാഹുവിനോട് സംസാരിക്കവെ പ്രധാനമന്ത്രി മോദി ആവശ്യപ്പെട്ടു. സാധാരണക്കാരുടെ സുരക്ഷയ്ക്ക് പരിഗണന നൽകണമെന്നും അദ്ദേഹം വ്യക്തമാക്കി. ഇറാൻ്റെയും ഇസ്രയേലിൻ്റെയും നീക്കങ്ങൾ ലോകസമാധാനത്തിന് ഭീഷണിയാണെന്നാണ് ഇന്ത്യയുടെ നിലപാട്.

ALSO READ: ജനങ്ങള്‍ക്ക് സമാധാനപരമായ ജീവിതം ഉറപ്പാക്കുകയാണ് ലക്ഷ്യം; യുവാക്കളുടെ സ്വപ്‌നം സാക്ഷാത്കരിക്കും

യുഎഇയുടെ പരമാധികാരം സംരക്ഷിക്കാനുള്ള എല്ലാ നീക്കങ്ങൾക്കും ഇന്ത്യയുടെ പൂർണ്ണ പിന്തുണ ഉണ്ടാകുമെന്നും യുഎഇ പ്രസിഡന്റിനെ മോദി അറിയിച്ചു. അതേസമയം, ഇറാൻ്റെ പരമോന്നത നേതാവ് ആയത്തുള്ള അലി ഖമേനിയുടെ മരണവുമായി ബന്ധപ്പെട്ട് ഇന്ത്യ ഇതുവരെ ഔദ്യോ​ഗികമായി പ്രതികരിച്ചിട്ടില്ല.

വിദേശകാര്യ മന്ത്രി എസ് ജയശങ്കറും ശനിയാഴ്ച ഇസ്രായേൽ, ഇറാൻ വിദേശകാര്യ മന്ത്രിമാരുമായി ചർച്ചകൾ നടത്തിയിരുന്നു. അതിനിടെ ഡൽഹിയിൽ ചേർന്ന കേന്ദ്ര മന്ത്രിസഭാ സമിതി യോഗം പശ്ചിമേഷ്യയിലെ സ്ഥിതിഗതികൾ വിലയിരുത്തി. സുരക്ഷാ ഭീഷണിയുണ്ടായാൽ പ്രവാസികളെ ഒഴിപ്പിക്കാനുള്ള എല്ലാ നടപടികളും യോഗം ചർച്ച ചെയ്തതായാണ് വിവരം.