EPF Contributions: പിഎഫ് വിഹിതം അക്കൗണ്ടിൽ കാണിക്കുന്നില്ലേ? കാരണമിത്…
PF contribution: സാങ്കേതിക തടസ്സങ്ങൾ മാറുന്നത് വരെ യുഎഎൻ അംഗ ഇ-സേവ പോർട്ടൽ വഴിയോ, UMANG ആപ്പിലൂടെയോ പാസ്ബുക്ക് വിവരങ്ങൾ പരിശോധിക്കാവുന്നതാണ്. അവ എങ്ങനെയെന്ന് നോക്കിയാലോ....
സെപ്റ്റംബർ, ഒക്ടോബർ 2025 മാസങ്ങളിലെ എംപ്ലോയീസ് പ്രൊവിഡന്റ് ഫണ്ട് വിഹിതം പാസ്ബുക്കിൽ കാണുന്നില്ലെന്ന പരാതി ഉയർന്നിരുന്നു. എന്നാലതിന് വിമശദീകരണവുമായി എംപ്ലോയീസ് പ്രൊവിഡന്റ് ഫണ്ട് ഓർഗനൈസേഷൻ (EPFO) രംഗത്തെത്തിയിട്ടുണ്ട്. സാങ്കേതിക പ്രശ്നം മൂലമുള്ള കാലതാമസം ആണെന്ന് അധികൃതർ വ്യക്തമാക്കി.
സിസ്റ്റം നവീകരണവുമായി ബന്ധപ്പെട്ടുള്ള കാലതാമസാമാണ് എന്നാണ് വിശദീകരണം. ഇപിഎഫ്ഒ അവരുടെ ഇലക്ട്രോണിക് ചലാൻ-കം-റിട്ടേൺ (ECR) ലെഡ്ജർ സംവിധാനം മെച്ചപ്പെടുത്തുന്നതിന്റെ ഭാഗമായി നടത്തുന്ന നവീകരണം കാരണമാണ് ഈ താൽക്കാലിക കാലതാമസം.
പുതിയ ലെഡ്ജർ പുറത്തിറക്കുന്നതോടെ സെപ്റ്റംബർ-ഒക്ടോബർ മാസങ്ങളിലെ എൻട്രികൾ പാസ്ബുക്കിൽ കാണാനായി സാധിക്കുമെന്നും അധികൃതർ പറഞ്ഞു. അതുവരെ യുഎഎൻ അംഗ ഇ-സേവാ പോർട്ടൽ, ഉമങ് ആപ്പ് എന്നിവയിലൂടെ വിവരങ്ങൾ പരിശോധിക്കാവുന്നതാണ്.
യുഎഎൻ പോർട്ടൽ സന്ദർശിച്ച ശേഷം, നിങ്ങളുടെ യുഎഎൻ, പാസ്വേർഡ് എന്നിവ നൽകി ഒടിപി ഉപയോഗിച്ച് വെരിഫിക്കേഷൻ പൂർത്തിയാക്കുക. ലോഗിൻ ചെയ്ത ശേഷം, ഡാഷ്ബോർഡിൽ നിന്ന് 'പാസ്ബുക്ക് ലൈറ്റ്' തിരഞ്ഞെടുത്ത് വിവരങ്ങൾ കാണുകയോ ഡൗൺലോഡ് ചെയ്യുകയോ ചെയ്യാം
അതുപോലെ ഉമങ് ആപ്പിൽ ലോഗിൻ ചെയ്യാം. 'ഇപിഎഫ്ഒ സേവനങ്ങൾ' തിരയുക, അതിനുശേഷം 'വ്യൂ പാസ്ബുക്ക്' ക്ലിക്ക് ചെയ്യുക. ശേഷം യുഎഎൻ നൽകി ഒടിപി വഴി വെരിഫൈ ചെയ്ത ശേഷം, ഇ-പാസ്ബുക്ക് ഡൗൺലോഡ് ചെയ്യാൻ മെമ്പർ ഐഡി തിരഞ്ഞെടുക്കേണ്ടതാണ്. ( Image Credit: Getty Images, Social Media)
