Benefits of curry leaves: കറികളിൽ നിന്ന് കറിവേപ്പില എടുത്തു മാറ്റാറുണ്ടോ? ദിവസവും കഴിച്ചാൽ ഗുണങ്ങൾ നിരവധി
Health Benefits of Curry Leaves: നമ്മുടെ അടുക്കളകളിൽ വിഭവങ്ങൾക്ക് നല്ല മണവും രുചിയും നൽകാൻ ഉപയോഗിക്കുന്ന കറിവേപ്പില ഭക്ഷണശേഷം പലരും എടുത്തു മാറ്റാറാണ് പതിവ്. എന്നാൽ ഈ ചെറിയ ഇലകൾ ശരീരത്തിന് ഒരു ഔഷധത്തിന് തുല്യമാണെന്ന് അറിയാമോ? അവ നൽകുന്ന ഗുണങ്ങൾ അറിഞ്ഞാലോ
നമ്മുടെ അടുക്കളകളിൽ വിഭവങ്ങൾക്ക് നല്ല മണവും രുചിയും നൽകാൻ ഉപയോഗിക്കുന്ന കറിവേപ്പില ഭക്ഷണശേഷം പലരും എടുത്തു മാറ്റാറാണ് പതിവ്. എന്നാൽ ഈ ചെറിയ ഇലകൾ ശരീരത്തിന് ഒരു ഔഷധത്തിന് തുല്യമാണെന്ന് അറിയാമോ? വിറ്റാമിൻ എ, ബി, സി, ഇ എന്നിവയ്ക്ക് പുറമെ കാൽസ്യം, ഇരുമ്പ്, ആന്റിഓക്സിഡന്റുകൾ എന്നിവയാൽ സമ്പന്നമാണ് കറിവേപ്പില. (Image Credit source: Getty Images)
ദിവസവും കറിവേപ്പില ഭക്ഷണത്തിൽ ഉൾപ്പെടുത്തുകയോ പച്ചയ്ക്ക് ചവച്ചരച്ച് കഴിക്കുകയോ ചെയ്യുന്നത് വഴി ശരീരത്തിന് ധാരാളം ഗുണങ്ങൾ ലഭിക്കുന്നു. രക്തത്തിലെ പഞ്ചസാരയുടെ അളവ് ക്രമപ്പെടുത്താൻ കറിവേപ്പില വളരെ ഫലപ്രദമാണ്. ഇതിലെ ഫൈബറും ആന്റിഓക്സിഡന്റുകളും ഇൻസുലിൻ ഉൽപ്പാദനത്തെ വർദ്ധിപ്പിക്കുകയും ഗ്ലൂക്കോസ് ആഗിരണം നിയന്ത്രിക്കുകയും ചെയ്യുന്നു.
അതുപോലെ, കറിവേപ്പിലയിൽ അടങ്ങിയിരിക്കുന്ന ദഹന എൻസൈമുകൾ ആമാശയത്തിന്റെ പ്രവർത്തനം വേഗത്തിലാക്കാൻ സഹായിക്കുന്നു. അതിനാൽ, ഗ്യാസ്ട്രബിൾ, അസിഡിറ്റി, വയറെരിയൽ, മലബന്ധം തുടങ്ങിയ പ്രശ്നങ്ങളിൽ നിന്ന് മോചനം നേടാൻ ദിവസവും കറിവേപ്പില കഴിക്കുന്നത് സഹായിക്കും.
ശരീരത്തിലെ ഹാനികരമായ ചീത്ത കൊളസ്ട്രോളിന്റെ അളവ് കുറയ്ക്കാനും നല്ല കൊളസ്ട്രോൾ വർദ്ധിപ്പിക്കാനും കറിവേപ്പില സഹായിക്കും. ഇത് രക്തധമനികളിൽ കൊഴുപ്പ് അടിയുന്നത് തടഞ്ഞ് ഹൃദയാഘാത സാധ്യത കുറയ്ക്കുന്നു. കൂടാതെ, മുടികൊഴിച്ചിൽ തടയാനും അകാലനര അകറ്റാനും കറിവേപ്പിലയിലെ പോഷകങ്ങൾ സഹായിക്കുന്നു.
കറിവേപ്പിലയിലെ കാർബസോൾ ആൽക്കലോയിഡുകൾ കരളിലെ വിഷാംശങ്ങളെ പുറന്തള്ളാൻ സഹായിക്കും. കരളിന്റെ കോശങ്ങളെ സംരക്ഷിക്കാനും വീക്കം കുറയ്ക്കാനും ഇത് ഉത്തമമാണ്. വിറ്റാമിൻ എ ധാരളമായി അടങ്ങിയിട്ടുള്ളതിനാൽ കണ്ണിന്റെ കാഴ്ചശക്തി മെച്ചപ്പെടുത്താനും ഗുണകരമാണ്.
