Painkillers Side Effects: കൊലയാളിയാകുന്ന പെയിൻ കില്ലറുകൾ: വേദനസംഹാരികൾ വൃക്കകളെ എങ്ങനെ ബാധിക്കും?
Painkillers And Kidney Diseases: നമ്മൾ സാധാരണയായി ഉപയോഗിക്കുന്ന ഐബുപ്രോഫെൻ, ഡൈക്ലോഫെനാക് തുടങ്ങിയ വേദനസംഹാരികളുടെ അമിതമായ ഉപയോഗം കാലക്രമേണ വൃക്കകളിലേക്കുള്ള രക്തയോട്ടം കുറയ്ക്കാൻ കാരണമാകുന്നു. അതുപോലെ ദീർഘകാലം ഇവ ഉപയോഗിക്കുന്നത് വൃക്കകളുടെ ശുദ്ധീകരണ പ്രക്രിയയെ തടസപ്പെടുത്തുകയും ഗുരുതരമായ വൃക്കരോഗങ്ങളിലേക്ക് കൊണ്ടെത്തിക്കുകയും ചെയ്യും.
തലവേദന, ശരീരവേദന, ആർത്തവ വേദന, സന്ധികളിലെ പിരിമുറുക്കം തുടങ്ങി എന്ത് തന്നെയായലും വേദനകളെ മറികടക്കാൻ നമ്മൾ ആശ്രയിക്കുന്നത് വേദനസംഹാരികളെയാണ്. വേദനസംഹാരികളിൽ പലതും ഡോക്ടറുടെ കുറിപ്പടി ഇല്ലാതെ ലഭ്യമാണെന്നതാണ് നമുക്ക് സൗകര്യമാകുന്നത്. എന്നാൽ ഇവയുടെ അനിയന്ത്രിതമായ ഉപയോഗം വൃക്കകളെ നിശബ്ദമായി തകരാറിലാക്കുമെന്നതാണ് വാസ്തവം. (Image Credits: Getty Images)
നമ്മൾ സാധാരണയായി ഉപയോഗിക്കുന്ന ഐബുപ്രോഫെൻ, ഡൈക്ലോഫെനാക് തുടങ്ങിയ വേദനസംഹാരികളുടെ അമിതമായ ഉപയോഗം കാലക്രമേണ വൃക്കകളിലേക്കുള്ള രക്തയോട്ടം കുറയ്ക്കാൻ കാരണമാകുന്നു. അതുപോലെ ദീർഘകാലം ഇവ ഉപയോഗിക്കുന്നത് വൃക്കകളുടെ ശുദ്ധീകരണ പ്രക്രിയയെ തടസപ്പെടുത്തുകയും ഗുരുതരമായ വൃക്കരോഗങ്ങളിലേക്ക് കൊണ്ടെത്തിക്കുകയും ചെയ്യും.
അതേസമയം കൃത്യമായ അളവിലും ഡോക്ടറുടെ നിർദ്ദേശപ്രകാരവും കഴിക്കുകയാണെങ്കിൽ ഒരുപരിധിവരെ വേദനസംഹാരികൾ സുരക്ഷിതമാണ്. പ്രമേഹം, ഉയർന്ന രക്തസമ്മർദ്ദം എന്നിവയുള്ളവർക്ക് വേദനസംഹാരികൾ കൂടുതൽ ദോഷകരമാണ്. ശരീരത്തിൽ ജലാംശം വളരെ കുറവാണെങ്കിൽ മരുന്നിലെ രാസഘടകങ്ങൾ വൃക്കകളെ നേരിട്ട് ബാധിക്കുകയും അത് വലിയ രോഗത്തിന് കാരണമാകുകയും ചെയ്യുന്നു.
അതുപോലെ തന്നെ മരുന്ന് കഴിക്കുമ്പോൾ കഴിവതും ധാരാളം വെള്ളം കുടിക്കാൻ ശ്രദ്ധിക്കണം. പ്രത്യേകിച്ച് പനിയുള്ളപ്പോൾ. ഡോക്ടർ നിർദ്ദേശിച്ച കാലാവധിക്ക് ശേഷം മരുന്ന് കഴിക്കുകയും ചെയ്യരുത്. ഇത് വൃക്കകളുടെ പ്രവർത്തനത്തെ ബാധിക്കുകയും ഗുരുതരമായ കേസുകളിൽ വൃക്ക തകരാറിലാകുന്നതിനും കാരണമായേക്കാം.
വൃക്കകളുടെ തകരാറിലാകുമ്പോൾ പലപ്പോഴും പ്രാരംഭ ഘട്ടത്തിൽ ശ്രദ്ധേയമായ ലക്ഷണങ്ങൾ കാണിക്കണമെന്നില്ല. അതുകൊണ്ട് തന്നെ ഏറ്റവും ഗുരുതരമായ സാഹചര്യത്തിലാകും അവ തിരിച്ചറിയുക. പ്രമേഹം, രക്തസമ്മർദ്ദം എന്നിവയുള്ളവർ വേദനസംഹാരികൾ ഉപയോഗിക്കുമ്പോൾ ശ്രദ്ധിക്കുക. ഡോക്ടറുടെ നിർദ്ദേശപ്രകാരം മാത്രം ഇത്തരം കാര്യങ്ങൾ ചെയ്യുന്നതാണ് നല്ലത്.
