Athlete’s Foot: മഴക്കാലത്ത് കാലിലെ വളംകടി മാറ്റാൻ എന്ത് ചെയ്യണം?
How to Treat Tinea Pedis in Monsoon Season: മഴക്കാലത്ത് പലരിലും കണ്ടുവരുന്ന പ്രശ്നമാണ് വളംകടി. അന്തരീക്ഷത്തിലെ ഈർപ്പവും റോഡിലെ മലിനജലവുമെല്ലാം ഇതിന് കാരണമാകാറുണ്ട്. എന്നാൽ, മഴക്കാലത്ത് കാലുകളുടെ ഭംഗിയും ആരോഗ്യം സംരക്ഷിക്കാനും ഫംഗസ് ബാധ തടയാനും സഹായിക്കുന്ന ചില വഴികൾ നോക്കിയാലോ....
മഴക്കാലം ആരംഭിക്കുന്നതോടെ ഭൂരിഭാഗം ആളുകളെയും അലട്ടുന്ന ഒരു പ്രധാന പ്രശ്നമാണ് കാൽവിരലുകൾക്കിടയിലെ ചൊറിച്ചിലും തൊലി അടർന്നുപോകലും. തുടർച്ചയായി കാലുകളിൽ വെള്ളം തട്ടുന്നതും ഈർപ്പം തങ്ങിനിൽക്കുന്നതുമാണ് ഫംഗസ് വളരാൻ അനുകൂലമായ സാഹചര്യം ഒരുക്കുന്നത്. (Image Credit source: Getty Images)
മഴവെള്ളത്തിൽ നനഞ്ഞ് കഴിഞ്ഞാൽ കാലുകൾ കൂടുതൽ സമയം ഈർപ്പത്തോടെ വെക്കരുത്. ഓഫീസിലോ വീട്ടിലോ എത്തിയാൽ ഉടൻ തന്നെ കാലുകൾ നല്ലതുപോലെ തുടച്ച് ഉണക്കണം. പ്രത്യേകിച്ച് കാൽവിരലുകൾക്കിടയിലെ ഭാഗം ഒട്ടും വെള്ളമില്ലാത്ത രീതിയിൽ കോട്ടൺ തുണി ഉപയോഗിച്ച് തുടച്ചെടുക്കാൻ പ്രത്യേകം ശ്രദ്ധിക്കുക.
പുറത്തുപോയി വീട്ടിൽ തിരിച്ചെത്തിയാൽ ഉടൻ തന്നെ കാലുകൾ വൃത്തിയായി കഴുകണം. വെറും വെള്ളത്തിൽ കഴുകുന്നതിന് പകരം നല്ലൊരു ആന്റിസെപ്റ്റിക് സോപ്പോ ലിക്വിഡോ ഉപയോഗിച്ച് കഴുകുന്നത് റോഡിലെ അഴുക്കുവെള്ളത്തിൽ നിന്നും പടരുന്ന ബാക്ടീരിയകളെ നശിപ്പിക്കാൻ സഹായിക്കും.
മഴക്കാലത്ത് വെള്ളം കെട്ടിക്കിടക്കുന്ന തരം അടഞ്ഞ ഷൂസുകളോ ലെതർ ചെരിപ്പുകളോ പൂർണ്ണമായും ഒഴിവാക്കുക. ഇവയ്ക്കുള്ളിൽ വെള്ളം കയറിയാൽ വേഗത്തിൽ ഉണങ്ങില്ലെന്ന് മാത്രമല്ല ഫംഗസ് ബാധ ഇരട്ടിയാക്കുകയും ചെയ്യും.
പാദങ്ങൾ കഴുകി തുടച്ച ശേഷം രാത്രി കിടക്കാൻ നേരം നല്ലൊരു മോയ്സ്ചുറൈസർ അല്ലെങ്കിൽ ഫൂട്ട് ക്രീം പുരട്ടുന്നത് വിണ്ടുകീറൽ ഒഴിവാക്കാൻ സഹായിക്കും. പകലിൽ പുറത്തേക്ക് ഇറങ്ങുന്നതിന് മുൻപ് വിരലുകൾക്കിടയിൽ ഒരല്പം ആന്റിഫംഗൽ പൗഡർ തൂവുന്നതും നല്ലതാണ്.
