IPL 2025: “കളി ജയിക്കണം, വേറെ വഴിയില്ല”; പോയിൻ്റ് നില മെച്ചപ്പെടുത്തേണ്ടതുണ്ടെന്ന് രാഹുൽ ദ്രാവിഡ്
IPL 2025 - Rahul Dravid: ഐപിഎലിൽ എത്രയും വേഗം മത്സരങ്ങൾ വിജയിക്കേണ്ടതുണ്ടെന്ന് രാജസ്ഥാൻ റോയൽസ് പരിശീലകൻ രാഹുൽ ദ്രാവിഡ്. അതല്ലാതെ മറ്റ് വഴികളില്ല. എങ്കിലേ പോയിൻ്റ് ടേബിളിൽ സ്ഥാനം മെച്ചപ്പെടുത്താനാവൂ എന്നും അദ്ദേഹം പറഞ്ഞു.
ബെംഗളൂരുവിനെതിരായ കളി ജയിക്കാതെ വേറെ വഴിയില്ലെന്ന് രാജസ്ഥാൻ റോയൽസ് പരിശീലകൻ രാഹുൽ ദ്രാവിഡ്. ബെംഗളൂരുവിനെതിരെ മാത്രമല്ല, ഇനിയുള്ള എല്ലാ മത്സരങ്ങളിലും വിജയിക്കേണ്ടതുണ്ട്. പോയിൻ്റ് നില മെച്ചപ്പെടുത്തിയെങ്കിലേ പോയിൻ്റ് ടേബിളിൽ സ്ഥാനം മെച്ചപ്പെടുത്താൻ കഴിയൂ എന്നും അദ്ദേഹം പറഞ്ഞു. (Image Courtesy - Social Media)
"വേഗം തന്നെ കളികൾ വിജയിക്കണം. മറ്റ് വഴികളില്ല. ഈ കളി വളരെ നിർണായകമാണ്. ഇത് മാത്രമല്ല, ഇനിയുള്ള എല്ലാ മത്സരങ്ങളും നിർണായകമാണ്. ഇപ്പോഴുള്ള അവസ്ഥ പരിഗണിക്കുമ്പോൾ ഇനി പിഴവുകളൊന്നും വരുത്താൻ ഞങ്ങൾക്കാവില്ല. ടൂർണമെൻ്റ് പാതിയായിരിക്കുന്നു."- ദ്രാവിഡ് പറഞ്ഞു.
"മത്സരങ്ങൾ വിജയിച്ച് എത്രയും വേഗം പോയിൻ്റ് ടേബിളിലെ സ്ഥാനം മെച്ചപ്പെടുത്തേണ്ടതുണ്ട്. മത്സരങ്ങൾ വേഗത്തിൽ ജയിച്ചുതുടങ്ങുകയല്ലാതെ മറ്റ് മാർഗങ്ങളില്ല. ഇനി ഒരു തരത്തിലുള്ള പിഴവുകൾക്കും അവസരമില്ല. നന്നായി കളിക്കണം. ചില ക്ലോസ് ഗെയിമുകൾ നമ്മൾ തോറ്റു. പക്ഷേ, നന്നായിത്തന്നെയാണ് ടീം കളിച്ചത്."- അദ്ദേഹം തുടർന്നു.
"ചില പന്തുകളിൽ സ്കോർ ചെയ്യാനായിരുന്നെങ്കിൽ ഒരുപക്ഷേ, ഞങ്ങളിപ്പോൾ കുറച്ചുകൂടി മെച്ചപ്പെട്ട നിലയിലായേനെ. പക്ഷേ, ഇത്തരം നിർണായക അവസരങ്ങളിൽ നന്നായി കളിക്കണം. അതിന് ഞങ്ങൾക്കിതുവരെ കഴിഞ്ഞില്ല. സഞ്ജു എന്ന് തിരികെയെത്തുമെന്നറിയില്ല. എത്രയും വേഗം അതിന് കഴിയുമെന്ന് കരുതുന്നു."- ദ്രാവിഡ് വ്യക്തമാക്കി.
ഇന്ന് ആർസിബിയുടെ തട്ടകമായ ചിന്നസ്വാമി സ്റ്റേഡിയത്തിൽ വച്ചാണ് മത്സരം. എട്ട് മത്സരങ്ങൾ കളിച്ച രാജസ്ഥാൻ റോയൽസ് വെറും രണ്ട് മത്സരങ്ങളിലാണ് വിജയിച്ചത്. കേവലം നാല് പോയിൻ്റുമായി പട്ടികയിൽ എട്ടാം സ്ഥാനത്താണ് രാജസ്ഥാൻ റോയൽസ്. ബെംഗളൂരു 8 മത്സരങ്ങളിൽ അഞ്ച് ജയവുമായി നാലാമതാണ്.
