Shubman Gill: ‘ഗിൽ ഏകദിന ക്യാപ്റ്റൻസി ആവശ്യപ്പെട്ടില്ല; ബിസിസിഐ നിർബന്ധിച്ച് നൽകിയതാണ്’: വെളിപ്പെടുത്തൽ
Mohammad Kaif About Shubman Gill: ശുഭ്മൻ ഗിൽ ഏകദിന ക്യാപ്റ്റൻസി ആവശ്യപ്പെട്ടിട്ടില്ലെന്ന് മുഹമ്മദ് കൈഫ്. ഇത് തിരിച്ചടിക്കാൻ സാധ്യതയുണ്ടെന്നും അദ്ദേഹം പറഞ്ഞു.
ശുഭ്മൻ ഗിൽ ഏകദിന ക്യാപ്റ്റൻസി ആവശ്യപ്പെട്ടിട്ടില്ലെന്ന അവകാശവാദവുമായി മുൻ താരം മുഹമ്മദ് കൈഫ്. അജിത് അഗാർക്കർ ഉൾപ്പെടെയുള്ള സെലക്ടർമാർ നിർബന്ധിച്ച് ക്യാപ്റ്റൻസി നൽകിയതാണെന്നും കൈഫ് തൻ്റെ യൂട്യൂബ് ചാനലിൽ പോസ്റ്റ് ചെയ്ത വിഡിയോയിൽ പറഞ്ഞു. (Image Credits- PTI)
"ഇത് പ്രതീക്ഷിച്ചിരുന്നതാണ്. പക്ഷേ, ഞാൻ വിചാരിച്ചു ഇത് 2027 ഏകദിന ലോകകപ്പ് കഴിഞ്ഞിട്ടേ ഉണ്ടാവൂ. എന്ന്. രോഹിതിന് ക്വാളിറ്റിയുണ്ട്. ഫിറ്റ്നസ് മെച്ചപ്പെടുത്തിയിട്ടുണ്ട്. 2027 ലോകകപ്പ് കളിക്കാനുള്ള സാധ്യതയുമുണ്ട്. എങ്കിലും ചുമതല ഗില്ലിൽ നിക്ഷേപിക്കപ്പെട്ടു."
"എല്ലാം വളരെ പെട്ടെന്നാണ് ഗില്ലിന് ലഭിക്കുന്നത്. ഇത് മോശം അവസ്ഥയിലേക്ക് നയിച്ചേക്കാം. കുറഞ്ഞ സമയത്തിൽ ഒരുപാട് കാര്യങ്ങൾ ലഭിക്കുമ്പോൾ തിരിച്ചടിച്ചേക്കാം. അവന് കൂടുതൽ ഭാരം നൽകരുത്. ടെസ്റ്റ് ക്യാപ്റ്റനാണ്. ഇപ്പോൾ ഏകദിന ക്യാപ്റ്റനാക്കിയിരിക്കുന്നു."
"ഒരു കളിക്കാരൻ ഒരിക്കലും ക്യാപ്റ്റൻസി ആവശ്യപ്പെടില്ല. എല്ലാവർക്കുമറിയാം, അവനത് ആവശ്യപ്പെട്ടിട്ടില്ല. എല്ലാവർക്കും അവനെ ഇഷ്ടമാണ്. അതുകൊണ്ട് ക്യാപ്റ്റൻസിക്കായി പരിഗണിച്ചു. അജിത് അഗാർക്കർ ഉൾപ്പെടെയുള്ള സെലക്ടർമാർ അവനെ നിർബന്ധിച്ച് ഏല്പിച്ചതാണ്."- കൈഫ് പറഞ്ഞു.
ഓസ്ട്രേലിയക്കെതിരായ ഏകദിന പരമ്പര മുതലാണ് ശുഭ്മൻ ഗിൽ ഇന്ത്യയെ നയിക്കുക. രോഹിത് ശർമ്മ ടീമിൽ ഉൾപ്പെട്ടിട്ടുണ്ട്. മലയാളി താരം സഞ്ജു സാംസണ് ഇടം ലഭിച്ചില്ല. ധ്രുവ് ജുറേൽ ആണ് ബാക്കപ്പ് കീപ്പർ. ഒക്ടോബർ 19 മുതലാണ് ഇന്ത്യയുടെ ഓസ്ട്രേലിയൻ പര്യടനം ആരംഭിക്കുക.
