Silver Rate: വെള്ളി വിപണിയിൽ വൻ ഇടിവ്; പ്രതീക്ഷയ്ക്ക് വകയുണ്ടോ, അതോ നാല് ലക്ഷമോ?
Silver Price Forecast: ആഗോളതലത്തിൽ അമേരിക്കൻ ഡോളർ കരുത്താർജ്ജിച്ചതും നിക്ഷേപകർ കൂട്ടത്തോടെ ലാഭം എടുത്തതുമാണ് വിലയിടിവിന് പ്രധാന കാരണം. വ്യവസായ ആവശ്യങ്ങൾക്കായി വെള്ളി ധാരാളമായി ഉപയോഗിക്കുന്നുണ്ട്.
മലയാളികളുടെ പ്രിയപ്പെട്ട രണ്ട് ലോഹങ്ങളാണ് സ്വർണവും വെള്ളിയും. കഴിഞ്ഞ ദിവസങ്ങളിലാണ് സ്വർണവും വെള്ളിയും റെക്കോർഡുകൾ തകർത്താണ് മുന്നേറുന്നത്. സ്വർണം ഒന്നേക്കാൽ ലക്ഷം കടന്നപ്പോൾ വെള്ളി നാല് ലക്ഷവും പിന്നിട്ടു. എന്നാൽ ഇപ്പോൾ വില വീണ്ടും താഴ്ന്നിരിക്കുകയാണ്.
ആഗോള വിപണിയിലെ മാറ്റങ്ങൾക്കനുസരിച്ച് വെള്ളി വിലയിൽ വലിയ ഇടിവ് രേഖപ്പെടുത്തിയിരിക്കുകയാണ്. ഏകദേശം 17 ശതമാനത്തോളം വില കുറഞ്ഞത് നിക്ഷേപകരെ ആശങ്കയിലാക്കിയിട്ടുണ്ട്. ഒരു ദിവസം 92000 രൂപയുടെ ഇടിവാണ് വെള്ളി വില രേഖപ്പെടുത്തിയത്.
4 ലക്ഷം രൂപ മറികടന്ന വെള്ളി വില 3 ലക്ഷം രൂപയ്ക്ക് താഴെ പോയി. എം സി എക്സിൽ വെള്ളിയുടെ മാർച്ച് ഫ്യുച്ചേഴ്സ് 25 ശതമാനത്തിന്റെ നഷ്ടത്തിൽ അഥവാ 91973 രൂപയുടെ നഷ്ടത്തിൽ 291925 എന്ന നിലവാരത്തിലാണ് വ്യാപാരം അവസാനിപ്പിച്ചത്. 1980-കൾക്ക് ശേഷമുള്ള ഏറ്റവും വലിയ ഒറ്റദിവസത്തെ തകർച്ചയാണ് രേഖപ്പെടുത്തിയത്.
ആഗോളതലത്തിൽ അമേരിക്കൻ ഡോളർ കരുത്താർജ്ജിച്ചതും നിക്ഷേപകർ കൂട്ടത്തോടെ ലാഭം എടുത്തതുമാണ് വിലയിടിവിന് പ്രധാന കാരണം. വ്യവസായ ആവശ്യങ്ങൾക്കായി വെള്ളി ധാരാളമായി ഉപയോഗിക്കുന്നുണ്ട്. എന്നാൽ ആഗോളതലത്തിൽ ഉൽപ്പാദന മേഖലയിലുണ്ടായ മാന്ദ്യം വെള്ളിയുടെ ആവശ്യകത കുറച്ചു.
വില ഉയർന്നുനിന്ന സമയത്ത് നിക്ഷേപിച്ചവർ വലിയ തോതിൽ വെള്ളി വിറ്റൊഴിവാക്കി ലാഭമെടുത്തതാണ് മറ്റൊരു കാരണം. വെള്ളി വിലയിൽ ഉണ്ടായ ഈ വലിയ തിരുത്തൽ പുതിയ നിക്ഷേപകർക്ക് ഒരു നല്ല അവസരമാണെന്ന് വിദഗ്ധർ പറയുന്നു. കുറഞ്ഞ വിലയിൽ വെള്ളി വാങ്ങി സൂക്ഷിക്കുന്നത് ദീർഘകാലാടിസ്ഥാനത്തിൽ ലാഭം നൽകിയേക്കാം. (Image Credit: Getty Images)
