Kitchen Tips: അടുക്കള ജോലി എളുപ്പത്തിൽ തീർക്കം, ഈ ടിപ്സ് അറിഞ്ഞാൽ മതി
Kitchen Tips: അടുക്കളയിൽ കൂടുതൽ സമയം ചിലവഴിക്കുന്നത് പലപ്പോഴും വീട്ടമ്മമാരെ സംബന്ധിച്ച് മടുപ്പുള്ള കാര്യമാണ്. എന്നാൽ ചില ചെറിയ കാര്യങ്ങൾ ശ്രദ്ധിച്ചാൽ പാചകം എളുപ്പമാക്കാനും ഭക്ഷണത്തിന്റെ രുചിയും ഗുണവും വർദ്ധിപ്പിക്കാനും സാധിക്കും. സമയവും ലാഭിക്കാം ആരോഗ്യകരമായ രീതിയിൽ പാചകം ചെയ്യുകയും ചെയ്യാം.
കറിയിൽ ഉപ്പ് കൂടിയാൽ ഇനി ടെൻഷനാവേണ്ട, ഒരു ചെറിയ കഷ്ണം പച്ച ഉരുളക്കിഴങ്ങോ കറിയിൽ ഇട്ടു വെക്കുക. ഇത് അധികം വന്ന ഉപ്പിനെ വലിച്ചെടുക്കുന്നതാണ്. അതുപോലെ ഫ്രിഡ്ജിൽ വെച്ച തേങ്ങ ചിരകാൻ പ്രയാസമാണെങ്കിൽ, ചിരകുന്നതിന് അരമണിക്കൂർ മുൻപ് തേങ്ങ പുറത്തെടുത്ത് ഇളം ചൂടുവെള്ളത്തിൽ മുക്കി വെച്ചാൽ മതി. (Image Credit Source : Getty Images)
പച്ചമുളക് പെട്ടെന്ന് ചീഞ്ഞു പോകുന്നതും പലരെയും വലയ്ക്കുന്ന പ്രശ്നമാണ്. ഇത് ഒഴിവാക്കാൻ അതിന്റെ ഞെട്ട് കളഞ്ഞ ശേഷം വായു കടക്കാത്ത പാത്രത്തിലോ കവറിലോ ആക്കി ഫ്രിഡ്ജിൽ സൂക്ഷിച്ചാൽ മതിയാകും. ഇത് കൂടുതൽ ദിവസം ഫ്രഷ് ആയി ഇരിക്കാൻ സഹായിക്കും.
അതുപോലെ ചോറ് ഒട്ടിപ്പിടിക്കാതിരിക്കാനും വഴിയുണ്ട്. ചോറ് വേവിക്കുമ്പോൾ അരി ഒട്ടിപ്പിടിക്കുന്നത് ഒഴിവാക്കാൻ തിളച്ച വെള്ളത്തിലേക്ക് ഏതാനും തുള്ളി നാരങ്ങാനീരോ അല്ലെങ്കിൽ അല്പം വെളിച്ചെണ്ണയോ ചേർത്താൽ മതി.
ഉള്ളി അരിയുമ്പോൾ കണ്ണ് നീറുന്നത് ഒഴിവാക്കാൻ ഉള്ളി പകുതിയായി മുറിച്ച ശേഷം 10 മിനിറ്റ് തണുത്ത വെള്ളത്തിൽ ഇട്ടു വെക്കുകയോ അല്ലെങ്കിൽ ഫ്രിഡ്ജിൽ വെച്ച ശേഷം അരിയുകയോ ചെയ്യുക. അതുപോലെ വെളുത്തുള്ളി തൊലി കളയുന്നത് എളുപ്പമാക്കാൻ അല്ലികൾ അല്പസമയം ചൂടുവെള്ളത്തിൽ ഇട്ടു വെച്ചാൽ മതിയാകും.
നാരങ്ങ പിഴിയുന്നതിന് മുമ്പ് തറയിലോ കട്ടിംഗ് ബോർഡിലോ വെച്ച് കൈകൊണ്ട് നന്നായി അമർത്തി ഉരുട്ടുക. ഇത് നാരങ്ങയിൽ നിന്ന് കൂടുതൽ നീര് ലഭിക്കാൻ സഹായിക്കുന്നതാണ്.
