സ്ത്രീകൾ എന്തുകൊണ്ട് ജിമ്മിൽ പോകണം? അറിയാം ഗുണങ്ങളും മാറ്റങ്ങളും!
The Real Benefits of Gym Workouts for Women: ഇന്നത്തെ കാലത്ത് ജിമ്മുകളിൽ വ്യായാമം ചെയ്യുന്ന സ്ത്രീകളുടെ എണ്ണം വർധിച്ചുവരികയാണ്. ഭാരം ഉയർത്തുന്ന വ്യായാമങ്ങളും കാർഡിയോയും സ്ത്രീകളുടെ ആരോഗ്യത്തിൽ വലിയ മാറ്റങ്ങൾ തന്നെ കൊണ്ടുവരും. ശാരീരിക ആരോഗ്യം മെച്ചപ്പെടുത്തുന്നതിനൊപ്പം മാനസിക ഉല്ലാസം നൽകാനും ജിമ്മിലെ ചിട്ടയായ വ്യായാമങ്ങൾക്ക് സാധിക്കും.
മസിൽ വെക്കുമെന്ന തെറ്റിദ്ധാരണയും എവിടെ തുടങ്ങണമെന്ന ആശയക്കുഴപ്പവും കാരണം പലരും ഇപ്പോഴും ജിമ്മിൽ പോകാൻ മടിക്കുന്നുണ്ട്. സ്ഥിരമായി ജിമ്മിൽ പോകുന്നതിലൂടെ വലിയ മാറ്റങ്ങളാണ് സ്ത്രീകളുടെ ശരീരത്തിൽ സംഭവിക്കുന്നത്. ജിമ്മിലെ യന്ത്രങ്ങളും ട്രെയിനർമാരുടെ സഹായവും വ്യായാമം എളുപ്പമാക്കും. മികച്ച ഫലം നേടാൻ സഹായിക്കുന്ന ഉപകരണങ്ങൾ ജിമ്മുകളിൽ ഉണ്ടാകും,ഉപകരണങ്ങളില്ലാതെയുള്ള വ്യായാമങ്ങളും ചെയ്യാനാകും. (Image Credit source: Unsplash)
ശരീര സൗന്ദര്യം വർധിപ്പിക്കുക എന്നതിനപ്പുറം അസ്ഥികളുടെ ബലം കൂട്ടാനും, നല്ല ഉറക്കം ലഭിക്കാനും, ഭാവിയിൽ പലവിധ അസുഖങ്ങൾ വരുന്നത് തടയാനും ജിമ്മിലെ വ്യായാമം സഹായിക്കും. ഭാരം ഉയർത്തുന്ന വ്യായാമങ്ങൾ ചെയ്യുന്നതിലൂടെ അനാവശ്യ കൊഴുപ്പ് കുറയുകയും മസിലുകൾ ബലപ്പെടുകയും ചെയ്യും. ഇത് നിങ്ങൾ വ്യായാമം ചെയ്യാത്ത സമയത്തും കൂടുതൽ കലോറി എരിച്ചുകളയാൻ സഹായിക്കും.
ഭാവിയിൽ ഓസ്റ്റിയോപൊറോസിസ് പോലുള്ള അസ്ഥിസംബന്ധമായ അസുഖങ്ങൾ വരുന്നത് തടയാനും ഇത് വളരെ അത്യാവശ്യമാണ്. കാർഡിയോ വ്യായാമങ്ങൾ ഹൃദയത്തിൻ്റെയും ശ്വാസകോശത്തിൻ്റെയും ആരോഗ്യത്തിനും നിത്യജീവിതത്തിലെ കാര്യങ്ങൾ ചെയ്യാനുള്ള ഊർജ്ജത്തിനും ഗുണം ചെയ്യും. ഭാരം ഉയർത്തിയാൽ പുരുഷന്മാരെപ്പോലെ ശരീരത്തിൽ വലിയ മസിലുകൾ ഉണ്ടാകുമെന്നത് സ്ത്രീകളുടെ ഇടയിലുള്ള വലിയൊരു തെറ്റിദ്ധാരണയാണ്.
വലിയ മസിലുകൾ ഉണ്ടാകണമെങ്കിൽ അതിനനുസരിച്ചുള്ള പ്രത്യേക ഭക്ഷണക്രമവും കഠിനമായ പരിശീലനവും ആവശ്യമാണ്. സ്ത്രീകളിൽ സ്വാഭാവികമായും പുരുഷന്മാരെക്കാൾ വളരെ കുറഞ്ഞ അളവിലാണ് ടെസ്റ്റോസ്റ്റിറോൺ എന്ന ഹോർമോൺ ഉത്പാദിപ്പിക്കപ്പെടുന്നത്. അതുകൊണ്ടുതന്നെ, സാധാരണ വ്യായാമങ്ങളിലൂടെ വലിയ മസിലുകൾ ഉണ്ടാകില്ലെന്ന് വിദഗ്ദ്ധർ വ്യക്തമാക്കുന്നു.
ശാരീരിക മാറ്റങ്ങൾ മാത്രമല്ല മാനസികാരോഗ്യവും മെച്ചപ്പെടുത്താൻ വ്യായാമം സഹായിക്കുന്നു. വ്യായാമം ചെയ്യുമ്പോൾ ശരീരത്തിൽ എൻഡോർഫിൻ എന്ന ഹോർമോൺ ഉത്പാദിപ്പിക്കപ്പെടുകയും സ്ട്രെസ് ഹോർമോണായ കോർട്ടിസോളിൻ്റെ അളവ് കുറയുകയും ചെയ്യും. ഇത് നിങ്ങളുടെ സമ്മർദ്ദം കുറയ്ക്കാനും കൂടുതൽ ഉന്മേഷം നൽകാനും സഹായിക്കുന്നു. മികച്ച ഉറക്കം ലഭിക്കാനും, ഉത്കണ്ഠയും വിഷാദവും കുറയ്ക്കാനും സ്ഥിരമായുള്ള വ്യായാമം ഉപകരിക്കും
