ബൗളർമാരെ ഇരകളായി കാണുന്നു, ജീവിതത്തിൽ വർത്തമാനകാലത്ത് ജീവിക്കുക എന്ന പാഠം പഠിച്ചു; മനസ് തുറന്ന് ഭുവി
Pacer Bhuvneshwar Kumar opens up following his return to the Indian team: ഇന്ത്യൻ ടീമിൽ നിന്ന് താൻ ഒഴിവാക്കപ്പെട്ടിരുന്ന കഴിഞ്ഞ കാലയളവിൽ താൻ ചെയ്ത കാര്യങ്ങളും, ഒരു വ്യക്തിയെന്ന നിലയിൽ തനിക്കുണ്ടായ പക്വതയും വർത്തമാനകാലത്ത് ജീവിക്കുക എന്നതാണ് തന്നെ പഠിപ്പിച്ചത് എന്ന് ഇന്ത്യൻ പേസർ ഭുവനേശ്വർ കുമാർ. നാല് വർഷത്തിന് ശേഷം ഇന്ത്യൻ ടീമിലേക്ക് തിരിച്ചെത്തിയതിന് പിന്നാലെ, ബിസിസിഐ പുറത്തുവിട്ട വീഡിയോയിലാണ് ഭുവി ഇക്കാര്യം വ്യക്തമാക്കിയിരിക്കുന്നത്.
ക്രിക്കറ്റ് ചരിത്രത്തിലെ തന്നെ അ‌പൂർവങ്ങളിൽ അ‌പൂർവമായ ഒരു തിരിച്ചുവരവായിരുന്നു ഇന്ത്യൻ പേസർ ഭുവനേശ്വർ കുമാറിന്റേത്. ഏതാണ്ട് നാല് വർഷത്തോളം ദേശീയ ടീമിൽ നിന്ന് പുറത്തായിരുന്ന അദ്ദേഹം ഒടുവിൽ അ‌ടുത്തിടെ നടന്ന ന്യൂസിലാൻഡിനെതിരായ ആദ്യ ടി20 മത്സരത്തിലൂടെ ഇന്ത്യൻ ടീമിലേക്കുള്ള തന്റെ മടങ്ങിവരവ് കുറിച്ചു. ഇന്ത്യൻ ടീമിൽ ദീർഘനാൾ ഇടം ലഭിക്കാതിരുന്നിട്ടും ക്രിക്കറ്റിനോടുള്ള താൽപര്യം ഒട്ടും കുറയാതെ തന്റെ രീതികൾ കൃത്യമായി തുടർന്ന ഭുവിയുടെ കഴിഞ്ഞ കാല ജീവിതം ചെറിയ തിരിച്ചടികളിൽ പോലും പതറുന്നവർക്കുള്ള വലിയ പാഠമാണ്. ടീമിലേക്ക് തിരിച്ചെത്തയതിന് പിന്നാലെ, ബിസിസിഐ പങ്കുവെച്ച ഒരു വീഡിയോയിൽ തന്റെ കഴിഞ്ഞ കാലത്തെക്കുറിച്ചും മറ്റും ഭുവനേശ്വർ കുമാർ മനസ് തുറന്ന് സംസാരിക്കുന്നുണ്ട്.
ഇന്ത്യൻ ജഴ്സിയിൽ കളിക്കാൻ സാധിക്കാതിരുന്നിട്ടും വലിയ പ്രതീക്ഷകളൊന്നും വെച്ചുപുലർത്താതെ വാർത്തകളിലോ ഭാവിയിലോ ശ്രദ്ധിക്കാതെ ‘വർത്തമാനകാലത്ത്’ മാത്രം ശ്രദ്ധ കേന്ദ്രീകരിച്ചതാണ് തനിക്ക് കരുത്തായതെന്ന് 36 വയസുകാരനായ ഭുവനേശ്വർ പറയുന്നു. ഭാവിയെക്കുറിച്ച് ആകുലപ്പെടുന്നതിന് പകരം, വർത്തമാനകാലത്ത് ജീവിക്കുക എന്നതായിരുന്നു തന്റെ സമീപനത്തിന്റെ കാതൽ എന്ന് അദ്ദേഹം പറഞ്ഞു.
“എന്റെ മാനസികാവസ്ഥ വളരെ ലളിതമാണ്. എനിക്ക് എന്നിൽ നിന്ന് വലിയ പ്രതീക്ഷകളൊന്നുമില്ല. കഴിഞ്ഞ 3-4 വർഷമായി കാര്യങ്ങൾ എനിക്ക് അനുകൂലമായി വന്നത് അങ്ങനെയാണ്. പ്രതീക്ഷകളൊന്നുമില്ല, വെറുതെ നിങ്ങളുടെ ജോലി ചെയ്തുകൊണ്ടിരിക്കുക. സാധാരണയായി നമ്മൾ ‘വർത്തമാനകാലത്ത് ജീവിക്കുക’ എന്നതിനെക്കുറിച്ച് സംസാരിക്കാറുണ്ട്, ഭാവിയെക്കുറിച്ച് ചിന്തിക്കാറില്ല. ഇപ്പോൾ ഞാനും അത്തരമൊരു മാനസികാവസ്ഥയിലാണ്. കഴിഞ്ഞ 3-4 വർഷമായി ഇതാണ് ഞാൻ പിന്തുടരുന്നത്,” എന്നായിരുന്നു അദ്ദേഹത്തിന്റെ വാക്കുകൾ.
“ഞാൻ രാജ്യത്തിനായി കളിച്ചിരുന്നില്ല എന്നത് സത്യമാണ്. എന്നാൽ ആ കാലയളവിൽ ഞാൻ ചെയ്ത കാര്യങ്ങളും, ഒരു വ്യക്തിയെന്ന നിലയിൽ എനിക്കുണ്ടായ പക്വതയും വർത്തമാനകാലത്ത് ജീവിക്കുക എന്നതാണ് എന്നെ പഠിപ്പിച്ചത്. ഈ നാല് വർഷത്തിനിടയിൽ, ഇന്ത്യൻ ജേഴ്സിയിലേക്ക് തിരിച്ചെത്താൻ ഞാൻ ഒരിക്കലും നിർബന്ധബുദ്ധിയോടെ ശ്രമിച്ചിട്ടില്ല. സത്യം പറഞ്ഞാൽ, ഈ നാല് വർഷം എങ്ങനെ കടന്നുപോയി എന്ന് പോലും എനിക്കറിയില്ല. കാര്യങ്ങൾ വലിയ രീതിയിൽ മാറിമറിഞ്ഞു, അതിൽ ഐപിഎല്ലിന് (IPL) വലിയ പങ്കുണ്ട്.”
“കഴിഞ്ഞ രണ്ട് ഐപിഎൽ സീസണുകളിലും, ഞാൻ ഐപിഎല്ലിലേക്ക് പോകുമ്പോൾ യാതൊരു പ്രതീക്ഷകളും ഉണ്ടായിരുന്നില്ല. എന്നിൽ നിന്ന് എനിക്കും വലിയ പ്രതീക്ഷകളൊന്നും ഉണ്ടായിരുന്നില്ല. എന്നാൽ, ഞാൻ തയ്യാറെടുപ്പുകൾ നടത്തിയിരുന്നില്ല എന്നല്ല ഇതിനർത്ഥം. ഫിറ്റ്‌നസ്, കഴിവുകൾ, മാനസികമായ വശങ്ങൾ എന്നിങ്ങനെ ആവശ്യമായ എല്ലാ തയ്യാറെടുപ്പുകളും ഞാൻ നടത്തിയിരുന്നു. പക്ഷേ, ഞാൻ എന്താണ് ചെയ്യാൻ പോകുന്നതെന്ന കാര്യത്തിൽ യാതൊരു മുൻധാരണയോ പ്രതീക്ഷയോ ഉണ്ടായിരുന്നില്ല,” എന്ന് ഭുവി വെളിപ്പെടുത്തി.
“തീർച്ചയായും, ടീമിന് വേണ്ടി സംഭാവന നൽകേണ്ടതുണ്ടായിരുന്നു. എന്നാൽ ഇത്തരത്തിൽ ഐപിഎല്ലിൽ പങ്കെടുക്കുമെന്നും, രണ്ട് വർഷത്തിനുള്ളിൽ രണ്ട് ഐപിഎൽ കിരീടങ്ങൾ നേടുമെന്നും ഞാൻ ഒരിക്കലും കരുതിയിരുന്നില്ല”. ടി20 ക്രിക്കറ്റിൽ ബാറ്റ്‌സ്മാൻമാർ കൂടുതൽ ആക്രമണോത്സുകരാവുകയും ഉയർന്ന സ്കോറുകൾ പതിവാകുകയും ചെയ്യുന്ന സാഹചര്യത്തിൽ, ക്രിക്കറ്റിലെ മാറിക്കൊണ്ടിരിക്കുന്ന ആവശ്യകതകൾ മനസ്സിലാക്കാൻ ഐപിഎൽ തന്നെ സഹായിച്ചുവെന്ന് ഭുവനേശ്വർ കരുതുന്നു.
ഇംപാക്ട് പ്ലെയർ’ നിയമവും മറ്റ് മാറ്റങ്ങളും കാരണം ബാറ്റ്‌സ്മാന്മാർ കൂടുതൽ ആക്രമണകാരികളായി മാറുകയും 200 പ്ലസ് സ്കോറുകൾ സാധാരണയാവുകയും ചെയ്തിട്ടുണ്ട്. എങ്കിലും ബൗളർമാരെ കേവലം ‘ഇരകൾ’ആയി കാണേണ്ടതില്ലെന്ന് അദ്ദേഹം അഭിപ്രായപ്പെട്ടു. കൃത്യമായ പ്ലാനിംഗിലൂടെ ബാറ്റ്‌സ്മാനെ തങ്ങൾക്കാവശ്യമുള്ള രീതിയിൽ ഷോട്ട് കളിപ്പിക്കാൻ ബൗളർമാർക്ക് കഴിയും. ഇരകളല്ല, കളി നിയന്ത്രിക്കുന്നവർ ആണ് ബൗളർമാരെന്നും ഭുവി അഭിപ്രായപ്പെട്ടു. കൃത്യമായ പ്ലാനിംഗിലൂടെ ബാറ്റ്‌സ്മാനെ തങ്ങൾക്കാവശ്യമുള്ള രീതിയിൽ ഷോട്ട് കളിപ്പിക്കാൻ ബൗളർമാർക്ക് കഴിയുമെന്നും അദ്ദേഹം പറഞ്ഞു.
ന്യൂസിലാൻഡിനെതിരായ ടി20 പരമ്പരയിലെ ഇന്ത്യയുടെ ആദ്യ വിജയത്തെക്കുറിച്ചും ഭുവി പറയുന്നുണ്ട്. ഇത്തരമൊരു മികച്ച തുടക്കം പരമ്പരയുടെ ബാക്കി ഭാഗങ്ങളിൽ ടീമിന്റെ ആത്മവിശ്വാസത്തിന് വലിയ ഗുണം ചെയ്യുമെന്ന് അദ്ദേഹം അഭിപ്രായപ്പെട്ടു. എല്ലാ ഫോർമാറ്റുകളിലും ഇത്തരമൊരു തുടക്കം ലഭിക്കുന്നത് വരാനിരിക്കുന്ന മത്സരങ്ങളിലും ഗുണകരമാകും. ഒരു നല്ല തുടക്കം ലഭിച്ചാൽ, മികച്ച പ്രകടനം കാഴ്ചവെക്കാനും പരമ്പര വിജയിക്കാനുമുള്ള ആത്മവിശ്വാസം എല്ലാവരിലും ഉണ്ടാകുമെന്നും ഭുവനേശ്വർ കുമാർ പറഞ്ഞു.
English Summary
Indian pacer Bhuvneshwar Kumar has stated that his experiences during his time away from the Indian team- along with the personal maturity he gained- taught him the importance of living in the present. Bhuvi shared these insights in a video released by the BCCI, following his return to the Indian squad after a four-year absence.
