Mukul Choudhary: ലഖ്നൗ തോല്വി ഉറപ്പിച്ചപ്പോള് രക്ഷകനായി അവതരിച്ച 21-കാരന്; ആരാണ് മുകുള് ചൗധരി?
IPL 2026 LSG vs KKR: മുകുള് ചൗധരിയുടെ തകര്പ്പന് പ്രകടനമാണ് ലഖ്നൗ സൂപ്പര് ജയന്റ്സിന് വിജയം സമ്മാനിച്ചത്. പുറത്താകാതെ 27 പന്തില് 54 റണ്സാണ് മുകുള് അടിച്ചുകൂട്ടിയത്. ലേലത്തില് 2.6 കോടി രൂപയ്ക്കാണ് ഈ 21-കാരനെ ലഖ്നൗ സ്വന്തമാക്കിയത്. ആഭ്യന്തര ക്രിക്കറ്റില് രാജസ്ഥാനു വേണ്ടിയാണ് മുകുള് കളിക്കുന്നത്.
Mukul Choudhary LSG Player: അത്യന്തം ആവേശം നിറഞ്ഞതായിരുന്നു ഈഡന് ഗാര്ഡന്സില് നടന്ന കൊല്ക്കത്ത നൈറ്റ് റൈഡേഴ്സ്-ലഖ്നൗ സൂപ്പര് ജയന്റ്സ് പോരാട്ടം. ഒരു ഘട്ടത്തില് കൊല്ക്കത്ത വിജയിക്കുമെന്ന് തോന്നിയ മത്സരം. എന്നാല് 21-കാരനായ മുകുള് ചൗധരിയുടെ തകര്പ്പന് പ്രകടനം അവസാന നിമിഷം ലഖ്നൗവിന് വിജയം സമ്മാനിച്ചു. മുകുളായിരുന്നു കളിയിലെ താരം.
ആദ്യം ബാറ്റു ചെയ്ത കെകെആര് 20 ഓവറില് നാലു വിക്കറ്റിന് 181 റണ്സ് നേടി. അവസാന പന്തില് ലഖ്നൗ വിജയലക്ഷ്യം മറികടന്നു. മൂന്ന് വിക്കറ്റിനായിരുന്നു ജയം. അഞ്ച് വിക്കറ്റിന് 104 എന്ന നിലയില് ലഖ്നൗ തകര്ന്നടിഞ്ഞപ്പോഴാണ് ഏഴാമനായി മുകുള് ക്രീസിലെത്തിയത്.
പുറത്താകാതെ 27 പന്തില് 54 റണ്സാണ് മുകുള് അടിച്ചുകൂട്ടിയത്. ഏഴ് സിക്സും, രണ്ടു ഫോറും താരം നേടി. ഏഴു വിക്കറ്റിന് 128 എന്ന നിലയില് നിന്നാണ്, പിന്നീട് കൂടുതല് വിക്കറ്റുകള് നഷ്ടപ്പെടുത്താതെ ലഖ്നൗ വിജയലക്ഷ്യം മറികടന്നത്. 34 പന്തില് 54 റണ്സെടുത്ത ആയുഷ് ബദോനിയുടെ പ്രകടനവും നിര്ണായകമായി.
Also Read: MS Dhoni: ചെന്നൈ സൂപ്പര് കിങ്സ് ആരാധകര്ക്ക് നിരാശ; ധോണിയുടെ തിരിച്ചുവരവ് വൈകും
ആരാണ് മുകുൾ ചൗധരി?
ആഭ്യന്തര ക്രിക്കറ്റില് രാജസ്ഥാനു വേണ്ടിയാണ് മുകുള് കളിക്കുന്നത്. താരലേലത്തില് 2.6 കോടി രൂപയ്ക്കാണ് ഈ 21-കാരനെ ലഖ്നൗ സ്വന്തമാക്കിയത്. 2023 ജനുവരിയിൽ ഛത്തീസ്ഗഡിനെതിരെയാണ് മുകുൾ ഫസ്റ്റ് ക്ലാസ് ക്രിക്കറ്റില് അരങ്ങേറിയത്. 2023 ഒക്ടോബറിൽ ജാർഖണ്ഡിനെതിരെ ടി20യില് അരങ്ങേറ്റം കുറിച്ചു. 7 ടി20 മത്സരങ്ങളിൽ നിന്ന് 37.66 ശരാശരിയിൽ 226 റൺസ് നേടി.
മീഡിയം പേസറായാണ് കരിയര് ആരംഭിച്ചത്. പിന്നീട് വിക്കറ്റ് കീപ്പിങിലേക്ക് മാറി. സയ്യിദ് മുഷ്താഖ് അലി ട്രോഫിയിൽ കാഴ്ചവച്ച മികച്ച പ്രകടനത്തിലൂടെ ശ്രദ്ധേയനായി. സയ്യിദ് മുഷ്താഖ് അലി ട്രോഫിയിൽ അഞ്ച് ഇന്നിംഗ്സുകളിൽ നിന്ന് 198.85 എന്ന സ്ട്രൈക്ക് റേറ്റിൽ 173 റൺസ് നേടി. താന് ക്രിക്കറ്റ് താരമാകണമെന്നത് പിതാവിന്റെ ആഗ്രഹമാണെന്ന് മുകുള് വ്യക്തമാക്കിയിരുന്നു.
