Frank Duckworth : മഴ ചതിച്ചാലും വിധി എഴുതിയ ഡക്ക്വർത്ത്-ലൂയിസ്; ക്രിക്കറ്റ് നിയമത്തിൻ്റെ ഉപജ്ഞാതാക്കളിൽ ഒരാൾ ഓർമ്മയാകുമ്പോൾ
Frank Duckworth Passes Away : ക്രിക്കറ്റിലെ മഴനിയമം ഡക്ക്വർത്ത് - ലൂയിസ് - സ്റ്റേൺ നിയമത്തിൻ്റെ സഹ ഉപജ്ഞാതാവ് ഫ്രാങ്ക് ഡക്ക്വർത്ത് അന്തരിച്ചു. 2020ൽ ഫ്രാങ്കിനൊപ്പം നിയമം കണ്ടുപിടിച്ച ടോണി ലൂയിസും മരണപ്പെട്ടിരുന്നു.
ക്രിക്കറ്റിലെ മഴ നിയമമായ ഡക്ക്വർത്ത് - ലൂയിസ് -സ്റ്റേൺ നിയമത്തിൻ്റെ സഹ ഉപജ്ഞാതാവ് ഫ്രാങ്ക് ഡക്ക്വർത്ത് അന്തരിച്ചു. 84 വയസായിരുന്നു. ഇംഗ്ലീഷ് സ്റ്റാറ്റിസ്റ്റീഷ്യനായിരുന്ന ഡക്ക്വർത്ത് ഇംഗ്ലണ്ടിൻ്റെ മുൻ ക്രിക്കറ്റ് താരവും മാധ്യമപ്രവർത്തകനുമായ ടോണി ലൂയിസിനൊപ്പം ചേർന്നാണ് മഴനിയമം കണ്ടുപിടിച്ചത്. 2020ൽ, തൻ്റെ 78ആം വയസിൽ ടോണി ലൂയിസും മരണപ്പെട്ടിരുന്നു. ഇതോടെ ഈ നിയമം കണ്ടുപിടിച്ച രണ്ടുപേരും മരണപ്പെട്ടു. രണ്ടുപേരും ചേർന്ന് കണ്ടുപിടിച്ച നിയമത്തിൽ പിൽക്കാലത്ത് ഓസ്ട്രേലിയക്കാരനായ സ്റ്റീഫൻ സ്റ്റേൺ എന്ന മറ്റൊരു സ്റ്റാറ്റിസ്റ്റീഷ്യൻ ചില പരിഷ്കാരങ്ങൾ വരുത്തിയതോടെയാണ് ഡക്ക്വർത്ത് - ലൂയിസ് നിയമം, ഡക്ക്വർത്ത് - ലൂയിസ് - സ്റ്റേൺ നിയമമെന്ന് പേരുമാറിയത്.
ഇന്ന് വ്യാപകമായി ഉപയോഗിക്കപ്പെടുന്ന ഡിഎൽഎസ് നിയമം 1997ലാണ് ഒരു രാജ്യാന്തര മത്സരത്തിൽ ആദ്യമായി ഉപയോഗിക്കപ്പെട്ടത്. ജനുവരി ഒന്നിന് സിംബാബ്വെയും ഇംഗ്ലണ്ടും തമ്മിൽ ഹരാരെയിൽ നടന്ന മത്സരത്തിൽ ആതിഥേയർ 6 റൺസിന് വിജയിച്ചു. 2001ൽ മഴ മൂലം ഓവറുകൾ വെട്ടിച്ചുരുക്കേണ്ടിവന്ന മത്സരങ്ങളിൽ പുതുക്കിയ വിജയലക്ഷ്യം തീരുമാനിക്കുന്നതിനുള്ള സ്റ്റാൻഡേർഡ് രീതിയിൽ ഐസിസി ഡക്ക്വർത്ത് - ലൂയിസ് നിയമത്തെ ഔദ്യോഗികമായി അംഗീകരിച്ചു. ആഭ്യന്തര മത്സരങ്ങളിൽ ബിസിസിഐ ഉപയോഗിക്കുന്നത് ഈ നിയമമല്ല. ഇന്ത്യക്കാരനായ വി ജയദേവൻ്റെ വിജെഡി നിയമമാണ് ഇന്ത്യയിലെ ആഭ്യന്തര മത്സരങ്ങളിൽ ഉപയോഗിക്കുന്നത്.
സഹപ്രവർത്തകരും ക്രിക്കറ്റ് ലോകവും ബഹുമാനിച്ച ഒരു സ്റ്റാറ്റിസ്റ്റീഷ്യനായിരുന്നു ഫ്രാങ്ക് എന്ന് ഐസിസി ജനറൽ മാനേജർ വസിം ഖാൻ വാർത്താകുറിപ്പിൽ പറഞ്ഞു. അദ്ദേഹം സഹ ഉപജ്ഞാതാവായ ഡിഎൽഎസ് നിയമം രണ്ട് പതിറ്റാണ്ടായി നമ്മൾ രാജ്യാന്തര മത്സരങ്ങൾ വ്യാപകമായി ഉപയോഗിക്കുന്നു. ക്രിക്കറ്റ് എന്ന ഗെയിമിന് ഫ്രാങ്ക് നൽകിയ സംഭാവനകൾ വിലമതിക്കാനാവാത്തതാണ്. അദ്ദേഹത്തിൻ്റെ കുടുംബത്തിനും സുഹൃത്തുക്കൾക്കും അനുശോചനമറിയിക്കുന്നു എന്നും വസിം ഖാൻ പറഞ്ഞു.
നേടിയ റൺസും നഷ്ടപ്പെട്ട വിക്കറ്റും ബാക്കിയുള്ള ഓവറുകളും പരിഗണിച്ചാണ് ഡക്ക്വർത്ത് - ലൂയിസ് നിയമത്തിൽ വിജയലക്ഷ്യം പുനക്രമീകരിക്കുന്നത്. ഇന്നലെ ടി20 ലോകകപ്പിൽ അഫ്ഗാനിസ്ഥാനും ബംഗ്ലാദേശും തമ്മിൽ നടന്ന മത്സരത്തിലും ഈ നിയമം ഉപയോഗിച്ചിരുന്നു. മത്സരത്തിൽ വിജയിച്ച അഫ്ഗാനിസ്ഥാൻ ചരിത്രത്തിലാദ്യമായി ലോകകപ്പ് സെമിയിൽ പ്രവേശിക്കുകയും ചെയ്തു. എട്ട് റൺസിനായിരുന്നു അഫ്ഗാൻ്റെ ജയം. നാല് വിക്കറ്റുകൾ വീതം വീഴ്ത്തിയ ക്യാപ്റ്റൻ റഷീദ് ഖാനും നവീൻ ഉൾ-ഹഖുമാണ് അഫ്ഗാൻ്റെ വിജയശിൽപ്പികൾ.
