Dubai Paid Parking: ദുബായ് അൽ ഫുർജാനിൽ പുതിയ പെയ്ഡ് പാർക്കിങ്; സബ്‌സ്‌ക്രിപ്‌ഷൻ നിരക്കുകൾ പ്രഖ്യാപിച്ച് ‘പാർക്കിൻ’
Parkin Announces Paid Public Parking in Al Furjan Dubai: പതിവായി ഈ മേഖലയിൽ വാഹനങ്ങൾ പാർക്ക് ചെയ്യുന്ന താമസക്കാർക്കും സന്ദർശകർക്കുമായി മികച്ച സബ്‌സ്‌ക്രിപ്‌ഷൻ പാക്കേജുകളും കമ്പനി പ്രഖ്യാപിച്ചിട്ടുണ്ട്. ഇതനുസരിച്ച് ഒരു മാസത്തേക്കുള്ള പാർക്കിങ് സബ്‌സ്‌ക്രിപ്‌ഷന് 672 ദിർഹമാണ് നിരക്ക്. മൂന്ന് മാസത്തേക്ക് 1,999 ദിർഹവും ആറ് മാസത്തേക്ക് 3,999 ദിർഹവുമാണ് ഈടാക്കുന്നത്.
പ്രതീകാത്മക ചിത്രം
ദുബായ്: ദുബായിലെ അൽ ഫുർജാനിൽ പുതിയ പെയ്ഡ് പാർക്കിങ് സംവിധാനം നിലവിൽ വന്നു. ദുബായിലെ പാർക്കിങ് സേവനങ്ങൾ നിയന്ത്രിക്കുന്ന ‘പാർക്കിൻ’ കമ്പനിയാണ് തങ്ങളുടെ ഔദ്യോഗിക സോഷ്യൽ മീഡിയ അക്കൗണ്ടുകളിലൂടെ ഈ വിവരം പൊതുജനങ്ങളെ അറിയിച്ചത്. 591P എന്ന സോൺ കോഡിന് കീഴിലാണ് അൽ ഫുർജാനിലെ ഈ പുതിയ പെയ്ഡ് പാർക്കിങ് സംവിധാനം ഉൾപ്പെടുത്തിയിരിക്കുന്നത്. പാർക്കിങ് നിയമങ്ങൾ ആളുകൾക്ക് എളുപ്പത്തിൽ മനസ്സിലാക്കുന്നതിനായി ഈ പ്രദേശങ്ങളിൽ പ്രത്യേക സൈൻ ബോർഡുകളും അധികൃതർ സ്ഥാപിച്ചിട്ടുണ്ട്.
പുതിയ മാറ്റങ്ങൾ അനുസരിച്ച് എല്ലാ ദിവസവും രാവിലെ 8 മണി മുതൽ അർധരാത്രി 12 മണി വരെയാണ് പെയ്ഡ് പാർക്കിങ് സമയമായി അധികൃതർ നിശ്ചയിച്ചിട്ടുള്ളത്. ഈ സമയങ്ങളിൽ വാഹനങ്ങൾ പാർക്ക് ചെയ്യുന്നവർ മണിക്കൂർ അടിസ്ഥാനത്തിലോ അല്ലെങ്കിൽ സബ്‌സ്‌ക്രിപ്‌ഷൻ പാക്കേജുകൾ വഴിയോ ഫീസ് അടക്കേണ്ടതാണ്. മണിക്കൂർ അടിസ്ഥാനത്തിൽ എത്ര തുകയാണ് നൽകേണ്ടത് എന്നതുമായി ബന്ധപ്പെട്ട വിവരങ്ങൾ പാർക്കിങ് കേന്ദ്രങ്ങളിൽ സ്ഥാപിച്ചിട്ടുള്ള ബോർഡുകളിൽ നിന്ന് അറിയാൻ സാധിക്കും. ഇതിന് പുറമെ സ്മാർട്ട് ഫോണുകളിലെ പാർക്കിൻ ആപ്പ് ഉപയോഗിച്ചും എളുപ്പത്തിൽ നിരക്കുകൾ അറിയാനും ഓൺലൈനായി പണമടയ്ക്കാനും കഴിയും.
പതിവായി ഈ മേഖലയിൽ വാഹനങ്ങൾ പാർക്ക് ചെയ്യുന്ന താമസക്കാർക്കും സന്ദർശകർക്കുമായി മികച്ച സബ്‌സ്‌ക്രിപ്‌ഷൻ പാക്കേജുകളും കമ്പനി പ്രഖ്യാപിച്ചിട്ടുണ്ട്. ഇതനുസരിച്ച് ഒരു മാസത്തേക്കുള്ള പാർക്കിങ് സബ്‌സ്‌ക്രിപ്‌ഷന് 672 ദിർഹമാണ് നിരക്ക്. മൂന്ന് മാസത്തേക്ക് 1,999 ദിർഹവും ആറ് മാസത്തേക്ക് 3,999 ദിർഹവുമാണ് ഈടാക്കുന്നത്. ദീർഘകാലത്തേക്ക് പാർക്കിങ് ആവശ്യമുള്ളവർക്ക് ഒരു വർഷത്തെ പാക്കേജ് തിരഞ്ഞെടുക്കാവുന്നതാണ്. ഇതിനായി 4,999 ദിർഹമാണ് അടയ്ക്കേണ്ടത്. കുറഞ്ഞ കാലയളവിലേക്കുള്ള മറ്റ് പാക്കേജുകളെ അപേക്ഷിച്ച് നോക്കുമ്പോൾ വാർഷിക സബ്‌സ്‌ക്രിപ്‌ഷൻ തിരഞ്ഞെടുക്കുന്നത് കൂടുതൽ ലാഭകരമാണ്.
പാർക്കിങ്ങുമായി ബന്ധപ്പെട്ട നിയമലംഘനങ്ങളും പിഴകളും ഒഴിവാക്കുന്നതിനായി എല്ലാവരും പുതിയ മാറ്റങ്ങൾ കൃത്യമായി പാലിക്കണമെന്ന് അധികൃതർ അഭ്യർത്ഥിച്ചു. വാഹനം പാർക്ക് ചെയ്യുന്നതിന് മുൻപായി അതാത് സ്ഥലങ്ങളിലെ സൈൻ ബോർഡുകൾ ശ്രദ്ധിക്കണമെന്നും, ബുക്കിംഗുകൾക്കും കൂടുതൽ വിവരങ്ങൾക്കും സേവനങ്ങൾക്കുമായി ഔദ്യോഗിക ആപ്പ് തന്നെ ഉപയോഗിക്കണമെന്നും കമ്പനി വ്യക്തമാക്കി. പുതിയ പെയ്ഡ് പാർക്കിങ് സംവിധാനം നിലവിൽ വന്നതോടെ ഈ മേഖലയിലെ വാഹന പാർക്കിങ് കൂടുതൽ സുഗമമാകുമെന്നാണ് പ്രതീക്ഷിക്കുന്നത്.
English Summary
Dubai’s Al Furjan has introduced paid public parking under zone 591P (8 AM to midnight). Motorists can pay hourly or choose long-term subscription plans via the Parkin app.
