ചാരവനിതയുമായുള്ള ബന്ധം എല്ലാം തകർത്തു; എൻവിഡിയ സി.ഇ.ഒ ജെൻസൻ ഹുവാങ് രാജിവെച്ചു
Jensen Huang Steps Down as Nvidia CEO; Colette Kress Named Interim Chief: കഴിഞ്ഞ മാസം ന്യൂയോർക്ക് ടൈംസാണ് വിവാദങ്ങൾക്ക് തുടക്കമിട്ട റിപ്പോർട്ട് പുറത്തുവിട്ടത്. എൻവിഡിയ സി.ഇ.ഒ ജെൻസൻ ഹുവാങ്ങും ആലീസ് ഹുവാങ്ങും തമ്മിൽ അടുത്ത ബന്ധമുണ്ടായിരുന്നെന്നും, ആലീസ് ബീജിംഗിന് നേരിട്ട് രഹസ്യവിവരങ്ങൾ കൈമാറുന്ന ചാരവനിതയാണെന്നും യു.എസ് രഹസ്യാന്വേഷണ ഏജൻസികൾ കണ്ടെത്തിയെന്നായിരുന്നു റിപ്പോർട്ട്
വാഷിംഗ്ടൺ: ചാരവൃത്തി വിവാദത്തെ തുടർന്ന് ലോകത്തിലെ ഏറ്റവും വലിയ എ.ഐ ചിപ്പ് നിർമ്മാണ കമ്പനിയായ എൻവിഡിയയുടെ സി.ഇ.ഒ ജെൻസൻ ഹുവാങ് രാജിവെച്ചു. കമ്പനിയുടെ ചീഫ് ഫിനാൻഷ്യൽ ഓഫീസറായ കോലെറ്റ് ക്രെസ് താൽക്കാലിക സി.ഇ.ഒ ആയി ചുമതലയേൽക്കും. ചൈനീസ് ചാരവനിതയുമായുള്ള അടുത്ത ബന്ധവും, ഇതിന് പിന്നാലെ കമ്പനിയിലെ മറ്റൊരു ജീവനക്കാരിയുമായുള്ള വഴിവിട്ട ബന്ധവും വാർത്തയായതോടെയാണ് രാജി. കമ്പനിക്ക് ഒരു സ്ഥിരം സി.ഇ.ഒയെ കണ്ടെത്താനുള്ള നടപടികൾ ആരംഭിച്ചതായും ഹുവാങ് ഇനി കമ്പനിയുടെ ബോർഡിൽ തുടരില്ലെന്നും എൻവിഡിയ പുറത്തിറക്കിയ വാർത്താക്കുറിപ്പിൽ വ്യക്തമാക്കി.
കഴിഞ്ഞ മാസം ന്യൂയോർക്ക് ടൈംസാണ് വിവാദങ്ങൾക്ക് തുടക്കമിട്ട റിപ്പോർട്ട് പുറത്തുവിട്ടത്. എൻവിഡിയ സി.ഇ.ഒ ജെൻസൻ ഹുവാങ്ങും ആലീസ് ഹുവാങ്ങും തമ്മിൽ അടുത്ത ബന്ധമുണ്ടായിരുന്നെന്നും, ആലീസ് ബീജിംഗിന് നേരിട്ട് രഹസ്യവിവരങ്ങൾ കൈമാറുന്ന ചാരവനിതയാണെന്നും യു.എസ് രഹസ്യാന്വേഷണ ഏജൻസികൾ കണ്ടെത്തിയെന്നായിരുന്നു റിപ്പോർട്ട്. ഇതിന് പിന്നാലെ എൻവിഡിയ ആഭ്യന്തര അന്വേഷണം പ്രഖ്യാപിച്ചിരുന്നു. ഈ വിഷയത്തിൽ എഫ്.ബി.ഐയും അന്വേഷണം നടത്തുന്നുണ്ടെന്ന് യു.എസ് പ്രസിഡൻ്റ് ഡൊണാൾഡ് ട്രംപ് സ്ഥിരീകരിച്ചിരുന്നു.
അതേസമയം ആലീസ് ഒരു ചാരവനിതയാണെന്ന് തനിക്ക് അറിയില്ലായിരുന്നുവെന്ന് ഹുവാങ് തന്നോട് പറഞ്ഞതായി ഡോണാൾഡ് ട്രംപ് വെളിപ്പെടുത്തിയിരുന്നു. ഇക്കാര്യത്തിൽ ജെൻസൺ ഹുവാങ്ങിനെ പൂർണമായും വിശ്വസിക്കുന്നതായും അമേരിക്കൻ പ്രസിഡൻ്റ് വ്യക്തമാക്കിയിരുന്നു. സംഭവത്തിൽ തങ്ങൾക്ക് യാതൊരു പങ്കുമില്ലെന്നാണ് ചൈനയുടെ വിശദീകരണം.
എൻവിഡിയയുടെ സഹസ്ഥാപകനും നാലാമത്തെ വലിയ നിക്ഷേപകനുമാണ് 63-കാരനായ ജെൻസൺ ഹുവാങ്. കമ്പനിയിലെ മറ്റൊരു ജീവനക്കാരിയുമായി ഇദ്ദേഹത്തിന് ബന്ധമുണ്ടായിരുന്നെന്ന റിപ്പോർട്ടുകളും കഴിഞ്ഞ ദിവസം പുറത്തുവന്നിരുന്നു. ഇതോടെയാണ് രാജിയ്ക്കുള്ള സമ്മർദ്ദം ശക്തമായത്. പിന്നാലെ ബോർഡ് അടിയന്തര യോഗം ചേർന്ന് രാജി ആവശ്യപ്പെടുകയുമായിരുന്നു. ഹുവാങ്ങിൻ്റെ നേതൃത്വത്തിൽ എൻവിഡിയ ലോകത്തിലെ തന്നെ ഏറ്റവും മൂല്യമുള്ള കമ്പനികളിലൊന്നായി മാറിയിരുന്നു. ചൈനീസ് വിപണിയിലേക്ക് അത്യാധുനിക H200 ചിപ്പുകൾ കയറ്റുമതി ചെയ്യാൻ കഴിഞ്ഞ ജനുവരിയിൽ ട്രംപ് ഭരണകൂടത്തിൽ നിന്ന് ഇദ്ദേഹം അനുമതി നേടിയെടുത്തിരുന്നു.
English Summary
Nvidia CEO Jensen Huang stepped down amid a Chinese spy scandal and an extramarital affair. CFO Colette Kress becomes interim CEO as Nvidia shares plunged 13% following the news.
