CUET UG 2026: ഇത് ലാസ്റ്റ് ചാന്സ്! എന്ടിഎ ഒരു അവസരം കൂടി നല്കുന്നു; സിയുഇടി യുജിക്ക് ഇനിയും അപേക്ഷിക്കാം
CUET UG 2026 Application Date Extended: സിയുഇടി യുജി പരീക്ഷയ്ക്ക് ഫെബ്രുവരി 26 വരെ അപേക്ഷിക്കാം. ഫീസ് അടയ്ക്കാനുള്ള സാവകാശവും 26-ന് അവസാനിക്കും. മെയ് 11 മുതൽ മെയ് 31 വരെ ഓണ്ലൈനായാണ് പരീക്ഷ നടത്തുന്നത്.
CUET UG 2026
കോമൺ യൂണിവേഴ്സിറ്റി എൻട്രൻസ് ടെസ്റ്റ് അണ്ടര് ഗ്രാജ്വേറ്റ് (സിയുഇടി യുജി) പരീക്ഷയ്ക്ക് അപേക്ഷിക്കാന് ഇനിയും അവസരം. വിദ്യാര്ത്ഥികളുടെ അപേക്ഷ പരിഗണിച്ചാണ് അപേക്ഷാ വിന്ഡോ വീണ്ടും തുറന്നത്. ഫെബ്രുവരി 26 വരെ അപേക്ഷിക്കാം. ഇന്ത്യയിലും വിദേശത്തുമുള്ള വിവിധ നഗരങ്ങളിലായി മെയ് 11 മുതൽ മെയ് 31 വരെ ഓണ്ലൈനായാണ് പരീക്ഷ നടത്തുന്നത്. ജനുവരി മൂന്ന് മുതല് 30 വരെയാണ് ആദ്യം അപേക്ഷിക്കാന് സമയം അനുവദിച്ചിരുന്നത്.
പിന്നീട് സമയപരിധി ഫെബ്രുവരി നാല് വരെ നീട്ടി. ഫീസ് അടയ്ക്കാന് ഫെബ്രുവരി ഏഴ് വരെ സാവകാശവും നല്കി. എന്നാല് സമയപരിധി ഇനിയും നീട്ടണമെന്ന് ആവശ്യപ്പെട്ട് നിരവധി വിദ്യാര്ത്ഥികള് എന്ടിഎയെ സമീപിച്ചു. തുടര്ന്നാണ് സമയപരിധി ഫെബ്രുവരി 26 വരെ നീട്ടാന് തീരുമാനിച്ചത്. ഫീസ് അടയ്ക്കാനുള്ള സാവകാശവും 26-ന് അവസാനിക്കും.
അപേക്ഷയിലെ വിവരങ്ങള് കൃത്യമായിരിക്കണമെന്ന് എന്ടിഎ നിര്ദ്ദേശിച്ചു. അപേക്ഷാ ഫോം സമര്പ്പിച്ചതിന് ശേഷം ഇനി തിരുത്താന് സൗകര്യം അനുവദിക്കുന്നതല്ല. ഏറ്റവും പുതിയ അപ്ഡേറ്റുകള്ക്കായി https://nta.ac.in, https://cuet.nta.nic.in/ എന്നീ ഔദ്യോഗിക വെബ്സൈറ്റുകള് പതിവായി സന്ദര്ശിക്കണമെന്നും എന്ടിഎ നിര്ദ്ദേശിച്ചു.
അപേക്ഷിക്കാന് ചെയ്യേണ്ടത്
- സിയുഇടി യുജിയുടെ ഔദ്യോഗിക വെബ്സൈറ്റ് സന്ദര്ശിക്കുക
- ഹോം പേജിലെ രജിസ്ട്രേഷൻ ലിങ്കിൽ ക്ലിക്ക് ചെയ്യുക
- രജിസ്ട്രേഷൻ പൂർത്തിയായിക്കഴിഞ്ഞാൽ, ലോഗിൻ ചെയ്യുക
- അപേക്ഷാ ഫോം പൂരിപ്പിച്ച് അപേക്ഷാ ഫീസ് അടയ്ക്കുക
- അപേക്ഷ സബ്മിറ്റ് ചെയ്യുക
- ഭാവി ആവശ്യങ്ങള്ക്കായി അപേക്ഷയുടെ പകര്പ്പ് പ്രിന്റ് ചെയ്ത് സൂക്ഷിക്കുക
സംശയങ്ങളുണ്ടെങ്കില് 011-40759000 എന്ന നമ്പറിൽ എന്ടിഎ ഹെൽപ്പ് ഡെസ്കിൽ വിളിക്കാം അല്ലെങ്കിൽ cuet-ug@nta.ac.in എന്ന വിലാസത്തിൽ ഇമെയിൽ അയയ്ക്കാം. അപേക്ഷിക്കുന്നതിനുള്ള ലിങ്കില് നേരിട്ട് പ്രവേശിക്കുന്നതിന് ഇവിടെ ക്ലിക്ക് ചെയ്യുക.
