Delhi Police Constable Posts: ഫിസിക്കൽ ടെസ്റ്റില്ല, അഗ്നിവീറുകൾക്ക് ഡൽഹി പോലീസിൽ നിയമനം

ഡൽഹി പോലീസ് റിക്രൂട്ട്‌മെന്റിൽ മുൻ അഗ്നിവീറുകൾക്ക് വൻ ആനുകൂല്യങ്ങൾ. കേന്ദ്ര ആഭ്യന്തര മന്ത്രാലയം പുറപ്പെടുവിച്ച വിജ്ഞാപനത്തിലാണ് മുൻ അഗ്നിവീറുകൾക്ക് 20 ശതമാനം സംവരണം ഏർപ്പെടുത്തികൊണ്ട് ഉത്തരവ് വന്നിരിക്കുന്നത്. നാല് വർഷത്തെ സൈനിക സേവനത്തിന് ശേഷം പുറത്തിറങ്ങുന്ന അഗ്നിവീറുകൾക്കാണ് ഡൽഹി പോലീസിൽ അവസരം ലഭിക്കുന്നത്.

ഡൽഹി പോലീസ് കോൺസ്റ്റബിൾ തസ്തികകളിൽ ആകെ ഒഴിവുകളുടെ 20 ശതമാനമാണ് മുൻ അഗ്നിവീറുകൾക്കായി ലഭിക്കുന്നത്. അഗ്നിവീറുകൾ സൈന്യത്തിൽ ഇതിനകം തന്നെ ശാരീരിക പരിശീലനം പൂർത്തിയാക്കിയവരായതിനാൽ, ഡൽഹി പോലീസിലേക്കുള്ള റിക്രൂട്ട്‌മെന്റിൽ ഇവർക്ക് ശാരീരിക കാര്യക്ഷമതാ പരീക്ഷ ഉണ്ടായിരിക്കില്ലെന്നും വിജ്ഞാപനത്തിൽ പറയുന്നു.

ALSO READ: വീണ്ടും ബാങ്ക് ഓഫ് ബറോഡയിൽ അവസരം; ഇത്തവണ വൻ ഒഴിവുകൾ, അപേക്ഷക്കേണ്ടത്

പ്രായപരിധിയിലും അഗ്നിവീറുകൾക്ക് ഇളവ് അനുവദിച്ചിട്ടുണ്ട്. ആദ്യ ബാച്ച് അഗ്നിവീറുകൾക്ക് അഞ്ച് വർഷത്തെയും, തുടർന്നുള്ള ബാച്ചുകൾക്ക് മൂന്ന് വർഷത്തെയും ഇളവാണ് ലഭിക്കുക. 1980-ലെ ഡൽഹി പോലീസ് നിയമത്തിൽ ഭേദഗതി വരുത്തിക്കൊണ്ടാണ് വെള്ളിയാഴ്ച പുതിയ ഉത്തരവ് പുറപ്പെടുവിച്ചിരിക്കുന്നത്. അഗ്നിവീറുകൾക്ക് ശാരീരിക അളവുകളിൽ ഇളവുണ്ടാകില്ല. എന്നാൽ ശാരീരിക ക്ഷമതാ പരീക്ഷ (ഓട്ടം, ചാട്ടം തുടങ്ങിയവ) ഒഴിവാകുന്നത് വലിയ ആശ്വാസമാണ്.

എഴുത്തുപരീക്ഷ, ശാരീരിക അളവുകൾ (Physical Measurements) പരിശോധിക്കുന്നതിനുള്ള നടപടിക്രമങ്ങൾ എന്നിവ ഉൾപ്പെടെയുള്ള വിശദമായ റിക്രൂട്ട്‌മെന്റ് നടപടികൾ ഡൽഹി പോലീസ് കമ്മീഷണർ ഉടൻ പുറപ്പെടുവിക്കുമെന്നാണ് പ്രതീക്ഷിക്കുന്നത്. ഇതുവരെ, 100 ശതമാനം നേരിട്ടുള്ള നിയമനത്തിലൂടെയാണ് ഡൽഹി പോലീസ് കോൺസ്റ്റബിൾമാരെ നിയമിച്ചിരുന്നത്. ഈ നിയമത്തിലാണ് ഇപ്പോൾ ഭേദ​ഗതി വരുത്തിയിരിക്കുന്നത്.