K-TET 2026: കെ-ടെറ്റ് പരീക്ഷയ്ക്ക് അപേക്ഷിക്കണോ? സമയം കുറവാണ്; രജിസ്‌ട്രേഷൻ എന്ന് മുതൽ?

Ktet

കേരളത്തിലെ അധ്യാപക യോഗ്യതാ പരീക്ഷയായ കെ-ടെറ്റ് (കെ-ടെറ്റ്) 2026 ലേക്കുള്ള ഔദ്യോഗിക വിജ്ഞാപനം പുറത്ത്. പരീക്ഷാ ഭവനാണ് വിജ്ഞാപനം പുറത്തിറക്കിയത്. സ്കൂൾ അധ്യാപകരാകാൻ ആഗ്രഹിക്കുന്ന ഉദ്യോഗാർത്ഥികൾക്ക് ഫെബ്രുവരി 26 മുതൽ ഓൺലൈനായി അപേക്ഷ സമർപ്പിക്കാം. മാർച്ച് ഏഴ് വരെയാണ് അപേക്ഷിക്കാനുള്ള അവസാന തീയതി.

യോഗ്യരായ താല്പര്യമുള്ള ഉദ്യോഗാർത്ഥികൾക്ക് https://ktet.kerala.gov.in എന്ന ഔദ്യോഗിക വെബ്സൈറ്റ് വഴി ഓൺലൈനായി അപേക്ഷിക്കാം. അപേക്ഷകരുടെ ശ്രദ്ധയ്ക്ക്, നിങ്ങൾ ഒന്നിലധികം കാറ്റഗറികളിലേക്കാണ് അപേക്ഷിക്കുന്നന്നതെങ്കിൽ അതിന് ഓരോന്നിനും പ്രത്യേകം ഫീസ് അടയ്ക്കേണ്ടതുണ്ട്.

ALSO READ: എച്ച്പിസിഎല്ലില്‍ ഗ്രാജ്വേറ്റ് അപ്രന്റീസാകാം; കേരളത്തിലും അവസരം; മികച്ച സ്റ്റൈപന്‍ഡ്‌

ഓരോ കാറ്റഗറിയിലേക്കും (Category 1, 2, 3, 4) അപേക്ഷിക്കാനുള്ള വിദ്യാഭ്യാസ യോഗ്യതകൾ, പരീക്ഷാ രീതി എന്നിവയെക്കുറിച്ചുള്ള വിശദമായ വിവരങ്ങൾ https://ktet.kerala.gov.in, https://pareekshabhavan.kerala.gov.in എന്നീ വെബ്‌സൈറ്റുകളിൽ ലഭ്യമാണ്. രജിസ്‌ട്രേഷൻ ചെയ്യുന്നതിന് മുൻപായി വിജ്ഞാപനത്തിൽ നൽകിയിട്ടുള്ള വിശദമായ മാർ​ഗനിർദ്ദേശങ്ങൾ നിർബന്ധമായും വായിച്ചു മനസ്സിലാക്കുക.

അധ്യാപക നിയമനത്തിന് കെ ടെറ്റ് യോഗ്യത നിർബന്ധമാക്കിയ സുപ്രീം കോടതി വിധിയുടെ പശ്ചാത്തലത്തിലാണ് നടപടി. അധ്യാപക നിയമനങ്ങളിൽ ഗുണനിലവാരം ഉറപ്പാക്കാൻ കെ-ടെറ്റ് യോഗ്യത അനിവാര്യമാണെന്ന സുപ്രീം കോടതി പറഞ്ഞിരുന്നു. ഇതേ തുടർന്ന് ഇതുവരെ യോഗ്യത നേടാത്ത അധ്യാപകർക്ക് രണ്ട് വർഷത്തിനുള്ളിൽ പരീക്ഷ എഴുതിയെടുക്കാനുള്ള സാവകാശം നൽകുമെന്നും വിദ്യാഭ്യാസ മന്ത്രി വി ശിവൻകുട്ടി വ്യക്തമാക്കിയിരുന്നു. അതിനാൽ നിലവിൽ സർവീസിലുള്ള അധ്യാപകർക്കും ഓൺലൈനായി അപേക്ഷിക്കാം.