Kerala New Employment: ഇനി ജോലി തേടി നാടു വിടേണ്ട…. കേരളത്തിൽ പുതിയ തൊഴിൽ വിപ്ലവം വരുന്നു

തിരുവനന്തപുരം: സ്വന്തം നാട്ടിലിരുന്ന് ജോലി ചെയ്ത് അന്താരാഷ്ട്ര നിലവാരത്തിലുള്ള ശമ്പളം സ്വന്തമാക്കാൻ മലയാളി യുവാക്കൾക്ക് അവസരമൊരുങ്ങുന്നു. കേരളത്തിലെ തൊഴിൽ മേഖലയിൽ വലിയ മാറ്റങ്ങൾ ലക്ഷ്യമിട്ടുള്ള പുതിയ പദ്ധതികൾ വരുന്നതായാണ് റിപ്പോർട്ട്. വിദേശ രാജ്യങ്ങളിലെ കമ്പനികൾക്ക് വേണ്ടി കേരളത്തിലിരുന്ന് വിദൂര ജോലി ചെയ്യാനുള്ള സൗകര്യങ്ങൾ വർദ്ധിപ്പിക്കാനാണ് സർക്കാർ ലക്ഷ്യമിടുന്നത്.

ഇത് വിദേശ രാജ്യങ്ങളിലെ ഉയർന്ന ശമ്പളം കേരളത്തിൽ താമസിച്ചുകൊണ്ട് തന്നെ നേടിയെടുക്കാൻ സാധിക്കുന്ന രീതിയിലുള്ള തൊഴിൽ സംസ്കാരത്തിന് പ്രാധാന്യം നൽകുന്നു. ആഗോള വിപണിയിൽ ആവശ്യമായ സാങ്കേതിക വിദ്യകളിൽ കേരളത്തിലെ ഉദ്യോഗാർത്ഥികൾക്ക് പ്രത്യേക പരിശീലനം നൽകുന്നതിനും ഇതിലൂടെ പദ്ധതിയുണ്ട്.

ALSO READ: എസ്എസ്എൽസി മാർക്കിൻ്റെ ശതമാനം എങ്ങനെ കണക്കാക്കാം? ഇതാ എളുപ്പവഴി

കേരള നോളജ് ഇക്കണോമി മിഷന്റെ കീഴിൽ 20 ലക്ഷം പേർക്ക് തൊഴിൽ നൽകാനുള്ള പദ്ധതിയുടെ ഭാഗമായാണ് ഈ നീക്കം. വീട്ടിലിരുന്ന് ജോലി ചെയ്യാൻ ബുദ്ധിമുട്ടുള്ളവർക്കായി എല്ലാ തദ്ദേശ സ്വയംഭരണ സ്ഥാപനങ്ങളിലും അത്യാധുനിക സൗകര്യങ്ങളോട് കൂടിയ വർക്ക് സ്റ്റേഷനുകൾ സ്ഥാപിക്കുന്നുണ്ട്.

നേട്ടങ്ങൾ ഇവയെല്ലാം

ഈ പദ്ധതി പ്രാവർത്തികമായാൽ വിദേശത്തേക്ക് കുടിയേറാതെ തന്നെ കുടുംബത്തോടൊപ്പം നാട്ടിൽ കഴിയാം. ഇതുവഴി കേരളത്തിലെ പ്രാദേശിക സമ്പദ്‌വ്യവസ്ഥയിലേക്ക് വിദേശ പണം നേരിട്ടെത്തുന്നു. ഐടി ഇതര മേഖലകളിലുള്ളവർക്കും ഡിജിറ്റൽ പ്ലാറ്റ്‌ഫോമുകൾ വഴി വരുമാനം കണ്ടെത്താൻ കഴിയുമെന്നതാണ് മറ്റൊരു സവിശേഷത.

ഡിജിറ്റൽ യുഗത്തിലെ സാധ്യതകൾ പ്രയോജനപ്പെടുത്തി കേരളത്തെ ഒരു ഗ്ലോബൽ ടാലന്റ് ഹബ്ബ് ആക്കി മാറ്റാനാണ് ഈ പദ്ധതിയിലൂടെ ലക്ഷ്യമിടുന്നത്. ഉദ്യോഗാർത്ഥികൾക്ക് തങ്ങളുടെ പ്രൊഫൈലുകൾ നോളജ് മിഷൻ പോർട്ടലിൽ രജിസ്റ്റർ ചെയ്ത് ഈ സേവനങ്ങൾ പ്രയോജനപ്പെടുത്താവുന്നതാണ്.