Anna Ben: ‘അന്ന ബെൻ നായരാണോ, അച്ഛൻ്റെ പേര് കേട്ട് ജാതി ചോദിക്കും’; തുറന്നുപറഞ്ഞ് നടി

Anna Ben

കുമ്പളങ്ങി നൈറ്റ്സ് എന്ന ചിത്രത്തിലൂടെ മലയാളി പ്രേക്ഷകരുടെ മനസ് കീഴടക്കിയ നടിയാണ് അന്ന ബെൻ. മലയാള ചിത്രങ്ങൾക്കപ്പുറം തമിഴിലും തെലുങ്കിലുമടക്കം മികച്ച സിനിമകളുടെ ഭാഗമാവാൻ അന്ന ബെന്നിന് സാധിച്ചു. പ്രശസ്ത തിരക്കഥാകൃത്ത് ബെന്നി പി നായരമ്പലത്തിൻ്റെ മകളുകൂടിയാണ് താരം. എന്നാൽ ഇപ്പോൾ തൻ്റെ അച്ഛൻ്റെ പേരിനൊപ്പമുള്ള ‘നായരമ്പലം’ എന്ന പേരിൽ പലരിലും ഉണ്ടാകുന്ന ചില കൺഫ്യൂഷനുകളെ കുറിച്ചാണ് നടി തുറന്നുപറയുന്നത്.

വെണ്ണല തൈക്കാട്ട് മഹാദേവ ക്ഷേത്രത്തിലെ ഒരു ചടങ്ങിൽ അതിഥിയായി എത്തിയപ്പോഴായിരുന്നു അന്ന തൻ്റെ മനസ്സ് തുറന്നത്. “എൻ്റെ അച്ഛൻ്റെ പേര് കേൾക്കുമ്പോൾ എല്ലാവർക്കും ഒരു ചെറിയ കൺഫ്യൂഷനുണ്ട്. അന്ന എന്തിനാണ് അമ്പലത്തിലെ പരിപാടിക്ക് വന്നതെന്ന് ചിലരൊക്കെ ചോദിച്ചു. ബെന്നി പി നായരമ്പലം എന്ന പേരിലെ നായരമ്പലം കേട്ടിട്ട് ഞാൻ നായർ ആണോ എന്ന് ഇടയ്ക്ക് ആളുകൾ ചോദിക്കാറുണ്ട്. എന്നാൽ എൻ്റെ പേര് അന്ന എന്നല്ലേ.

ALSO READ: ‘നീ ഗതികിട്ടാതെ നരകിക്കും, പുഴുത്ത് ചാകും’; ‘അമ്മ’യിൽ നടിമാരുടെ വാക്‌പോര്

അപ്പോൾ എല്ലാം തമ്മിൽ ചേരുന്നില്ലല്ലോ എന്നാണ് പലരും ചിന്തിക്കുന്നത്. ഇനി എൻ്റെ പേര് അന്നപൂർണ്ണ എന്നാണോ എന്ന് വരെ സ്കൂൾ കാലത്ത് പലരും ചോദിച്ചിട്ടുണ്ട്,” അന്ന ബെൻ പറഞ്ഞു. പേരിനൊപ്പമുള്ള സ്ഥലപ്പേര് കണ്ട് ജാതി ചോദിക്കുന്നവർക്ക് അന്ന നൽകിയ രസകരമായ മറുപടിയാണ് ഇപ്പോൾ സമൂഹ മാധ്യമങ്ങളിൽ നിറയുന്നത്.

പി എസ് വിനോദ് രാജ് സംവിധാനം ചെയ്ത കൊട്ടുകാളിയായിരുന്നു അന്ന ബെന്നിൻ്റേതായി ഒടുവിൽ പുറത്തിറങ്ങിയ ചിത്രം. സൂരിയും ചിത്രത്തിൽ പ്രധാന വേഷത്തിലെത്തിയിരുന്നു. മലയാളത്തിൽ കല്ല്യാണിയുടെ ലോകയിൽ ഒരു കാമിയോ വേഷത്തത്തിലും അന്ന ബെൻ എത്തിയിരുന്നു.