Anoop Menon: “കുറെ ഇൻ്റർവ്യൂ കൊടുത്താൽ സിനിമ ഓടുമോ?”: സിനിമ പ്രൊമോഷൻ വിവാദങ്ങളിൽ ആഞ്ഞടിച്ച് അനൂപ് മേനോൻ

Biju Menon And Anoop Menon

സിനിമാ പ്രൊമോഷനുകളിൽ നടൻ ബിജു മേനോൻ സഹകരിക്കുന്നില്ലെന്ന നിർമ്മാതാക്കളുടെ ആരോപണം മലയാള സിനിമയിൽ വലിയ ചർച്ചകൾക്ക് വഴിവെച്ചിരിക്കുകയാണ്. ഇതുമായി ബന്ധപ്പെട്ട് അമ്മ സംഘടന ഇടപെടണമെന്ന് ആവശ്യപ്പെട്ട് പരാതിയും എത്തിയിരുന്നു. ഈ സാഹചര്യത്തിലാണ് പ്രൊമോഷനുകളിലെ പുതിയ രീതികളെ വിമർശിച്ച് നടൻ അനൂപ് മേനോൻ രംഗത്തെത്തിയിരിക്കുന്നത്. തനിനിറം എന്ന സിനിമയുടെ പ്രസ്മീറ്റിനിടെ ആയിരുന്നു അദ്ദേഹം ഇക്കാര്യത്തോട് പ്രതികരിച്ചത്.

ഏഴ് പേർ വട്ടം കൂടിയിരുന്ന് വലിയ ചാനലുകൾക്ക് ഇൻ്റർവ്യൂ നൽകുന്നതാണോ യഥാർത്ഥത്തിൽ പ്രൊമോഷൻ? എഗ്രിമെൻ്റിൽ പ്രൊമോഷനിൽ പങ്കെടുക്കണമെന്ന നിബന്ധന ഉണ്ടാകാറുണ്ട്, അത് പാലിക്കപ്പെടുക തന്നെ വേണം. പക്ഷേ, ഇത്തരം ചർച്ചകൾ കൊണ്ട് മാത്രം ഒരു സിനിമ വിജയം സ്വന്തമാക്കാനാകുമോ?” എന്നും അദ്ദേഹം ചോദിക്കുന്നു. ഒരു സിനിമ എത്രത്തോളം പ്രൊമോട്ട് ചെയ്യപ്പെടുന്നു എന്നതിനേക്കാൾ ആ സിനിമയുടെ ഉള്ളടക്കത്തിനാണ് ‌പ്രാധാന്യം നൽകേണ്ടതെന്നും അനൂപ് വ്യക്തമാക്കി.

ALSO READ: ബിജു മേനോൻ 15 ലക്ഷം രൂപ നിർമ്മാതാവിന് നൽകണം! പ്രൊഡ്യൂസേഴ്സ് അസോസിയേഷൻ

സിനിമ നല്ലതാണെങ്കിൽ പ്രേക്ഷകർ അത് ഏറ്റെടുക്കും. പ്രൊമോഷൻ കൊണ്ട് ഒരു സിനിമ വർക്കാവുമെന്ന് എനിക്ക് തോന്നുന്നില്ല. പഴയ രീതിയിലുള്ള പ്രൊമോഷൻ രീതികളിൽ നിന്നും മാറി ചിന്തിക്കേണ്ട സമയം അതിക്രമിച്ചുവെന്നും, വെറും തമാശകൾക്കും വട്ടം കൂടിയിരുന്നള്ള സംസാരങ്ങൾക്കും അപ്പുറം സിനിമയുടെ ക്രിയാത്മകമായ വശങ്ങളാണ് ചർച്ച ചെയ്യപ്പെടേണ്ടതെന്നും അദ്ദേഹം തൻ്റെ നിലപാടിലൂടെ അറിയിച്ചു.

ഒരു സിനിമ കാണണോ വേണ്ടയോ എന്ന് പ്രേക്ഷകർ തീരുമാനിക്കുന്നത് അതിൻ്റെ ട്രെയിലർ കണ്ടിട്ടാണ്. അതുകൊണ്ട് തന്നെ ആ ട്രെയിലറാണ് പരമാവധി ആളുകളിലേക്ക് എത്തിക്കേണ്ടത്. അതാണ് യഥാർത്ഥ പ്രൊമോഷൻ. വട്ടം കൂടിയിരുന്ന് സംസാരിക്കുന്നത് വഴി ഓൺലൈൻ മാധ്യമങ്ങൾക്ക് അവരുടെ കണ്ടന്റ് ലഭിക്കുമെന്നല്ലാതെ സിനിമയ്ക്ക് പ്രത്യേകിച്ച് ​ഗുണമൊന്നുമില്ലെന്നും അനൂപ് മേനോൻ വ്യക്തമാക്കി.