Karikku Movie: ‘ഇനി അവർ ബിഗ് സ്ക്രീനിലേക്ക്’ ! ആദ്യ സിനിമ പ്രഖ്യാപിച്ച് കരിക്ക് ടീം
Karik Team First Movie Announced:‘കരിക്ക് സ്റ്റുഡിയോസ്’ എന്ന പേരിൽ സിനിമ, വെബ് സീരീസ്, ഒടിടി രംഗങ്ങളിലെല്ലാം സജീവമാകാൻ ഒരുങ്ങുകയാണെന്ന് കരിക്ക് ടീം.
മലയാളികൾക്കിടയിൽ ചുരുങ്ങിയ സമയം കൊണ്ട് തരംഗമായി മാറിയ കരിക്ക് ഇനി ബിഗ് സ്ക്രീനിലേക്ക്. ‘കരിക്ക് സ്റ്റുഡിയോസ്’ എന്ന പേരിലാണ് ചലച്ചിത്ര നിർമാണത്തിലേക്ക് ചുവടുവയ്ക്കുന്നത്.
തീയറ്റർ, വെബ് സീരീസ്, ഒടിടി രംഗങ്ങളിലെല്ലാം സജീവമാകാൻ ഒരുങ്ങുകയാണെന്ന് ടീം. ചിത്രത്തിന്റെ പ്രഖ്യാപനം തങ്ങളുടെ യൂട്യൂബ് ചാനലിലൂടെയാണ് നടത്തിയത്.കഴിഞ്ഞ ദിവസം ഇതിന്റെ പ്രഖ്യാപനം ഉടൻ ഉണ്ടാകുമെന്ന് അറിയിച്ചു കൊണ്ട് ഇവർ ഒരു പോസ്റ്റ് ഇൻസ്റ്റാഗ്രാമിൽ പങ്കുവച്ചിരുന്നു.
തിയേറ്ററുകളിലേക്കും ഒടിടി പ്ലാറ്റ്ഫോമുകൾക്കുമായി സിനിമകളും വെബ് സീരീസുകളും നിർമ്മിക്കുന്നതിനായി ‘കരിക്ക് സ്റ്റുഡിയോസ്’ എന്ന ഇടം ആരംഭിക്കുന്നതായി സന്തോഷപൂർവം അറിയിക്കുന്നുവെന്ന് പറഞ്ഞായിരുന്നു പോസ്റ്റ്. വർഷങ്ങളായി നിങ്ങൾ നൽകിയ അവിശ്വസനീയമായ സ്നേഹവും പിന്തുണയും ഇല്ലായിരുന്നെങ്കിൽ ഈ സ്വപ്നം സാധ്യമാകുമായിരുന്നില്ല. ചലച്ചിത്രനിർമ്മാണത്തിലേക്ക് നടത്തുന്ന ഈ ആവേശകരമായ കുതിപ്പിൽ, നിങ്ങളുടെ തുടർന്നുള്ള പ്രോത്സാഹനവും അനുഗ്രഹങ്ങളും ഞങ്ങൾ പ്രതീക്ഷിക്കുന്നുവെന്നും കുറിപ്പിൽ പറയുന്നു.
അനു കെ അനിയൻ, ശബരീഷ് സജ്ജൻ, ജീവൻ മാമ്മൻ സ്റ്റീഫൻ, ആനന്ദ് മാത്യൂസ്, ജോർജ്ജ് കോര തുടങ്ങി മികച്ച പ്രകടനം കാഴ്ചവെക്കുന്ന നിരവധി അഭിനേതാക്കൾ കരിക്ക് ടീമിലുണ്ട്. ഇവരെ ബിഗ് സ്ക്രീനിൽ അധികം വൈകാതെ കാണാൻ പറ്റുമെന്ന ആകാംഷയിലാണ് ആരാധകർ. കരിക്ക് സ്റ്റുഡിയോസിൻ്റെ ആദ്യ ചിത്രം ഈ വർഷം അവസാനത്തോടെ നിർമ്മാണം ആരംഭിക്കുമെന്നും, ഡോ. അനന്തു പ്രൊഡക്ഷൻസ് ആണ് സഹനിർമ്മാതാവ്.
