Major Ravi: ഞാൻ എംഎൽഎ ആയാൽ ശമ്പളം വാങ്ങില്ല, പാവപ്പെട്ട പെൺകുട്ടികളുടെ വിവാഹം നടത്തും; മേജർ രവി

നടനായും സംവിധായകനായും രാജ്യത്തിൻ്റെ ശക്തരായ കാവൽക്കാരായ പട്ടാളക്കാരനെന്ന നിലയിലും മേജർ രവിയെ അറിയാത്തവരായി ആരുമില്ല. രാജ്യത്തിൻ്റെ കാവൽക്കാരനായിരുന്ന മേജർ രവി ജീവിതത്തിൽ നേരിട്ട അനുഭവങ്ങൾ സിനിമയിലൂടെ നമുക്ക് കാണിച്ചു തന്നെ വ്യക്തിയാണ് അദ്ദേഹം. ഇന്നിതാ സിനിമയിലെയും സൈന്യത്തിലെയും പോരാട്ടവീര്യവുമായി രാഷ്ട്രീയ ഗോദയിൽ സജീവമായിരിക്കുകയാണ് മേജർ രവി.

വരാനിരിക്കുന്ന നിയമസഭാ തെരഞ്ഞെടുപ്പിൽ ഒറ്റപ്പാലത്തെ എൻഡിഎ സ്ഥാനാർത്ഥിയാണ് മേജർ രവി. ഒരു പട്ടാളക്കാരൻ്റെ കരുത്തോടെ ജനങ്ങളെ സേവിക്കുമെന്നും ഒറ്റപ്പാലത്തിൻ്റെ വികസനത്തിനായി അത്യാധുനിക സാങ്കേതികവിദ്യകൾ പ്രയോജനപ്പെടുത്തുമെന്നും രാഷ്ട്രീയ ജീവിതത്തിലേക്ക് ഇറങ്ങുമ്പോൾ പറഞ്ഞിരുന്നു. ശത്രു ശക്തനാണെങ്കിൽ ഒരു പട്ടാളക്കാരൻറെ പോരാട്ടവീര്യം കൂടുമെന്നാണ് മേജർ രവിയുടെ നിലപാട്.

ALSO READ: ഒരുപാട് സ്നേഹം വേടൻ… സഞ്ജുവിന്റെ ഓട്ടോഗ്രാഫ് വാങ്ങാൻ വേടൻ എത്തി

ഇപ്പോഴിതാ അദ്ദേഹം ഓൺലൈൻ മീഡിയകൾക്ക് നൽകിയ അഭിമുഖമാണ് വൈറലാകുന്നത്. ഞാൻ എംഎൽഎ ആയാൽ ശമ്പളം വാങ്ങില്ലെന്നും, ആ പണം ഉപയോ​ഗിച്ച് പാവപ്പെട്ട പെൺകുട്ടികളുടെ വിവാഹം നടത്തുമെന്നുമാണ് അദ്ദേഹം പറഞ്ഞിരിക്കുന്നത്. തൻ്റെ വലിയ മനസ്സിനെ പിന്തുണച്ചുകൊണ്ടും അതുപോലെ തന്നെ വിമർശിച്ചുകൊണ്ടും നിരവധി ആളുകൾ വീഡിയോയ്ക്ക് താഴെ കമൻ്റുമായി എത്തുന്നുണ്ട്. അദ്ദേഹം പറഞ്ഞ വാക്കുകൾ പരിശോധിക്കാം.

മേജർ രവിയുടെ വാക്കുകളിലൂടെ

വീണ്ടും പറയുകയാണ് ഞാൻ ശമ്പളം വാങ്ങിക്കാത്ത ഒരു എംഎൽഎ ആയിരിക്കും. എംഎൽഎ ആയാൽ പഞ്ചായത്ത് തലത്തിൽ ആദ്യം ഒരു കമ്മിറ്റി രൂപീകരിക്കും. ഓരോ വർഷത്തിലും ഓരോ പഞ്ചായത്തിൽ നിന്നുള്ള ഏറ്റവും പാവപ്പെട്ട പെൺകുട്ടിയുടെ വിവാഹം ജനകീയമായി തന്നെ നടത്തും. അതിനായിട്ട് ഞാൻ എൻ്റെ ശമ്പളം മാറ്റിവയ്ക്കും. അതെൻ്റെ ഉറപ്പാണ്… എന്നാണ് മേജർ രവി പറഞ്ഞത്.