T G Ravi: സ്വയം നിർമിച്ച സിനിമയിൽത്തന്നെ വില്ലൻവേഷം, അലവലാതി ഷാജി… ടി.ജി രവിയുടെ സിനിമായാത്രയ്ക്ക് അമ്പതാണ്ട്
T. G. Ravi's 50 Years in Cinema: അലവലാതി ഷാജി' പോലുള്ള കഥാപാത്രങ്ങൾ ഇപ്പോഴും ട്രോളുകളിൽ നിറയുന്നത് തൻ്റെ അഭിനയത്തിനുള്ള അംഗീകാരമായാണ് അദ്ദേഹം കാണുന്നത്.
തൃശ്ശൂർ: മലയാള സിനിമയിലെ ക്രൂരനായ വില്ലൻ എന്ന ഇമേജ് പതിറ്റാണ്ടുകളോളം സ്വന്തമാക്കിയ ടി.ജി. രവിക്ക് അഭിനയ ജീവിതത്തിൽ അരനൂറ്റാണ്ട്. 81 വയസ്സുകാരനായ തൃശ്ശൂർക്കാരനായ അദ്ദേഹം മുന്നൂറിലധികം കഥാപാത്രങ്ങൾക്ക് ഇതിനോടകം ജീവൻ നൽകി. ആറാം വയസ്സിൽ നാടകത്തിലൂടെ കലാരംഗത്ത് എത്തിയ രവി, 1974-ൽ ജി. അരവിന്ദന്റെ ‘ഉത്തരായണം’ എന്ന ചിത്രത്തിലൂടെയാണ് സിനിമയിലെത്തിയത്.
ഒരു നടനെന്ന ഇമേജ് ഉറപ്പിക്കാനായി അദ്ദേഹം നിർമ്മിച്ച ചിത്രങ്ങൾ സാമ്പത്തികമായി പരാജയപ്പെട്ടെങ്കിലും, ‘ചാകര’ ഹിറ്റായി. ‘പറങ്കിമലയിലെ വില്ലൻ വേഷത്തിലൂടെ ടി.ജി. രവി മലയാളിയുടെ മനസ്സിൽ വില്ലൻ പരിവേഷം ഉറപ്പിച്ചു. 70-80 കാലഘട്ടത്തിൽ അദ്ദേഹത്തെ നേരിൽ കാണുമ്പോൾ സ്ത്രീകൾ പോലും ഭയന്ന് മാറിനടന്നിരുന്നു.
വില്ലൻ കഥാപാത്രങ്ങൾ തുടർച്ചയായി ചെയ്തപ്പോൾ പലപ്പോഴും കുറ്റവാളിയെപ്പോലെ മാറ്റിനിർത്തപ്പെട്ട അനുഭവങ്ങളുണ്ടായി. എന്നാൽ ‘അലവലാതി ഷാജി’ പോലുള്ള കഥാപാത്രങ്ങൾ ഇപ്പോഴും ട്രോളുകളിൽ നിറയുന്നത് തൻ്റെ അഭിനയത്തിനുള്ള അംഗീകാരമായാണ് അദ്ദേഹം കാണുന്നത്.
എൻജിനീയർ, സംരംഭകൻ, കൊച്ചിൻ ദേവസ്വം ബോർഡ് പ്രസിഡന്റ് എന്നീ നിലകളിലും വ്യക്തിമുദ്ര പതിപ്പിച്ച ടി.ജി. രവിയുടെ ഇളയ മകൻ നടൻ ശ്രീജിത്ത് രവിയാണ്. ദരിദ്ര കുടുംബത്തിലെ പെൺകുട്ടികളുടെ അച്ഛൻ വേഷങ്ങൾ ചെയ്യുന്നത് പണ്ട് ചെയ്ത വില്ലൻ കഥാപാത്രങ്ങൾക്കുള്ള പരിഹാരമായി തോന്നുന്നു എന്ന് അദ്ദേഹം തമാശയായി പറയുന്നു. പ്രായത്തെ തോൽപ്പിച്ച് അദ്ദേഹം ഇപ്പോഴും സിനിമയിൽ സജീവമായി തുടരുന്നു.
