Thudarum Pirated Copy: ‘തുടരും’ സിനിമയുടെ വ്യാജപതിപ്പ് ഇന്റര്നെറ്റില്, ഒപ്പം മറ്റ് പുതിയ സിനിമകളും
Thudarum Pirated Copy Spreads Online : കഴിഞ്ഞ ദിവസമാണ് സിനിമ 100 കോടി ക്ലബ്ബിൽ ഇടം നേടിയതിന്റെ സന്തോഷം ചിത്രത്തിന്റെ അണിയറ പ്രവർത്തകർ പങ്കുവെച്ചത്. അതിനിടെ വ്യാജപതിപ്പ് പുറത്തിറങ്ങിയത് അണിയറപ്രവര്ത്തകരിലും സിനിമാലോകത്തും ആശങ്ക ഉയർത്തുകയാണ്.
മോഹൻലാൽ നായകനായ ‘തുടരും’ സിനിമയുടെ വ്യാജപതിപ്പും ഇന്റർനെറ്റിൽ. അടുത്തിടെ പുറത്തിറങ്ങിയ നിരവധി മലയാള ചിത്രങ്ങളുടെ വ്യാജപതിപ്പുകള് പുറത്തുവന്നിരുന്നു. ഇതിന് പിന്നാലെയാണ് ഇപ്പോള് മികച്ച പ്രതികരണങ്ങളോടെ തീയേറ്ററിൽ പ്രദർശനം തുടരുന്ന ‘തുടരും’ സിനിമയുടെ വ്യാജപതിപ്പ് പുറത്തിറങ്ങിയിരിക്കുന്നത്.
കഴിഞ്ഞ ദിവസമാണ് സിനിമ 100 കോടി ക്ലബ്ബിൽ ഇടം നേടിയതിന്റെ സന്തോഷം ചിത്രത്തിന്റെ അണിയറ പ്രവർത്തകർ പങ്കുവെച്ചത്. അതിനിടെ വ്യാജപതിപ്പ് പുറത്തിറങ്ങിയത് അണിയറപ്രവര്ത്തകരിലും സിനിമാലോകത്തും ആശങ്ക ഉയർത്തുകയാണ്. വ്യാജപതിപ്പിനെതിരെ നിയമനടപടികളുമായി മുന്നോട്ടുപോകുമെന്ന് സിനിമയുടെ നിര്മാതാക്കള് അറിയിച്ചിട്ടുണ്ട്.
ഒരു വെബ്സൈറ്റിലൂടെയാണ് ‘തുടരും’ സിനിമയുടെ വ്യാജപതിപ്പ് പുറത്തു വന്നിരിക്കുന്നത്. ഇതിന്റെ വീഡിയോയും ഇപ്പോള് സമൂഹ മാധ്യമങ്ങളിൽ പ്രചരിക്കുന്നുണ്ട്. വീഡിയോയിൽ മറ്റ് നിരവധി മലയാള ചിത്രങ്ങളുടെയും വ്യാജപതിപ്പുകള് കാണാന് സാധിക്കും. അടുത്തിടെ ഒടിടിയില് സ്ട്രീമിങ് ആരംഭിച്ച ചിത്രങ്ങളും ഇതിൽ ഉൾപ്പെടുന്നു. ടെലഗ്രാം ഗ്രൂപ്പുകളിലും ഈ ചിത്രങ്ങളുടെ വ്യാജപതിപ്പുകള് പ്രചരിക്കാന് തുടങ്ങിയിട്ടുണ്ടെന്നാണ് വിവരം. നേരത്തെ എമ്പുരാന്, മാര്ക്കോ തുടങ്ങിയ ചിത്രങ്ങളുടെ വ്യാജപതിപ്പുകളും റിലീസിന് തൊട്ടടുത്ത ദിവസങ്ങളിലായി പുറത്തുവന്നിരുന്നു.
ഇത്തരത്തിൽ പുതിയ സിനിമകളുടെ വ്യാജപതിപ്പുകൾ പ്രചരിക്കുന്നത് തടയാൻ ശക്തമായ നടപടി സ്വീകരിക്കുമെന്ന് കേരള ഫിലിം പ്രൊഡ്യൂസേഴ്സ് അസോസിയേഷന് അടുത്തിടെ അറിയിച്ചിരുന്നു. ഇതിന്റെ ഭാഗമായി നിയമസംരക്ഷണ സംവിധാനങ്ങളോടൊപ്പം പ്രൊഫഷണല് എത്തിക്കല് ഹാക്കര്മാരുടെ ഒരു പ്രത്യേക സംഘത്തെയും അസോസിയേഷന് ചുമതലപ്പെടുത്തിയതായാണ് അറിയിച്ചിരുന്നത്. സിനിമകളുടെ വ്യാജപതിപ്പുകൾ കാണുന്നതും, പങ്കിടുന്നതും സൈബര് കുറ്റകൃത്യവും കോപ്പിറൈറ്റ് ലംഘനവും ആണെന്ന് പറഞ്ഞ സംഘടന ഇത്തരം പ്രവൃത്തികളില് ഏര്പ്പെടുന്നവര്ക്ക് ജയില് ശിക്ഷ അടക്കമുള്ള കര്ശനമായ നിയമനടപടികള് നേരിടേണ്ടി വരുമെന്നും മുന്നറിയിപ്പ് നൽകിയിരുന്നു.
‘തുടരും’ സിനിമ
മോഹൻലാലിനെ നായകനാക്കി തരുൺ മൂർത്തി സംവിധാനം ചെയ്ത ‘തുടരും’ ഏപ്രിൽ 25നാണ് തീയേറ്ററുകളിൽ എത്തിയത്. റിലീസായി അഞ്ച് നാളുകൾക്കുള്ളിൽ തന്നെ ചിത്രം 100 കോടി ക്ലബ്ബിലും ഇടം നേടി. മോഹൻലാലിന് പുറമെ ചിത്രത്തിൽ ബിനു പപ്പു, ഫർഹാൻ ഫാസിൽ, മണിയൻപിള്ള രാജു എന്നിവര്ക്കൊപ്പം നിരവധി പുതുമുഖങ്ങളും അണിനിരക്കുന്നു. രജപുത്ര വിഷ്വൽ മീഡിയയുടെ ബാനറിൽ എം രഞ്ജിത്ത് ആണ് നിർമ്മാണം. ഷാജി കുമാർ ഛായാഗ്രഹണവും നിഷാദ് യൂസുഫ്, ഷെഫീഖ് വി ബി, എന്നിവർ ചേർന്ന് എഡിറ്റിങ്ങും നിർവഹിച്ചു, സംഗീതം ജേക്സ് ബിജോയാണ്.
