ഓൺലൈൻ പ്രണയത്തിൽ വൻ ട്വിസ്റ്റ്; ഇന്ത്യയിലെത്തിയ കനേഡിയൻ വനിതയെ കൈവിട്ട് കാമുകൻ; ഒടുവിൽ എംബസിയുടെ ഇടപെടൽ!

പ്രതീകാത്മക ചിത്രം

നീമ്രാന: ഡേറ്റിംഗ് ആപ്പിലൂടെ പരിചയപ്പെട്ട കാമുകനെ വിവാഹം കഴിക്കാനായി കാനഡയിൽ നിന്നും ആയിരക്കണക്കിന് കിലോമീറ്ററുകൾ താണ്ടി ഇന്ത്യയിലെത്തിയ സ്ത്രീക്ക് ഒടുവിൽ നിരാശ. ഒന്നിച്ച് ജീവിക്കാൻ തീരുമാനിച്ചുറപ്പിച്ച് എത്തിയ കാമുകിയുടെ യഥാർത്ഥ പ്രായം അറിഞ്ഞതോടെ യുവാവ് വിവാഹത്തിൽ നിന്ന് പിന്മാറുകയായിരുന്നു. തുടർന്ന് കനേഡിയൻ എംബസിയുടെ ഇടപെടലിനെത്തുടർന്ന് രാജസ്ഥാൻ പോലീസ് സംഭവത്തിൽ കേസെടുത്ത് അന്വേഷണം ആരംഭിച്ചു. രാജസ്ഥാനിലെ കോട്പുത്ലി-ബെഹ്‌റോർ ജില്ലയിലെ നീമ്രാനയിലാണ് നാടകീയമായ ഈ സംഭവങ്ങൾ അരങ്ങേറിയത്.

ഹരിയാനയിലെ പാനിപ്പത്ത് സ്വദേശിയായ നിതിൻ എന്ന യുവാവിനെയാണ് കനേഡിയൻ സ്വദേശിയായ യുവതി ഡേറ്റിംഗ് ആപ്പ് വഴി പരിചയപ്പെട്ടത്. ഒരു വർഷം മുമ്പാണ് ഇവർ തമ്മിലുള്ള ബന്ധം ആരംഭിക്കുന്നത്. ഈ സൗഹൃദം പിന്നീട് പ്രണയമായി മാറുകയും ഇരുവരും വിവാഹം കഴിക്കാൻ തീരുമാനിക്കുകയുമായിരുന്നു. ഈ തീരുമാനത്തിൻ്റെ അടിസ്ഥാനത്തിൽ ടൂറിസ്റ്റ് വിസയിൽ ഇന്ത്യയിലേക്ക് തിരിച്ച യുവതി നവംബർ 11-നാണ് ഡൽഹി വിമാനത്താവളത്തിൽ എത്തിയത്.

ഡൽഹിയിലെത്തിയ യുവതിയെ കൂട്ടിക്കൊണ്ടുവരാൻ നിതിൻ നേരിട്ട് വിമാനത്താവളത്തിൽ എത്തിയിരുന്നു. തുടർന്ന് ഇയാൾ ഇവരെ രാജസ്ഥാനിലെ നീമ്രാനയിലുള്ള തൻ്റെ അമ്മാവൻ്റെ ഫ്ലാറ്റിലേക്ക് കൊണ്ടുപോയി. ഇവിടെ രണ്ട് ദിവസത്തോളം ഇരുവരും ഒരുമിച്ച് താമസിച്ചു. ഇതിനിടയിൽ വിവാഹവുമായി ബന്ധപ്പെട്ട കാര്യങ്ങൾ സംസാരിക്കുകയും ചെയ്തു. എന്നാൽ ഇതിനിടയിലാണ് കാമുകിയുടെ യഥാർത്ഥ പ്രായം 61 വയസ്സാണെന്ന വിവരം നിതിൻ അറിയുന്നത്. ഇതോടെ നിതിൻ വിവാഹത്തിൽ നിന്ന് പിന്മാറുകയാണെന്ന് അറിയിച്ചു. ഇത് ഇരുവരും തമ്മിൽ വലിയ വാക്കുതർക്കങ്ങൾക്ക് കാരണമാവുകയും ചെയ്തു.

Also Read: ബാക്കി സ്വർണം എവിടെ? പിന്നിൽ ഇൻഫ്ലുവൻസർ , 15 കിലോ മോഷണത്തിൽ തെളിയാൻ

യുവാവ് വിവാഹത്തിന് വിസമ്മതിച്ചതോടെ യുവതി നവംബർ 13-ന് കനേഡിയൻ എംബസിയുമായി ബന്ധപ്പെടുകയും കാര്യങ്ങൾ വിശദീകരിക്കുകയും ചെയ്തു. എംബസിയിൽ നിന്നുള്ള നിർദ്ദേശപ്രകാരം നീമ്രാന പോലീസ് ഉടൻ തന്നെ താമസസ്ഥലത്തെത്തി ഇരുവരെയും പോലീസ് സ്റ്റേഷനിലേക്ക് കൊണ്ടുപോയി. നിലവിൽ ചോദ്യം ചെയ്യുന്നതിനായി പോലീസ് നിതിനെ കസ്റ്റഡിയിലെടുത്തിട്ടുണ്ട്. കനേഡിയൻ യുവതിക്ക് കോട്പുത്ലിയിലെ കോർ സെൻ്ററിൽ സുരക്ഷിതമായ താമസസൗകര്യവും ഒരുക്കിയിട്ടുണ്ട്.

ഹരിയാനയിലെ പാനിപ്പത്ത് സ്വദേശിയായ നിതിൻ ഒരു സ്വകാര്യ സ്കൂളിലെ അധ്യാപകനായി ജോലി ചെയ്തുവരികയായിരുന്നു. സംഭവത്തിൽ കൂടുതൽ വിവരങ്ങൾ ശേഖരിച്ചുവരികയാണെന്നും, യുവാവിനെ വിശദമായി ചോദ്യം ചെയ്ത ശേഷം തുടർനടപടികൾ സ്വീകരിക്കുമെന്നും നീമ്രാന സ്റ്റേഷൻ ഹൗസ് ഓഫീസർ സുരേന്ദ്ര യാദവ് വ്യക്തമാക്കി.

English Summary

A 61-year-old Canadian woman travelled to India to marry a man she met on a dating app. The man backed out after discovering her age, prompting police and embassy intervention.