പവർ ബാങ്കിൽ നിന്ന് തീപടർന്നു, ഡൽഹി-ചെന്നൈ ഇൻഡിഗോ വിമാനം ഹൈദരാബാദിൽ അടിയന്തരമായി ഇറക്കി

ഹൈദരാബാദ്: ഡൽഹിയിൽ നിന്ന് ചെന്നൈയിലേക്ക് പോവുകയായിരുന്ന വിമാനം ഹൈദരാബിദിൽ എമർജെൻസി ലാന്റിം​ഗ് നടത്തി. വിമാനത്തിനുള്ളിൽ തീ പടർന്നതിനെ തുടർന്നാണ് അടിയന്തരയമായി നിലത്തിറക്കിയത്. റിപ്പോർട്ടുകൾ പ്രകാരം, യാത്രക്കാരിലൊരാളുടെ പവർ ബാങ്കിൽ നിന്നാണ് തീ പടർന്നത്. അപ്രതീക്ഷിതമായി ഉണ്ടായ സംഭത്തിൽ യാത്രക്കാരാകെ പരിഭ്രാന്തിയിലായി. വിഷയം ശ്രദ്ധയിൽപ്പെട്ട ഉടൻ തന്നെ വിമാനജീവനക്കാർ വേഗത്തിൽ ഇടപെട്ട് തീ നിയന്ത്രണവിധേയമാക്കി എന്നാണ് അറിയുന്നത്.

പ്രത്യേക സാഹചര്യത്തെ തുടർന്ന് സുരക്ഷാ മുൻകരുതൽ എന്ന നിലയിലാണ് വിമാനം ഹൈദരാബാദിലെ ഷംഷാബാദ് വിമാനത്താവളത്തിൽ അടിയന്തരമായി ഇറക്കിയത്. വിമാന ജീവനക്കാരുടെ സമയോചിതമായ ഇടപെടലിനെത്തുടർന്ന് അപകട സാഹചര്യം നിയന്ത്രണവിധേയമാക്കാൻ കഴിഞ്ഞു. വിമാനത്തിലുണ്ടായിരുന്ന എല്ലാ യാത്രക്കാരും സുരക്ഷിതരാണെന്നാണ് പ്രാഥമിക റിപ്പോർട്ടുകൾ വരുന്നത്.