Shikha Maitreya : കുട്ടികളെ ലൈംഗികമായി ഉപദ്രവിക്കാനുള്ള മാർഗങ്ങൾ വിശദീകരിച്ച് യൂട്യൂബ് വീഡിയോ; യുവതി അറസ്റ്റിൽ
Shikha Maitreya : കുട്ടികളെ ലൈംഗികമായി ഉപദ്രവിക്കാനുള്ള മാർഗങ്ങൾ വിശദീകരിച്ച് യൂട്യൂബ് വീഡിയോ ചെയ്ത യുവതി അറസ്റ്റിൽ. ഉത്തർപ്രദേശിലെ ഗാസിയാബാദ് സ്വദേശിനിയായ 25 വയസുകാരി ശിഖ മൈത്രേയയെയാണ് പൊലീസ് അറസ്റ്റ് ചെയ്തത്.
കുട്ടികളെ ലൈംഗികമായി ഉപദ്രവിക്കാനുള്ള മാർഗങ്ങൾ വിശദീകരിച്ച് വീഡിയോ പോസ്റ്റ് ചെയ്ത യൂട്യൂബർ അറസ്റ്റിൽ. ഉത്തർപ്രദേശിലെ ഗാസിയാബാദ് സ്വദേശിനി ശിഖ മൈത്രേയ എന്ന യുവതിയെയാണ് പൊലീസ് അറസ്റ്റ് ചെയ്തത്. കുൻവാരി ബീഗം എന്ന തൻ്റെ യൂട്യൂബ് ചാനലിൽ ശിഖ പോസ്റ്റ് ചെയ്ത വിഡിയോ എക്സ് പ്ലാറ്റ്ഫോമിൽ പ്രചരിച്ചിരുന്നു. ഇതിനു പിന്നാലെയാണ് പൊലീസ് നടപടിയെടുത്തത്.
ഏകം ന്യായ് ഫൗണ്ടേഷൻ സ്ഥാപകനും സ്വതന്ത്ര മാധ്യമപ്രവർത്തകനുമായ നാരായൺ ഭരദ്വാജിൻ്റെ പരാതിയിലാണ് 25കാരിയായ ശിഖ അറസ്റ്റിലായത്. ശിഖയുടെ ചാനലിലെ അശ്ലീല ഉള്ളടക്കങ്ങളും കുട്ടികളെ ലൈംഗികമായി ഉപദ്രവിക്കുന്നതിനെ ന്യായീകരിച്ച് ചെയ്ത വീഡിയോകളും നാരായൺ ഭരദ്വാജ് എക്സ് പ്ലാറ്റ്ഫോമിൽ പങ്കുവച്ചു. യുവതിയ്ക്കെതിരെ നടപടിയെടുക്കണമെന്നും ഇദ്ദേഹം ആവശ്യപ്പെട്ടു. പിന്നാലെ ശിഖയ്ക്കെതിരെ പൊലീസ് കേസെടുക്കുകയും അറസ്റ്റ് ചെയ്യുകയുമായിരുന്നു. ചോദ്യം ചെയ്യലിൽ ശിഖ കുറ്റം സമ്മതിച്ചതായി പൊലീസ് അറിയിച്ചു. സ്വയംഭോഗത്തെപ്പറ്റി സബ്സ്ക്രൈബേഴ്സ് ചോദിച്ചതോടെയാണ് താൻ ഇത്തരത്തിലുള്ള വീഡിയോകൾ പോസ്റ്റ് ചെയ്യാൻ തുടങ്ങിയതെന്ന് ശിഖ പറഞ്ഞു എന്നും പൊലീസ് അറിയിച്ചു. ശിഖയെ ജയിലിലടക്കണമെന്ന് മറ്റ് യൂട്യൂബേഴ്സ് ആവശ്യപ്പെടുന്നുണ്ട്. ഇതിനായി ‘ജയിൽ ഭേജോ’ എന്ന ക്യാമ്പയിനും ആരംഭിച്ചു. ശിഖയുടെ മാതാപിതാക്കളെയും പൊലീസ് ചോദ്യം ചെയ്യാനൊരുങ്ങുകയാണ്. ശിഖ നീക്കം ചെയ്തെങ്കിലും ഇൻ്റർനെറ്റിൽ പല വീഡിയോകളും പ്രചരിക്കുന്നുണ്ട്. ഈ വീഡിയോകൾ പൂർണമായി നീക്കം ചെയ്യാനുള്ള നടപടികൾക്കാണ് നിലവിൽ പൊലീസ് ശ്രമിക്കുന്നത്.
ഡൽഹി നാഷണൽ ഇൻസ്റ്റിറ്റ്യൂട്ട് ഓഫ് ഫാഷൻ ടെക്നോളജിയിൽ (നിഫ്റ്റ്) നിന്ന് ബിരുദം നേടിയ ശിഖ ഡൽഹിയിലെ ഒരു കമ്പനിയിൽ ജോലി ചെയ്യുകയായിരുന്നു. വീഡിയോ വൈറലായെന്നും പൊലീസ് കേസെടുക്കാൻ സാധ്യതയുണ്ടെന്നും അറിഞ്ഞയുടൻ തൻ്റെ ചാനലിലെ വീഡിയോകളെല്ലാം ശിഖ പ്രൈവറ്റ് ആക്കി. തുടർന്ന് ഓരോ വീഡിയോകളായി നീക്കം ചെയ്തു. പിന്നാലെ, തൻ്റെ എല്ലാ സോഷ്യൽ മീഡിയ അക്കൗണ്ടുകളും ഇവർ ഡിആക്ടിവേറ്റ് ചെയ്തു. ചാനലിലെ വീഡിയോകളിലൂടെ ലൈംഗിക ചേഷ്ടകൾക്ക് ആളുടെ പ്രചോദിപ്പിക്കുകയാണ് ശിഖ ചെയ്തിരുന്നത്. നവജാത ശിശുക്കളിൽ ഇത് പരീക്ഷിക്കാൻ ഒരു വീഡിയോയിൽ ഇവർ ആവശ്യപ്പെട്ടിരുന്നു. 2050 സബ്സ്ക്രൈബേഴ്സും 115 വീഡിയോകളുമാണ് ചാനലിൽ ഉണ്ടായിരുന്നു. യൂട്യൂബ് കൂടാതെ, ഇൻസ്റ്റഗ്രാമിലും ശിഖയ്ക്ക് ഒരു അക്കൗണ്ടുണ്ട്.
