Vande Bharat Train Kerala : വന്ദേഭാരതിന്റെ വലിപ്പം കൂട്ടാനൊരുങ്ങി റെയിൽവേ… പുതിയ മാറ്റങ്ങൾ ഇവയെല്ലാം
യാത്രക്കാരുടെ എണ്ണം വര്‍ധിക്കുന്നതനുസരിച്ച് ട്രെയിനുകളില്‍ കൂടുതല്‍ കോച്ചുകള്‍ ഉള്‍പ്പെടുത്തുന്നതിലൂടെ യാത്രക്കാര്‍ക്ക് മെച്ചപ്പെട്ട യാത്രാനുഭവം നല്‍കാനാണ് റെയില്‍വേ ലക്ഷ്യമിടുന്നത്.
Vande Bharat
ന്യൂഡല്‍ഹി: യാത്രക്കാരുടെ തിരക്ക് പരിഗണിച്ച് മംഗളൂരു സെന്‍ട്രല്‍-തിരുവനന്തപുരം വന്ദേഭാരത് എക്‌സ്പ്രസ് ട്രെയിനിന്റെ (ട്രെയിന്‍ നമ്പര്‍ 20631/32) കോച്ചുകളുടെ എണ്ണം വര്‍ധിപ്പിച്ചതായി റെയില്‍വേ അറിയിച്ചു. നിലവിലുള്ള 16 കോച്ചുകള്‍ക്ക് പകരം ഇനിമുതല്‍ 20 കോച്ചുകളാകും ഈ റൂട്ടില്‍ സര്‍വീസ് നടത്തുക. ഇത് യാത്രക്കാര്‍ക്ക് കൂടുതല്‍ സീറ്റുകളും സൗകര്യങ്ങളും ഉറപ്പാക്കും. രാജ്യത്തെ ഏഴ് പ്രധാന റൂട്ടുകളിലെ വന്ദേഭാരത് ട്രെയിനുകളുടെ കോച്ചുകള്‍ വര്‍ധിപ്പിക്കാനുള്ള റെയില്‍വേയുടെ തീരുമാനത്തിന്റെ ഭാഗമായാണ് ഈ നടപടി.
കൂടുതല്‍ റൂട്ടുകളില്‍ വര്‍ധനവ്
മംഗളൂരു സെന്‍ട്രല്‍-തിരുവനന്തപുരം റൂട്ടിന് പുറമേ, മറ്റ് ആറ് റൂട്ടുകളിലും കോച്ചുകളുടെ എണ്ണം വര്‍ധിപ്പിക്കാന്‍ റെയില്‍വേ തീരുമാനിച്ചിട്ടുണ്ട്. യാത്രക്കാരുടെ എണ്ണം കൂടുതലുള്ള റൂട്ടുകളില്‍ വന്ദേഭാരത് ട്രെയിനുകള്‍ക്ക് വലിയ സ്വീകാര്യത ലഭിച്ച സാഹചര്യത്തിലാണ് റെയില്‍വേയുടെ ഈ നീക്കം.
കോച്ചുകള്‍ വര്‍ധിപ്പിക്കുന്ന മറ്റ് റൂട്ടുകള്‍ ഇവയാണ്
- സെക്കന്തരാബാദ്-തിരുപ്പതി
- ചെന്നൈ എഗ്മോര്‍-തിരുനെല്‍വേലി
- മധുര-ബെംഗളൂരു കന്റോണ്‍മെന്റ്
- ദേവ്ഘര്‍-വാരാണസി
- ഹൗറ-റൂര്‍ക്കേല
- ഇന്‍ഡോര്‍-നാഗ്പുര്‍
യാത്രക്കാരുടെ എണ്ണം വര്‍ധിക്കുന്നതനുസരിച്ച് ട്രെയിനുകളില്‍ കൂടുതല്‍ കോച്ചുകള്‍ ഉള്‍പ്പെടുത്തുന്നതിലൂടെ യാത്രക്കാര്‍ക്ക് മെച്ചപ്പെട്ട യാത്രാനുഭവം നല്‍കാനാണ് റെയില്‍വേ ലക്ഷ്യമിടുന്നത്. ഈ മാറ്റം എപ്പോള്‍ മുതല്‍ പ്രാബല്യത്തില്‍ വരുമെന്ന് റെയില്‍വേ ഔദ്യോഗികമായി അറിയിച്ചിട്ടില്ല. ഈ റൂട്ടുകളിലെ ടിക്കറ്റ് ബുക്കിംഗ് സാധ്യതകള്‍ ഇതോടെ വര്‍ധിക്കുമെന്നാണ് പ്രതീക്ഷിക്കുന്നത്.
