Kerala Heavy Rain : കേരള തീരത്ത് ചക്രവാതച്ചുഴി; സംസ്ഥാനത്ത് വീണ്ടും മഴ കനക്കും

തിരുവനന്തപുരം: സംസ്ഥാനത്ത് വീണ്ടും ശക്തമായ മഴയെത്തുമെന്ന് വിദ​ഗ്ധർ. തെക്ക് – കിഴക്കൻ അറബിക്കടലിൽ കേരളം തീരത്തിൻ്റെ അരികിലായി ചക്രവാതച്ചുഴി രൂപപ്പെട്ടതിനേത്തുടർന്നാണ് മുന്നറിയിപ്പെത്തിയത്. കേരള തീരത്ത് ശക്തമായ പടിഞ്ഞാറൻ കാറ്റുള്ളതായും കാലാവസ്ഥ നിരീക്ഷണ കേന്ദ്രം അറിയിച്ചു.

അടുത്ത 7 ദിവസം സംസ്ഥാനത്ത് വ്യാപകമായി ഇടി/മിന്നൽ/കാറ്റ് എന്നിവ ഉണ്ടാകുമെന്നും കാലാവസ്ഥാ കേന്ദ്രം അറിയിച്ചു. മിതമായതോ അല്ലെങ്കിൽ ഇടത്തരം മഴയ്ക്കാണ് സാധ്യതയുള്ളതായി മുന്നറിയിപ്പുള്ളത്. ഇതിനെ തുടർന്ന് ഇടുക്കി, കോഴിക്കോട് ജില്ലകളിൽ ഇന്ന് ഓറഞ്ച് അലർട്ട് പ്രഖ്യാപിച്ചു.

ALSO READ – കാലവർഷം എത്തി; എല്ലാ ജില്ലകളിലും യെല്ലോ അലർട്ട്

കോട്ടയം മുതൽ കാസര്‍കോട് വരെ യെല്ലോ അലര്‍ട്ടും പ്രഖ്യാപിച്ചിട്ടുണ്ട്. മറ്റ് ജില്ലകളിൽ ഒറ്റപ്പെട്ട ശക്തമായ മഴക്ക് സാധ്യതയുണ്ട്. മെയ്‌ 31 മുതൽ ജൂൺ 2 വരെ ശക്തമായ മഴയ്ക്ക് സാധ്യതയെന്ന് കേന്ദ്ര കാലാവസ്ഥ വകുപ്പ് അറിയിച്ചിരുന്നു. മുന്നറിയിപ്പ് എത്തിയതിനേ തുടർന്ന് തെക്കൻ കേരള തീരത്തും, ലക്ഷദ്വീപ് പ്രദേശത്തും മത്സ്യബന്ധനത്തിന് വിലക്കുണ്ട്. കർണാടക തീരങ്ങളിൽ മത്സ്യബന്ധനം നടത്താവുന്നതാണെന്നും കേന്ദ്ര കാലാവസ്ഥാ വിഭാ​ഗം അറിയിച്ചു.

കേരളത്തിലും രാജ്യത്തെ വടക്കുകിഴക്കന്‍ സംസ്ഥാനങ്ങളിലുമാണ് കാലവര്‍ഷം എത്തിയിരുന്നു. ശക്തമായ മഴയ്ക്കുള്ള സാധ്യത കണക്കിലെടുത്ത് കേന്ദ്ര കാലാവസ്ഥാ വകുപ്പ് സംസ്ഥാനത്തെ എല്ലാ ജില്ലകളിലും യെല്ലോ അലര്‍ട്ട് പ്രഖ്യാപിച്ചിരുന്നതാണ്.

ഈ ആഴ്ചയിലെ എല്ലാ ദിവസവും മഴ മുന്നറിയിപ്പുണ്ട്. മിക്ക ജില്ലകളിലും മഴ പെയ്യുമെന്നും മുന്നറിയിപ്പിൽ പറയുന്നു. സാധാരണ നിലയില്‍ ജൂണ്‍ 1 നാണ് കാലവര്‍ഷം എത്തുന്നത്. എന്നാൽ ഇത്തവണ രണ്ട് ദിവസം മുമ്പേ ആരംഭിച്ചു. ജൂണ്‍ 5 ആകുമ്പോഴേക്കും വടക്കുകിഴക്കന്‍ സംസ്ഥാനങ്ങളിലേക്കും മണ്‍സൂന്‍ വ്യാപിക്കുമെന്നാണ് കാലാവസ്ഥ കേന്ദ്രത്തിൻ്റെ മുന്നറിയിപ്പിലുള്ളത്. റിമാല്‍ ചുഴലിക്കാറ്റിന്റെ സ്വാധീനവും മഴക്കാലം വേ​ഗമെത്താൻ കാരണമാണ് എന്ന് വിദ​ഗ്ധർ പറയുന്നു.