Ration Card: ഒരവസരം കൂടി, മുൻഗണനാ റേഷൻ കാർഡിന് അപേക്ഷിക്കാനുള്ള തീയതി നീട്ടി
Date Extended to Apply Priority Ration Card in Kerala: ഒരു മാസത്തോളം സമയം നൽകിയെങ്കിലും 14,000 അപേക്ഷ മാത്രമാണ് ലഭിച്ചത്. അക്ഷയ കേന്ദ്രം, സിവില് സപ്ലൈസ് വകുപ്പ് വെബ്സൈറ്റ് എന്നിവ വഴി മുൻഗണന വിഭാഗത്തിലേക്ക് മാറാനുള്ള അപേക്ഷ നല്കാവുന്നതാണ്.
തിരുവനന്തപുരം: സംസ്ഥാനത്തെ റേഷന് കാര്ഡ് ഉടമകൾക്ക് മുന്ഗണനാ വിഭാഗത്തിലേക്ക് മാറാൻ ഒരവസരം കൂടി നൽകി സംസ്ഥാന സർക്കാർ. അക്ഷയാ സെന്ററുകൾ മഖേന ഓൺലൈനായി അപേക്ഷിക്കാനുള്ള അവസാന തീയതി ഒക്ടോബർ 28 വരെ നീട്ടി. നേരത്തെ ഒക്ടോബർ 20ന് ആയിരുന്നു സമയപരിധി നിശ്ചയിച്ചിരുന്നത്. ലക്ഷത്തോളം ഒഴിവുണ്ടായിട്ടും അപേക്ഷകര് കുറവായതാണ് തീയതി നീട്ടാന് കാരണം. ഒരു മാസത്തോളം സമയം നൽകിയെങ്കിലും 14,000 അപേക്ഷ മാത്രമാണ് ലഭിച്ചത്.
മുൻഗണന റേഷൻ കാർഡിന് അർഹരായവർ
തദ്ദേശസ്ഥാപനങ്ങളിലെ സെക്രട്ടറി നൽകുന്ന ബിപിഎൽ സർട്ടിഫിക്കറ്റുള്ളവർ, മാരക രോഗമുള്ളവർ, പട്ടികജാതി/വർഗ വിഭാഗത്തിൽപ്പെട്ടവർ, പരമ്പരാഗത മേഖലയിൽ തൊഴിലെടുക്കുന്നവർ, നിർധന ഭൂരഹിത -ഭവനരഹിതർ, സർക്കാർ ധനസഹായത്തോടെ ലഭ്യമായ വീടുള്ളവർ, ഭിന്നശേഷിക്കാർ എന്നിവർക്കാണ് മുൻഗണന റേഷൻ കാർഡ് നൽകി വരുന്നത്.
എങ്ങനെ അപേക്ഷിക്കാം?
അക്ഷയ കേന്ദ്രം, സിവില് സപ്ലൈസ് വകുപ്പ് വെബ്സൈറ്റ് എന്നിവ വഴി മുൻഗണന വിഭാഗത്തിലേക്ക് മാറാനുള്ള അപേക്ഷ നല്കാവുന്നതാണ്. അര്ഹരായ മുന്ഗണനേതര റേഷന് കാര്ഡ് ഉടമകള്ക്ക് അക്ഷയ കേന്ദ്രങ്ങള് മുഖേനയോ സിവില് സപ്ലൈസ് വകുപ്പിന്റെ സിറ്റിസണ് പോര്ട്ടല് മുഖേനയോ അപേക്ഷ സമര്പ്പിക്കാം.
ആവശ്യമായ രേഖകള്
ഭവന നിർമാണ പദ്ധതി വഴി വീട് ലഭിച്ചവർ, ജീർണാവസ്ഥയിലുള്ള വീടുള്ളവർ, വൈദ്യുതി, കുടിവെള്ളം, ശുചിമുറി എന്നിവയില്ലാത്തവർ അത് തെളിയിക്കുന്നതിനുള്ള സാക്ഷ്യപത്രം
പട്ടികജാതി / പട്ടിക വർഗ വിഭാഗക്കാരാണെങ്കിൽ ജാതി തെളിയിക്കുന്ന സർട്ടിഫിക്കറ്റ്
സ്ഥലത്തിന്റെ 2025ലെ നികുതി രസീത്
പഞ്ചായത്ത് സെക്രട്ടറിയുടെ ബിപിഎൽ സാക്ഷ്യപത്രം
വീടിന്റെ തറ വിസ്തീർണം തെളിയിക്കുന്ന പഞ്ചായത്ത് സെക്രട്ടറിയുടെ സാക്ഷ്യപത്രം
വില്ലേജ് ഓഫീസിൽ നിന്നുള്ള വരുമാന സർട്ടിഫിക്കറ്റ്
പരമ്പരാഗത തൊഴിൽ ചെയ്യുന്നവർ ക്ഷേമനിധി അംഗത്വത്തിന്റെ പാസ് ബുക്കിന്റെ പകർപ്പ്
മാരക രോഗങ്ങളുള്ളവർ അത് തെളിയിക്കുന്ന ഡോക്ടറുടെ സർട്ടിഫിക്കറ്റ്
