Gardening Tips: ചെടികൾക്ക് കാശുകൊടുത്തു വളം വാങ്ങല്ലേ; അടുക്കളയിലെ ഈ ഒരൊറ്റ സാധനം ധാരാളം!

അരി കഴുകിയ ശേഷമോ തിളപ്പിച്ച ശേഷമോ ബാക്കിവരുന്ന വെള്ളം നമ്മളിൽ ഭൂരിഭാഗം പേരും വെറുതെ ഒഴുകിക്കളയാറാണ് പതിവ്. എന്നാൽ ചെടികൾക്ക് ആവശ്യമായ മികച്ചൊരു സ്വാഭാവിക വളമാണ് ഈ വെള്ളമെന്ന് നിങ്ങൾക്കറിയാമോ? നൈട്രജൻ, ഫോസ്ഫറസ്, പൊട്ടാസ്യം എന്നിവയ്‌ക്കൊപ്പം ചെടിയിലെ മണ്ണിൽ ഉപകാരികളായ സൂക്ഷ്മാണുക്കളെ വളർത്താൻ സഹായിക്കുന്ന സ്റ്റാർച്ചും കഞ്ഞി വെള്ളത്തിൽ അടങ്ങിയിട്ടുണ്ട്. കഞ്ഞി വെള്ളവും അരി കഴുകിയ വെള്ളവും ഉപയോഗിച്ച് വീട്ടിൽ വളരെ പെട്ടെന്ന് തഴച്ചുവളരുന്ന 7 ചെടികൾ ഏതെല്ലാമാണെന്ന് അറിഞ്ഞാലോ…

സ്നേക്ക് പ്ലാന്റ്

തീരെ പരിചരണം ആവശ്യമില്ലാത്ത ചെടിയാണിത്. എന്നാൽ 2 മുതൽ 4 ആഴ്ചയിലൊരിക്കൽ നേർപ്പിച്ച അരിവെള്ളം ഒഴിച്ചുകൊടുക്കുന്നത് ഇതിന്റെ ഇലകൾക്ക് നല്ല പച്ചപ്പും കരുത്തും നൽകാൻ സഹായിക്കും.

മണി പ്ലാന്റ് / പോത്തോസ്

വീടിനുള്ളിൽ വളർത്തുന്ന മണി പ്ലാന്റുകൾക്ക് ആവശ്യമായ പോഷകങ്ങൾ മണ്ണിൽ നിന്ന് പെട്ടെന്ന് തീർന്നുപോകാറുണ്ട്. മാസത്തിലൊരിക്കൽ അരി കഴുകിയ വെള്ളം ഒഴിക്കുന്നത് ഇവയുടെ വള്ളികൾ വേഗത്തിൽ പടരാനും ഇലകൾക്ക് കൂടുതൽ തിളക്കം ലഭിക്കാനും സഹായിക്കും.

കറ്റാർവാഴ

കറ്റാർവാഴയുടെ ഇലകൾ തടിയുള്ളതും ആരോഗ്യമുള്ളതുമായി വളരാൻ ചെറിയ അളവിൽ നൈട്രജൻ ആവശ്യമാണ്. അരി കഴുകിയ വെള്ളം കറ്റാർവാഴയ്ക്ക് അനുയോജ്യമായ ഒരു ലളിത വളമാണ്.

ALSO READ: എഞ്ചിനീയറിംഗ് ജോലി ഉപേക്ഷിച്ചു; വാഴപ്പഴം കൃഷി ചെയ്ത് 35 ലക്ഷം നേടി യുവാവ്!

പീസ് ലിലി

മണ്ണിലെ പോഷകക്കുറവ് പീസ് ലിലിയെ പെട്ടെന്ന് ബാധിക്കാറുണ്ട്. നേർപ്പിച്ച അരിവെള്ളം ഒഴിച്ചുകൊടുക്കുന്നത് ഇതിന്റെ വേരുകളെ ശക്തിപ്പെടുത്താനും കൂടുതൽ പൂക്കൾ ഉണ്ടാകാനും സഹായിക്കും.

തക്കാളി

അടുക്കളത്തോട്ടത്തിൽ തക്കാളി വളർത്തുന്നവർക്ക് അരിവെള്ളം മികച്ചൊരു പോഷകമാണ്. ഇതിലെ സ്റ്റാർച്ച് മണ്ണിലെ സൂക്ഷ്മാണുക്കളെ വർദ്ധിപ്പിക്കുകയും തക്കാളിച്ചെടിയിൽ കൂടുതൽ കായ്കൾ ഉണ്ടാകാൻ സഹായിക്കുകയും ചെയ്യുന്നു.

മുളക്

തക്കാളിയെപ്പോലെ തന്നെ മുളകുചെടിയുടെ വേരുകളുടെ കരുത്ത് കൂട്ടാനും കൂടുതൽ രോഗപ്രതിരോധശേഷി നൽകാനും അരി വെള്ളത്തിലെ പോഷകങ്ങൾ സഹായിക്കും.

റോസ ചെടികൾ

റോസാച്ചെടികൾക്ക് പൂക്കൾ സമൃദ്ധമായി ഉണ്ടാകാനും പൂക്കളുടെ നിറം കൂടുതൽ തെളിമയുള്ളതാകാനും അരിവെള്ളം സഹായിക്കും.

ശ്രദ്ധിക്കേണ്ട കാര്യങ്ങൾ

1. അരി കഴുകിയ വെള്ളമോ കഞ്ഞി വെള്ളമോ നേരിട്ട് ഒഴിക്കരുത്. 1 ഭാഗം അരിവെള്ളത്തിൽ 2 അല്ലെങ്കിൽ 3 ഭാഗം തെളിഞ്ഞ വെള്ളം ചേർത്ത് നേർപ്പിച്ച ശേഷം മാത്രം ചെടികൾക്ക് ഒഴിക്കുക.
2.  ഉപ്പ് ചേർത്ത കഞ്ഞി വെള്ളം ചെടികൾക്ക് ഒട്ടും നല്ലതല്ല. ഇത് വേരുകളെ നശിപ്പിക്കും.
3. അധികമായി അരിവെള്ളം ഒഴിച്ചാൽ മണ്ണിൽ പൂപ്പൽ വരാനും ഉറുമ്പുകൾ പെരുകാനും സാധ്യതയുണ്ട്. 2 മുതൽ 4 ആഴ്ചയിലൊരിക്കൽ മാത്രം ഉപയോഗിക്കുക.
4. ഇലകളിൽ ഒഴിക്കാതെ ചെടിയുടെ ചുവട്ടിലെ മണ്ണിൽ മാത്രം ഒഴിച്ചുകൊടുക്കാൻ ശ്രദ്ധിക്കുക.

English Summary:

Rice water, often discarded after washing or cooking rice, can be reused as a simple supplement for plant care because it contains starch and small amounts of minerals that may support soil health and beneficial microorganisms.