Pomegranate Peels Benefits: മാതളനാരങ്ങ തൊലി ഭക്ഷണത്തിൽ എങ്ങനെ ഉപയോ​ഗിക്കാം; ​ഗുണമറിഞ്ഞാൽ ഞെട്ടും

മാതളനാരങ്ങ (Pomegranate) ആരോഗ്യത്തിന് എത്രത്തോളം നല്ലതാണെന്ന് നമുക്കെല്ലാവർക്കും അറിയാവുന്ന കാര്യമാണ്. എന്നാൽ മാതളനാരങ്ങ കഴിച്ച ശേഷം അതിന്റെ തൊലിയെടുത്ത് വലിച്ചെറിയുന്നത് പതിവാണ്. പക്ഷേ മുത്തശ്ശിമാർക്കും പണ്ടുള്ളവർക്കും മാതളനാരങ്ങ തൊലി കഴിക്കുന്നതിൻ്റെ ​ഗുണങ്ങൾ നന്നായി അറിയാവുന്നതാണ്. മാതളനാരങ്ങയെക്കാൾ കൂടുതൽ ആൻ്റിഓക്‌സിഡൻ്റുകൾ അടങ്ങിയിരിക്കുന്നത് അതിന്റെ തൊലിയിലാണ് എന്ന് പറഞ്ഞാൽ നിങ്ങൾ വിശ്വസിക്കുമോ? അതെ ഇനി ഒരിക്കലും മാതളനാരങ്ങ കഴിച്ച ശേഷം അതിൻ്റെ തൊലി വലിച്ചെറിയരുത്.

ALSO READ: പുതപ്പിന് പുറത്ത് ഒരു കാൽ വെച്ചാണോ ഉറങ്ങുന്നത്? ഈ ശീലത്തിന് പിന്നിലെ കാരണം

മാതളനാരങ്ങ തൊലി എങ്ങനെ സൂക്ഷിച്ചുവെക്കാം?

മാതളത്തോലി നേരിട്ട് കഴിച്ചാൽ കയ്പ്പ് തോന്നുന്നതിനാൽ ഇത് ഉണക്കിപ്പൊടിച്ചാണ് സാധാരണയായി സൂക്ഷിക്കുന്നത്. മാതളനാരങ്ങയുടെ ഉള്ളിലെ മഞ്ഞനിറത്തിലുള്ള നേർത്ത പാട നീക്കിയ ശേഷം മാത്രം പുറംതോട് എടുക്കുക. ഇത് നല്ലതുപോലെ കഴുകി വൃത്തിയാക്കിയ ശേഷം ചെറിയ കഷണങ്ങളാക്കി മുറിക്കുക. ഈ കഷണങ്ങൾ ഒരു കോട്ടൺ തുണിയിലോ പ്ലേറ്റിലോ നിരത്തി നല്ല വെയിലത്തുവെച്ച് ഉണക്കിയെടുക്കുക. നന്നായി ഉണങ്ങിയ തൊലികൾ മിക്സിയിലിട്ട് പൊടിച്ചെടുക്കുക. പൊടിച്ചെടുത്ത പൊടി വായു കടക്കാത്ത ഒരു കുപ്പിയിലാക്കി വെച്ചാൽ മാസങ്ങളോളം കേടുകൂടാതെ ഉപയോഗിക്കാം.

മാതളത്തോലി ഭക്ഷണത്തിൽ ഉപയോഗിക്കേണ്ടത്

മാതളത്തോലി ചായ: രാവിലെ കുടിക്കുന്ന ചായയ്ക്ക് പകരം ഏറ്റവും മികച്ച ഒരു ഹെൽത്ത് ഡ്രിങ്കാണ് മാതളത്തോലി ചായ. ഒരു ഗ്ലാസ് വെള്ളം നന്നായി തിളപ്പിച്ച് അതിലേക്ക് ഒരു ടീസ്പൂൺ മാതളത്തോലിയുടെ പൊടി ചേർക്കുക. കുറഞ്ഞ തീയിൽ 5 മിനിറ്റ് തിളപ്പിച്ച ശേഷം അരിച്ചെടുത്ത് കുടിക്കാം. ഹൃദയാരോഗ്യത്തിനും കൊളസ്‌ട്രോൾ കുറയ്ക്കാനും ഇത് നല്ലതാണ്.

സ്മൂത്തികളിലും ജ്യൂസുകളിലും: നിങ്ങൾ രാവിലെ കുടിക്കുന്ന ഹെൽത്തി ബ്രേക്ക്ഫാസ്റ്റ് സ്മൂത്തികളിലോ, ഓട്സ് മിൽക്കിലോ, സാധാരണ ഫ്രൂട്ട് ജ്യൂസുകളിലോ അര ടീസ്പൂൺ മാതളത്തോലി പൊടി ചേർത്ത് നന്നായി ഇളക്കി കുടിക്കാം. കയ്പ്പ് ഒട്ടും അറിയാതെ തന്നെ ഇതിന്റെ ഗുണം ശരീരത്തിന് ലഭിക്കുമെന്നതാണ് ഇങ്ങനെ കഴിക്കുന്നതിൻ്റെ ​ഗുണം.

സലാഡ്: വെജിറ്റബിൾ സലാഡുകളോ ഫ്രൂട്ട് സലാഡുകളോ തയ്യാറാക്കുമ്പോൾ അതിന് മുകളിലേക്ക് അല്പം മാതളത്തോലി പൊടിയും ചെറുനാരങ്ങാനീരും ചേർത്ത് മിക്സ് ചെയ്യാം. ഇത് സലാഡിന് നേരിയൊരു പുളിപ്പും വ്യത്യസ്ത രുചിയും നൽകുന്നതാണ്.

ആരോഗ്യ ഗുണമറിഞ്ഞാൽ ഞെട്ടും

രോഗപ്രതിരോധ ശേഷി വർദ്ധിപ്പിക്കും: മാതളനാരങ്ങയുടെ തൊലിയിൽ അടങ്ങിയിരിക്കുന്ന വിറ്റാമിൻ സി, ഉയർന്ന അളവിലുള്ള പോളിഫെനോളുകൾ (Polyphenols) എന്നിവ ശരീരത്തിലെ രോഗപ്രതിരോധ ശേഷി വർദ്ധിപ്പിക്കുകയും സീസണൽ അനുബാധകളെ ചെറുക്കുകയും ചെയ്യുന്നു.

അകാല വാർദ്ധക്യം തടയുന്നു: ആൻ്റിഓക്‌സിഡൻ്റുകളുടെ കലവറയായതിനാൽ, കോശങ്ങളുടെ കേടുപാടുകൾ തീർത്ത് ചർമ്മത്തിലെ ചുളിവുകൾ മാറ്റാനും യുവത്വം നിലനിർത്തി ചർമ്മത്തിന് സ്വാഭാവിക നിറം നൽകാനും ഇത് സഹായിക്കുന്നു.

ദഹനപ്രശ്നങ്ങൾക്ക് ഉത്തമം: വയറിളക്കം, ദഹനക്കേട്, വയറുവേദന തുടങ്ങി വയറുമായി ബന്ധപ്പെട്ട് ഏത് അസ്വസ്ഥതയ്ക്കും മാതളത്തോലി ഇട്ട് തിളപ്പിച്ച വെള്ളം കുടിക്കുന്നത് വലിയ മാറ്റം നൽകും. ഇത് കുടലിലെ നല്ല ബാക്ടീരിയകളെ സംരക്ഷിക്കുന്നു.

തൊണ്ടവേദനയും വായ്നാറ്റവും: മാതളനാരങ്ങയുടെ പൊടിയിട്ട് തിളപ്പിച്ച വെള്ളം ചെറുചൂടോടെ ഗാർഗിൾ ചെയ്യുന്നത് തൊണ്ടവേദനയ്ക്കും കഫക്കെട്ടിനും വളരെ നല്ലതാണ്. കൂടാതെ വായ്നാറ്റം അകറ്റാനും പല്ലുകളുടെ ആരോഗ്യം നിലനിർത്താനും ഇത് സഹായിക്കും.

English Summary:

Pomegranate peels can be dried and steeped to prepare a warm herbal infusion. Pomegranate peels Packed with more antioxidants than the seeds, pomegranate peels can be used in teas, smoothies, and spice blends.