Kerala Monsoon Alert: മഴക്കാലമാണ്…. ഇരുചക്രവാഹനക്കാർ ഇക്കാര്യം മനസ്സിൽ വച്ചോളൂ, അപകടം ഒഴിവാക്കാം

Kerala Monsoon Alert ( പ്രതീകാത്മക ചിത്രം)

കൊച്ചി: കാലവർഷം കനക്കുമ്പോൾ ഇരുചക്രവാഹന യാത്രക്കാർക്ക് മുന്നറിയിപ്പുമായി അധികൃതർ. മഴക്കാലത്തെ റോഡുകൾ ഏറെ അപകടകരമാകാമെന്നും, ചെറിയ അശ്രദ്ധ പോലും വലിയ ദുരന്തങ്ങൾക്ക് വഴിവെച്ചേക്കാമെന്നും ചൂണ്ടിക്കാട്ടി മോട്ടോർ വാഹന വകുപ്പും പോലീസ് വകുപ്പും ജാഗ്രതാ നിർദേശങ്ങൾ പുറപ്പെടുവിച്ചു.

മഴയത്ത് ഇരുചക്രവാഹനങ്ങൾ ഓടിക്കുമ്പോൾ പാലിക്കേണ്ട പ്രധാന കാര്യങ്ങൾ ഇവയാണ്

• നനഞ്ഞ റോഡുകളിൽ ടയറിനുള്ള ഗ്രിപ്പ് കുറയുന്നതിനാൽ അമിത വേഗത പൂർണ്ണമായും ഒഴിവാക്കുക. സാധാരണ വേഗതയുടെ പകുതിയോ അതിൽ കുറവോ വേഗതയിൽ മാത്രം സഞ്ചരിക്കുക.
• പെട്ടെന്നുള്ള ബ്രേക്കിംഗ് ഒഴിവാക്കുക. മുന്നിലെ വാഹനവുമായി കൂടുതൽ അകലം പാലിക്കുകയും, ബ്രേക്കുകൾ പതിയെയും ഘട്ടം ഘട്ടമായും ഉപയോഗിക്കുകയും ചെയ്യുക. എൻജിൻ ബ്രേക്കിംഗും ഫലപ്രദമായി ഉപയോഗിക്കാം.
• ടയറുകൾക്ക് ആവശ്യത്തിന് കട്ടയുണ്ടെന്ന് ഉറപ്പാക്കുക. തേയ്മാനം വന്ന ടയറുകൾ അപകടസാധ്യത വർദ്ധിപ്പിക്കും. ടയറിലെ മർദ്ദം ശരിയായ അളവിൽ നിലനിർത്തുന്നതും പ്രധാനമാണ്.
• വെള്ളക്കെട്ടുകൾ നിറഞ്ഞ റോഡിലൂടെ യാത്ര ചെയ്യുന്നത് ഒഴിവാക്കുക. വെള്ളത്തിനടിയിൽ ഒളിഞ്ഞിരിക്കുന്ന കുഴികൾ, മാൻഹോളുകൾ, മറ്റ് തടസ്സങ്ങൾ എന്നിവ വലിയ അപകടങ്ങൾക്ക് കാരണമാവാം. ഒഴിച്ചുകൂടാനാവാത്ത സാഹചര്യങ്ങളിൽ വേഗത കുറച്ച്, സ്ഥിരമായ ഗതിയിൽ മാത്രം കടന്നുപോകുക.

Also read – നിലമ്പൂര്‍ ‘വാറി’ന് പി.വി. അന്‍വറും; സ്ഥാനാര്‍ത്ഥിത്വം ഔദ്യോഗികമായി പ്രഖ്യാപിച്ച് തൃണമൂല്‍ കോണ്‍ഗ്രസ്‌

• നല്ല ഹെൽമറ്റ് ഉപയോഗിക്കുക. ഹെൽമറ്റ് വൈസർ മങ്ങുന്നത് തടയാൻ ആന്റി-ഫോഗ് സ്പ്രേ ഉപയോഗിക്കുകയോ, പിൻലോക്ക് വൈസർ ഘടിപ്പിക്കുകയോ ചെയ്യുക. കാഴ്ചാ വ്യക്തത കുറയുന്നത് അപകടങ്ങൾ ക്ഷണിച്ചുവരുത്തും.
• മഴയുള്ള സമയത്ത് പകൽ സമയത്തും ഹെഡ്‌ലൈറ്റുകൾ ഓൺ ചെയ്യുക. ഇത് നിങ്ങളുടെ വാഹനത്തെ മറ്റുള്ളവർക്ക് കൂടുതൽ ദൃശ്യമാക്കാൻ സഹായിക്കും. ടേൺ സിഗ്നലുകളും ടെയിൽ ലൈറ്റുകളും കൃത്യമായി പ്രവർത്തിക്കുന്നുണ്ടെന്ന് ഉറപ്പാക്കുക.
• മഴക്കോട്ട്, ഹെൽമറ്റ് തുടങ്ങിയവയ്ക്ക് തിളക്കമുള്ളതും പ്രതിഫലിക്കുന്നതുമായ നിറങ്ങൾ തിരഞ്ഞെടുക്കുന്നത് റോഡിൽ നിങ്ങളുടെ സാന്നിധ്യം മറ്റുള്ളവർക്ക് എളുപ്പത്തിൽ തിരിച്ചറിയാൻ സഹായിക്കും.
• റോഡിലെ പെയിന്റ് ചെയ്ത അടയാളങ്ങൾ, മാൻഹോൾ കവറുകൾ, റെയിൽവേ ക്രോസിംഗുകൾ എന്നിവ നനഞ്ഞാൽ അത്യന്തം വഴുവഴുപ്പുള്ളതാകും. ഇവയിലൂടെ കടന്നുപോകുമ്പോൾ അതീവ ശ്രദ്ധ പുലർത്തുക.
• മഴക്കാലത്തിന് മുമ്പായി ബ്രേക്ക്, ലൈറ്റുകൾ, ടയർ, ചെയിൻ, ഇലക്ട്രിക്കൽ ഘടകങ്ങൾ തുടങ്ങിയവ പരിശോധിച്ച് ആവശ്യമായ അറ്റകുറ്റപ്പണികൾ നടത്തുക. ചെയിൻ കൃത്യമായി ലൂബ്രിക്കേറ്റ് ചെയ്യേണ്ടത് അത്യാവശ്യമാണ്.
• വെള്ളക്കെട്ടിന് സാധ്യതയുള്ള വഴികൾ പരമാവധി ഒഴിവാക്കി യാത്ര ചെയ്യുക. കാലാവസ്ഥാ മുന്നറിയിപ്പുകൾ ശ്രദ്ധിക്കുകയും, അമിത മഴയുള്ളപ്പോൾ യാത്രകൾ മാറ്റിവെക്കുകയും ചെയ്യുക.