ഭക്ഷണം വേഗം കഴിച്ചുതീർക്കാറുണ്ടോ? നിങ്ങൾക്ക് ഈ 5 പ്രത്യേകതകൾ ഉണ്ട്!

പ്രതീകാത്മക ചിത്രം

വളരെ വേഗത്തിൽ ഭക്ഷണം കഴിച്ചു തീർക്കുന്നവരാണോ നിങ്ങൾ? അല്ലെങ്കിൽ നിങ്ങളുടെ കൂട്ടത്തിലെങ്കിലും ചിലരുണ്ടാകും, മറ്റുള്ളവർ പകുതി പോലും കഴിച്ചു തീർക്കുന്നതിന് മുമ്പ് തങ്ങളുടെ പ്ലേറ്റ് കാലിയാക്കുന്നവർ. തിരക്ക് കാരണം, രൂപപ്പെടുന്ന ഒരു ശീലമായി ഇതിനെ പലരും കാണാറുണ്ടെങ്കിലും, ഒരാൾ ഭക്ഷണം കഴിക്കുന്ന വേഗത അവരുടെ ചിന്താഗതിയെയും വ്യക്തിത്വത്തെയും കുറിച്ച് ചില സൂചനകൾ നൽകുന്നുണ്ടെന്നാണ് മനഃശാസ്ത്രജ്ഞർ പറയുന്നത്. ഭക്ഷണം കഴിക്കുന്ന രീതി കൊണ്ട് മാത്രം ഒരാളുടെ പൂർണ്ണമായ വ്യക്തിത്വം അളക്കാൻ കഴിയില്ലെങ്കിലും, വേഗത്തിൽ ഭക്ഷണം കഴിക്കുന്നവരിൽ പൊതുവായി കാണാറുള്ള ചില പ്രധാന സ്വഭാവസവിശേഷതകൾ എന്തൊക്കെയാണെന്ന് നോക്കിയാലോ…

ലക്ഷ്യബോധവും കഠിനാധ്വാനവും

വളരെ വേഗത്തിൽ ഭക്ഷണം കഴിക്കുന്നവർ ഒരു കാര്യം വേഗത്തിൽ ലക്ഷ്യസ്ഥാനത്ത് എത്തിക്കാൻ ആഗ്രഹിക്കുന്നവരാണെന്ന് പറയപ്പെടുന്നു. ജീവിതത്തിലെ മറ്റ് കാര്യങ്ങളിലും ഇതേ മനോഭാവം ഇവർ കാണിച്ചേക്കാം. ഏറ്റെടുത്ത ജോലികൾ കൃത്യസമയത്ത് ചെയ്തു തീർക്കാനും, ഒരു കാര്യത്തിൽ തന്നെ കൂടുതൽ സമയം കളയാതെ അടുത്ത വെല്ലുവിളികളിലേക്ക് കടക്കാനും ഇവർ ഇഷ്ടപ്പെടുന്നു. ഇത്തരക്കാർക്ക് ഭക്ഷണം കഴിക്കുക എന്നത് ആസ്വദിച്ചു ചെയ്യേണ്ട ഒരു കാര്യമാകുന്നതിനേക്കാൾ, ചെയ്തു തീർക്കേണ്ട മറ്റൊരു ‘ടാസ്ക്’ മാത്രമായിട്ടായിരിക്കും തോന്നുക.

അക്ഷമ കൂടുതലായിരിക്കാം

ക്യൂ നിൽക്കേണ്ടി വരികയോ, മീറ്റിംഗുകൾ നീണ്ടുപോവുകയോ ഒക്കെ ചെയ്യുന്നത് ഇവർക്ക് ഒട്ടും സഹിക്കാൻ കഴിഞ്ഞെന്ന് വരില്ല. എന്തിലും ഏതിലും ഒരു വേഗത ആഗ്രഹിക്കുന്നവരാണ് ഇക്കൂട്ടർ. ഈ അക്ഷമ അവരുടെ ഭക്ഷണരീതിയിലും പ്രകടമാകും. സമയമുണ്ടെങ്കിൽ പോലും ഒട്ടും പതുക്കെയല്ലാതെ, വേഗത്തിൽ ഭക്ഷണം കഴിക്കാനായിരിക്കും ഇവർക്ക് താല്പര്യം.

ALSO READ: ബിപി കുറയുന്നത് അത്ര നിസ്സാരമാക്കല്ലേ! എന്തുകൊണ്ട് കുറയുന്നു? അടിയന്തര ഘട്ടങ്ങളിൽ ചെയ്യേണ്ടത്

ഉൽപ്പാദനക്ഷമതയ്ക്ക് മുൻഗണന നൽകുന്നവർ

വേഗത്തിൽ കഴിക്കുന്നവർക്ക് ഭക്ഷണം എന്നത് മറ്റ് ഉത്തരവാദിത്തങ്ങൾക്കിടയിൽ പെട്ടെന്ന് തീർക്കേണ്ട ഒന്നാണ്. ഭക്ഷണം കഴിക്കുന്നതിനൊപ്പം ഇമെയിലുകൾക്ക് മറുപടി നൽകുകയോ, ഫോൺ സ്ക്രോൾ ചെയ്യുകയോ, അടുത്ത മീറ്റിംഗിനെക്കുറിച്ച് ചിന്തിക്കുകയോ ചെയ്യുന്നത് ഇവരുടെ രീതിയാണ്. ആ നിമിഷത്തെ പൂർണ്ണമായി ആസ്വദിക്കുന്നതിന് പകരം, അടുത്തതായി എന്ത് ചെയ്യണം എന്നതിലായിരിക്കും ഇവരുടെ ശ്രദ്ധ.

വയറ് നിറഞ്ഞോ എന്ന് തിരിച്ചറിയാൻ ബുദ്ധിമുട്ടുന്നു

മനഃശാസ്ത്രപരമായി കണ്ടെത്തിയിട്ടുള്ള ഒരു പ്രധാന കാര്യമാണിത്. നമ്മൾ വളരെ വേഗത്തിൽ ഭക്ഷണം കഴിക്കുമ്പോൾ, വയറ് നിറഞ്ഞെന്ന സന്ദേശം തലച്ചോറിലെത്താൻ ആവശ്യമായ സമയം ലഭിക്കാറില്ല. അതുകൊണ്ടുതന്നെ, ശരീരം ആവശ്യപ്പെടുന്നതിലും കൂടുതൽ ഭക്ഷണം കഴിച്ചതിന് ശേഷമായിരിക്കും വയറ് നിറഞ്ഞെന്ന കാര്യം ഇവർ പലപ്പോഴും തിരിച്ചറിയുന്നത്.

വേഗതയേറിയ ചുറ്റുപാടുകളുമായി എളുപ്പം പൊരുത്തപ്പെടുന്നു

തിരക്കേറിയ ഷെഡ്യൂളുകൾ, പെട്ടെന്ന് തീരുമാനങ്ങൾ എടുക്കേണ്ടി വരുന്ന ജോലിസ്ഥലങ്ങൾ എന്നിവയിലൊക്കെ തിളങ്ങാൻ ഇവർക്ക് സാധിക്കാറുണ്ട്. ജീവിതത്തിന്റെ വേഗത കുറയുമ്പോൾ ഇവർക്ക് പെട്ടെന്ന് മടുപ്പ് തോന്നാം. എങ്കിലും, ചുരുങ്ങിയ ലഞ്ച് ബ്രേക്ക് പോലുള്ള സാഹചര്യങ്ങൾ കൊണ്ടും ആളുകൾ വേഗത്തിൽ കഴിക്കാൻ ശീലിക്കാറുണ്ട്.

ഭക്ഷണത്തിൽ ശ്രദ്ധ കേന്ദ്രീകരിക്കുന്നില്ല

ഭക്ഷണത്തിന്റെ രുചിയും മണവും ഘടനയുമൊക്കെ അറിഞ്ഞ്, ശ്രദ്ധയോടെ കഴിക്കുന്നതിനെയാണ് ‘മൈൻഡ്ഫുൾ ഈറ്റിംഗ്’ എന്ന് പറയുന്നത്. വേഗത്തിൽ കഴിക്കുന്നവർക്ക് ഇതിനുള്ള അവസരം കുറവാണ്. കാര്യമായി ഒന്നും ശ്രദ്ധിക്കാതെ ‘ഓട്ടോപൈലറ്റ്’ മോഡിൽ ഭക്ഷണം കഴിച്ചു തീർക്കുന്നവരാകും ഇവർ.

English Summary:

Psychology suggests that people who eat very quickly often display certain behavioral tendencies, though eating speed alone does not define a person’s personality. Fast eaters are commonly seen as driven, goal-oriented, and highly productive, preferring to complete tasks efficiently rather than linger over them.