Gold: 10 ഗ്രാം സ്വർണം വാങ്ങിയാൽ കിട്ടുന്നത് 9 ഗ്രാം മാത്രം? പണിക്കുറവിന്റെ കണക്ക് അറിയാം
Gold Jewellery Making Charges: How Much Gold Do You Actually Lose?: സ്വര്‍ണം ആഭരണങ്ങളാക്കി മാറ്റുന്ന പ്രക്രിയയില്‍ ഉരുക്കല്‍, രൂപപ്പെടുത്തല്‍, മിനുക്കല്‍ തുടങ്ങിയ ഘട്ടങ്ങളുണ്ട്. ഈ സമയത്ത് ചെറിയ അളവില്‍ സ്വര്‍ണം നഷ്ടപ്പെടാന്‍ സാധ്യതയുണ്ട്. ആഭരണ നിര്‍മാണത്തിലെ ഈ നഷ്ടത്തെയാണ് പണിക്കുറവ് അഥവാ വേസ്റ്റേജ് എന്ന് പറയുന്നത്. 10 ഗ്രാം 22 കാരറ്റ് സ്വര്‍ണം ഉപയോഗിച്ച് ആഭരണം നിര്‍മിക്കുമ്പോള്‍ ഒരു ഗ്രാം വരെ നഷ്ടമുണ്ടാകാമെന്നാണ് അവകാശവാദം.
ഇന്ത്യയില്‍ സ്വര്‍ണം വെറുമൊരു ആഭരണമല്ല, സമ്പാദ്യവും കുടുംബത്തിന്റെ പാരമ്പര്യവും വിശ്വാസവുമാണ്. വിവാഹം, ആഘോഷങ്ങള്‍, നിക്ഷേപം തുടങ്ങി വിവിധ ആവശ്യങ്ങള്‍ക്കായി ആളുകള്‍ സ്വര്‍ണം വാങ്ങുന്നു. എന്നാല്‍ സ്വര്‍ണാഭരണങ്ങള്‍ വാങ്ങുമ്പോഴും പഴയ സ്വര്‍ണം മാറ്റി പുതിയ ആഭരണങ്ങള്‍ നിര്‍മിക്കുമ്പോഴും ശ്രദ്ധിക്കേണ്ട ഒരു കാര്യമാണ് പണിക്കൂലിയും പണിക്കുറവും. 10 ഗ്രാം സ്വര്‍ണം നല്‍കിയാല്‍ അതേ അളവില്‍ തന്നെ ആഭരണം തിരികെ ലഭിക്കണമെന്നില്ല. (Image Credit Source: Getty and PTI Images)
സ്വര്‍ണം ആഭരണങ്ങളാക്കി മാറ്റുന്ന പ്രക്രിയയില്‍ ഉരുക്കല്‍, രൂപപ്പെടുത്തല്‍, മിനുക്കല്‍ തുടങ്ങിയ ഘട്ടങ്ങളുണ്ട്. ഈ സമയത്ത് ചെറിയ അളവില്‍ സ്വര്‍ണം നഷ്ടപ്പെടാന്‍ സാധ്യതയുണ്ട്. ആഭരണ നിര്‍മാണത്തിലെ ഈ നഷ്ടത്തെയാണ് പണിക്കുറവ് അഥവാ വേസ്റ്റേജ് എന്ന് പറയുന്നത്. 10 ഗ്രാം 22 കാരറ്റ് സ്വര്‍ണം ഉപയോഗിച്ച് ആഭരണം നിര്‍മിക്കുമ്പോള്‍ ഒരു ഗ്രാം വരെ നഷ്ടമുണ്ടാകാമെന്നാണ് അവകാശവാദം. അതായത്, 10 ഗ്രാം സ്വര്‍ണം നല്‍കിയാല്‍ ഏകദേശം ഒന്‍പത് ഗ്രാം മാത്രം തൂക്കമുള്ള ആഭരണം ലഭിക്കുന്ന സാഹചര്യമുണ്ടാകാം. എന്നാല്‍ എല്ലാ ആഭരണങ്ങള്‍ക്കും ഇതേ അളവില്‍ നഷ്ടമുണ്ടാകണമെന്നില്ല. ഡിസൈന്‍, നിര്‍മാണരീതി, ജ്വല്ലറി എന്നിവ അനുസരിച്ച് വ്യത്യാസമുണ്ടാകും.
24 കാരറ്റ് സ്വര്‍ണത്തിന് ഉയര്‍ന്ന ശുദ്ധിയുണ്ടെങ്കിലും ഇത് വളരെ മൃദുവാണ്. അതിനാല്‍ ആഭരണങ്ങള്‍ നിര്‍മിക്കാന്‍ ആവശ്യമായ ഉറപ്പും കാഠിന്യവും ലഭിക്കുന്നതിനായി ചെമ്പ്, വെള്ളി, സിങ്ക് തുടങ്ങിയ ലോഹങ്ങള്‍ ചേര്‍ക്കുന്നു. ഇങ്ങനെയാണ് 22 കാരറ്റ്, 18 കാരറ്റ് സ്വര്‍ണം ലഭിക്കുന്നത്. ആഭരണ നിര്‍മാണത്തിനിടെ ഉരുക്കുന്നതും രൂപപ്പെടുത്തുന്നതും ഉള്‍പ്പെടെയുള്ള ഘട്ടങ്ങളില്‍ ചെറിയ അളവില്‍ സ്വര്‍ണം നഷ്ടപ്പെടാം. എന്നാല്‍ സ്വര്‍ണം ഉരുക്കുമ്പോള്‍ ഒരു നിശ്ചിത അളവ് സ്വാഭാവികമായി ബാഷ്പീകരിച്ച് നഷ്ടപ്പെടുന്നു എന്നത് കൃത്യമായ പൊതുനിയമമല്ല. അതിനാല്‍ പണിക്കുറവിന്റെ പേരില്‍ ഈടാക്കുന്ന തുകയുടെ കണക്കുകള്‍ ഉപഭോക്താക്കള്‍ പരിശോധിക്കണം.
പഴയ ആഭരണങ്ങള്‍ നല്‍കി പുതിയവ വാങ്ങുമ്പോഴും തൂക്കത്തിലും മൂല്യത്തിലും വ്യത്യാസമുണ്ടാകാം. പഴയ ആഭരണത്തിലെ ശുദ്ധി, കല്ലുകള്‍, മറ്റ് ലോഹങ്ങളുടെ സാന്നിധ്യം, ഉരുക്കുമ്പോഴുള്ള നഷ്ടം എന്നിവയാണ് ഇതിന് പ്രധാന കാരണം. ഹാള്‍മാര്‍ക്ക് ചെയ്ത ആഭരണങ്ങളാണെങ്കില്‍ സ്വര്‍ണത്തിന്റെ ശുദ്ധി തിരിച്ചറിയാന്‍ എളുപ്പമാണ്. എങ്കിലും പഴയ ആഭരണത്തിന്റെ ആകെ തൂക്കം തന്നെയായിരിക്കില്ല പുതിയ ആഭരണത്തിനായി കണക്കാക്കുക. പരിശോധനയ്ക്ക് ശേഷം ലഭിക്കുന്ന ശുദ്ധ സ്വര്‍ണത്തിന്റെ അളവാണ് പ്രധാനമായി പരിഗണിക്കുന്നത്.
ആഭരണത്തിലെ ബിഐഎസ് ഹാള്‍മാര്‍ക്ക് പരിശോധിക്കുക, സ്വര്‍ണത്തിന്റെ ശുദ്ധി 22 കാരറ്റാണോ 18 കാരറ്റാണോ എന്ന് ഉറപ്പാക്കുക, ആഭരണത്തിന്റെ തൂക്കം കൃത്യമായി പരിശോധിക്കുക, പണിക്കൂലി, പണിക്കുറവ് എന്നിവ എത്രയാണെന്ന് മുന്‍കൂട്ടി ചോദിക്കുക, പഴയ സ്വര്‍ണം മാറ്റുമ്പോള്‍ പരിശോധനയ്ക്ക് ശേഷമുള്ള ശുദ്ധ സ്വര്‍ണത്തിന്റെ തൂക്കം രേഖപ്പെടുത്തുക, പുതിയ ആഭരണം നിര്‍മിക്കുമ്പോള്‍ എത്ര ഗ്രാം സ്വര്‍ണം ഉപയോഗിക്കുമെന്നും എത്ര പണിക്കുറവ് ഈടാക്കുമെന്നും വ്യക്തമായി മനസിലാക്കുക.
