India vs Pakistan: ഏഷ്യാ കപ്പിൽ ഇന്ത്യ പാകിസ്താനെതിരെ കളിച്ചേക്കും; മറ്റിടങ്ങളിലെ നിസ്സഹകരണം ക്രിക്കറ്റിൽ മാറ്റിവെക്കുമെന്ന് റിപ്പോർട്ട്
India vs Pakistan In Asia Cup 2025: ഈ വർഷം നടക്കുന്ന ഏഷ്യാ കപ്പിൽ ഇന്ത്യയും പാകിസ്താനും തമ്മിൽ ഏറ്റുമുട്ടിയേക്കും. ആറ് ടീമുകളാവും ഏഷ്യാ കപ്പിൽ ഉണ്ടാവുകയെന്നാണ് റിപ്പോർട്ടുകൾ.
വരുന്ന ഏഷ്യാ കപ്പിൽ ഇന്ത്യ പാകിസ്താനെതിരെ കളിച്ചേക്കുമെന്ന് റിപ്പോർട്ടുകൾ. പഹൽഗാമിലെ ഭീകരാക്രമണത്തിന് ശേഷം വിവിധ മേഖലകളിൽ ഇന്ത്യ പാകിസ്താനെതിരെ നിസ്സഹകരണം പ്രഖ്യാപിച്ചിരുന്നു. ഐസിസി, എസിസി ഇവൻ്റുകളിലും ഇത് തുടരുമെന്നായിരുന്നു സൂചനകൾ. (Image Credits - PTI)
എന്നാൽ, നിസ്സഹകരണം ക്രിക്കറ്റിലേക്ക് കൊണ്ടുവരുന്നില്ലെന്നും പാകിസ്താനുമായി കളിക്കുമെന്നുമാണ് ബിസിസിഐയുടെ നിലപാടെന്ന് ദേശീയമാധ്യമങ്ങൾ റിപ്പോർട്ട് ചെയ്യുന്നു. സെപ്തംബറിൽ ഇന്ത്യ അടക്കം ആറ് ടീമുകളെ പങ്കെടുപ്പിച്ച് ഏഷ്യാ കപ്പ് നടത്താനാണ് എസിസിയുടെ തീരുമാനം.
ഇന്ത്യയാണ് ഏഷ്യാ കപ്പിൻ്റെ ആതിഥേയർ. എന്നാൽ, പാകിസ്താനായി ഹൈബ്രിഡ് വേദി പരിഗണിക്കും. ഇരു ടീമുകളും ടൂർണമെൻ്റിൽ ഉണ്ടാവുമെങ്കിലും ഒരു ഗ്രൂപ്പിൽ ഉൾപ്പെടുത്തില്ലെന്നും റിപ്പോർട്ടുകളുണ്ട്. യുഎഇ, ബംഗ്ലാദേശ്, അഫ്ഗാനിസ്ഥാൻ, ശ്രീലങ്ക എന്നിവരാണ് മറ്റ് ടീമുകൾ.
പഹൽഗാമിലെ ഭീകരാക്രമണത്തിന് ശേഷം പാകിസ്താനെതിരെ കടുത്ത നടപടികളാണ് ഇന്ത്യ സ്വീകരിച്ചത്. പാക് കലാകാരന്മാരെ വിലക്കിയ ഇന്ത്യ ഹൈക്കമ്മീഷനിലെ ഉദ്യോഗസ്ഥരെയും പാക് വംശജരായ വിനോദസഞ്ചാരികളെയും പുറത്താക്കി. ഇതിന് പിന്നാലെയായിരുന്നു ഓപ്പറേഷൻ സിന്ദൂർ.
ഇതിനിടെ പാകിസ്താനിലേക്കുള്ള സിന്ദു നദിയിലെ ജലം ഇന്ത്യ തിരിച്ചുവിട്ടിരുന്നു. ഇതിന് ശേഷമാണ് ഇന്ത്യ ക്രിക്കറ്റിലും പാകിസ്താനെതിരെ പൂർണ ഉപരോധം ഏർപ്പെടുത്തുമെന്ന റിപ്പോർട്ടുകൾ പുറത്തുവന്നത്. എന്നാൽ, അതല്ല ബിസിസിഐയുടെ നിലപാടെന്ന് ഇപ്പോൾ ദേശീയമാധ്യമങ്ങൾ റിപ്പോർട്ട് ചെയ്യുന്നു.
