IPL 2025: ചിന്നസ്വാമിയിൽ മഴസാധ്യത 80 ശതമാനം; ഐപിഎലിൻ്റെ തുടർച്ച വെള്ളത്തിലാവാൻ സാധ്യത
Rain Threatens RCB vs KKR Match: ആർസിബിയും കെകെആറും തമ്മിൽ ഇന്ന് നടക്കാനിരിക്കുന്ന മത്സരം മഴയിൽ മുടങ്ങാൻ സാധ്യത. ബെംഗളൂരുവിൽ ഇന്ന് വൈകുന്നേരം 80 ശതമാനമാണ് മഴസാധ്യത.
ഇന്ത്യ പാകിസ്താൻ സംഘർഷത്തെ തുടർന്ന് നിർത്തിവച്ചിരുന്ന ഐപിഎൽ മത്സരങ്ങൾ ഇന്ന് മുതൽ പുനരാരംഭിക്കുകയാണ്. റോയൽ ചലഞ്ചേഴ്സ് ബെംഗളൂരുവും കൊൽക്കത്ത നൈറ്റ് റൈഡേഴ്സും തമ്മിൽ ആർസിബിയുടെ തട്ടകമായ ചിന്നസ്വാമി സ്റ്റേഡിയത്തിലാണ് ഇന്നത്തെ മത്സരം. (Image Credits- PTI)
രാത്രി 7.30ന് തീരുമാനിച്ചിരിക്കുന്ന മത്സരം പക്ഷേ, നടക്കുമോ എന്ന സംശയത്തിലാണ്. ബെംഗളൂരുവിൽ കഴിഞ്ഞ ദിവസങ്ങളിൽ പെയ്യുന്ന മഴയാണ് കളിയ്ക്ക് ഭീഷണി. ബെംഗളൂർവിൽ വൈകുന്നേരത്തെ മഴസാധ്യത 80 ശതമാനമാണ്. ഉച്ചകഴിഞ്ഞും വൈകുന്നേരവും 100 ശതമാനം മേഘാവൃതമായിരിക്കും.
അക്യുവെതറിൻ്റെ പ്രവചനപ്രകാരം ഉച്ചകഴിഞ്ഞ് 70 ശതമാനവും വൈകുന്നേരം 80 ശതമാനവും മഴസാധ്യതയുണ്ട്. രാത്രി 7.30 നാണ് മത്സരം എന്നതിനാൽ കളി മഴയിൽ മുടങ്ങിയേക്കും. ഐപിഎൽ പുനരാരംഭിക്കുമ്പോൾ തന്നെ മഴ കല്ലുകടിയാവുമോ എന്ന ആശങ്കയിലാണ് ക്രിക്കറ്റ് പ്രേമികൾ.
കഴിഞ്ഞ ദിവസങ്ങളിലും ബെംഗളൂരുവിൽ കനത്ത മഴയായിരുന്നു. മഴയിൽ ചിന്നസ്വാമിയിലെ വെള്ളക്കെട്ടിൽ തെന്നിക്കളിക്കുന്ന ഓസീസ് താരം ടിം ഡേവിഡിൻ്റെ വിഡിയോ കഴിഞ്ഞ ദിവസം ആർസിബി തന്നെ പങ്കുവച്ചിരുന്നു. മികച്ച ഡ്രെയിനേജ് സിസ്റ്റമാണ് ചിന്നസ്വാമിയിലുള്ളത് എന്നത് ആശ്വാസമാണ്.
സീസണിൽ ആർസിബി തകർപ്പൻ ഫോമിലാണ്. 11 മത്സരങ്ങളിൽ എട്ടിലും വിജയിച്ച് 16 പോയിൻ്റുള്ള ബെംഗളൂരു പട്ടികയിൽ രണ്ടാം സ്ഥാനത്താണ്. ഇന്നത്തെ കളി വിജയിക്കാനായാൽ ഇതേ പോയിൻ്റുള്ള ഗുജറാത്ത് ടൈറ്റൻസിനെ മറികടന്ന് ബെംഗളൂരു ഒന്നാം സ്ഥാനത്തെത്തും.
