Toyota Fortuner: ഹെഡ് ലൈറ്റിൽ മുതൽ ബംബറിൽ വരെ അപ്ഡേഷൻ! ഫോർച്യൂണറിൽ വരുന്നത് അടിമുടി മാറ്റം
Next-Gen Toyota Fortuner Update: ടൊയോട്ടയുടെ ഏറ്റവും ജനപ്രിയമായ എസ്.യു.വി മോഡലുകളിൽ ഒന്നാണ് ഫോർച്യൂണർ. ടൊയോട്ട ഫോർച്യൂണറിന്റെ അടുത്ത ഫേസ് ലിഫ്റ്റിനായുള്ള കാത്തിരിപ്പാണ് ഇന്ത്യൻ വാഹനപ്രേമികളും. ടൊയോട്ടയുടെ അടുത്ത തലമുറ ഫോർച്യൂണർ 2026 ഡിസംബർ 1- ന് ആഗോളതലത്തിൽ അവതരിപ്പിക്കുമെന്നാണ് കരുതുന്നത്.

അർജന്റീനയിൽ, 'SW4' എന്ന പേരിൽ വിൽക്കപ്പെടുന്ന ടൊയോട്ട ഫോർച്യൂണറിന്റെ പുതിയ തലമുറ മോഡൽ പരീക്ഷണ ഓട്ടത്തിനിടെ ക്യാമറയിൽ പതിഞ്ഞിരിക്കുകയാണ്. ഫോർച്യൂണറിന്റെ പരമ്പരാഗതമായ 'ബോഡി-ഓൺ-ഫ്രെയിം' അതുപോലെ നിലർത്തിക്കൊണ്ട്, രൂപത്തിൽ സമഗ്രമായ മാറ്റങ്ങൾ വരുത്താനാണ് കമ്പനി ഒരുങ്ങുന്നതെന്ന് പുറത്ത് വന്ന ചിത്രങ്ങൾ വ്യക്തമാക്കുന്നു. ( Image Credit Source Toyota Website)

നിലവിൽ വിപണിയിലുള്ള ഫോർച്യൂണറിൻ്റെ സവിശേഷതകളായ ഉയർന്ന ബോണറ്റ്, തലയെടുപ്പുള്ള രൂപം, വലിയ വിൻഡ് ഷീൽഡ് ഏരിയ എന്നിവ ഈ പുതിയ വാഹനത്തിലും നിലനിർത്തിയിട്ടുണ്ട്. ഹെഡ്ലൈറ്റുകളിൽ കാര്യമായ മാറ്റങ്ങൾ വരുത്തുകയും, വീതിയേറിയ മെഷ്-സ്റ്റൈൽ ഗ്രില്ലും പുനർരൂപകൽപ്പന ചെയ്ത ഫ്രണ്ട് ബമ്പറും വാഹനത്തിൽ നൽകിയിട്ടുണ്ട്.

പിൻഭാഗത്ത്, റീ ഡീസേൻ ചെയ്ത ടെയിൽഗേറ്റും പരസ്പരം ബന്ധിപ്പിച്ചിരിക്കുന്ന എൽഇഡി ലൈറ്റ് ബാറും പുതിയ മോഡലിൽ പ്രതീക്ഷിക്കാം. കൂടാതെ ടെയിൽ- ലാമ്പുകളുടെ രൂപകൽപ്പനയിലും മാറ്റങ്ങൾ വരുത്തിയിട്ടുണ്ട് എന്നാണ് സ്പൈ ഷോട്ടുകൾ വ്യക്തമാക്കുന്നത്.

ഇന്റീരിയറിലേക്ക് വരുമ്പോൾ, പുതിയ ഫോർച്യൂണറിൽ പുനർരൂപകൽപ്പന ചെയ്ത സ്റ്റിയറിംഗ് വീൽ, പുതിയ ഇൻസ്ട്രുമെന്റ് ക്ലസ്റ്റർ, പരിഷ്കരിച്ച ഇൻഫോടെയ്ൻമെന്റ് സിസ്റ്റം എന്നിവ പ്രതീക്ഷിക്കപ്പെടുന്നു. നെക്സ്റ്റ് ജനറേഷൻ ഹൈലക്സിലുള്ള (Hilux) ചില സവിശേഷതകളും ഈ മോഡലിൽ ഉൾപ്പെടുത്തിയേക്കാം.

സുരക്ഷാ സംവിധാനങ്ങളിലും കാര്യമായ അപ്ഡേറ്റാണ് പ്രതീക്ഷിക്കപ്പെടുന്നത്. അഡ്വാൻസ്ഡ് ഡ്രൈവർ അസിസ്റ്റൻസ് സിസ്റ്റം ADAS സൗകര്യം എന്തായാലും ഉണ്ടാകുമെന്ന് പ്രതീക്ഷിക്കുന്നു. എന്നാൽ കൃത്യമായി ഏതൊക്കെ ഫീച്ചറുകൾ ഉണ്ടാകുമെന്നോ, ഇന്ത്യൻ പതിപ്പുകളിൽ എന്തൊക്കെ ലഭ്യമാകുമെന്നോ ഉള്ള കാര്യത്തിൽ ടൊയോട്ട ഇതുവരെ വ്യക്തത വരുത്തിയിട്ടില്ല.