T20 World Cup 2026: ഒരു കളി പോലും കളിക്കാത്ത ആദ്യ ലോകകപ്പ്; എന്നാൽ, ഇത്തവണ സഞ്ജു ടീമിൽ ഉറപ്പ്
Sanju Samson In The T20 WC: മറ്റ് പ്രതിസന്ധികളില്ലെങ്കിൽ സഞ്ജു സാംസൺ ഇത്തവണ ലോകകപ്പിൽ ഉറപ്പായും കളിക്കും. കഴിഞ്ഞ തവണ ഒരു കളി പോലും താരത്തിന് അവസരം ലഭിച്ചിരുന്നില്ല.
സഞ്ജു സാംസൺ ടി20 ലോകകപ്പ് ടീമിൽ ഉൾപ്പെട്ടത് വളരെ അപ്രതീക്ഷിതമായിരുന്നു. വൈസ് ക്യാപ്റ്റനായ ശുഭ്മൻ ഗില്ലിനെ ഒഴിവാക്കി സഞ്ജുവിനെ ടീമിൽ ഉൾപ്പെടുത്തിയത് കായികപ്രേമികൾക്കൊക്കെ അത്ഭുതമായി. ഇത് തുടർച്ചയായ രണ്ടാം ടി20 ലോകകപ്പിലാണ് സഞ്ജു സാംസൺ ടീമിൽ ഉൾപ്പെടുന്നത്. (Image Credits- PTI)
ഇന്ത്യ ജേതാക്കളായ 2024 ടി20 ലോകകപ്പ് ടീമിലും സഞ്ജു ഉൾപ്പെട്ടിരുന്നു. കഴിഞ്ഞ തവണ ഋഷഭ് പന്തിന് പകരക്കാരനായിട്ടാണ് താരം കളിച്ചത്. എന്നാൽ, പന്ത് തുടരെ നിരാശപ്പെടുത്തിയിട്ടും സഞ്ജുവിന് അവസരം ലഭിച്ചില്ല. ഫൈനലിൽ ആദ്യം സഞ്ജുവിനെ പരിഗണിച്ചിട്ട് അവസാനനിമിഷം മാറ്റി.
ഇത്തവണ പക്ഷേ, ഈ ആശങ്കകളില്ല. ലോകകപ്പ് ടീമിലെ ഫസ്റ്റ് ചോയിസ് വിക്കറ്റ് കീപ്പറും ഓപ്പണറുമാണ് സഞ്ജു. ന്യൂസീലൻഡ് പരമ്പരയിലെ വളരെ മോശം പ്രകടനങ്ങളോ പരിക്കോ ഇല്ലെങ്കിൽ സഞ്ജു ഉറപ്പായും ലോകകപ്പ് ടീമിൽ കളിക്കും. പ്രകടനം മോശമായാൽ ഇഷാൻ കിഷൻ ടീമിലെത്തും.
ദക്ഷിണാഫ്രിക്കക്കെതിരായ ടി20 പരമ്പരയിൽ അവസാന മത്സരം മാത്രമാണ് സഞ്ജു കളിച്ചത്. ആദ്യ മൂന്ന് മത്സരങ്ങളിൽ ശുഭ്മൻ ഗിൽ ആയിരുന്നു ടീമിൽ. നാലാമത്തെ കളി പരിക്കേറ്റ് പുറത്തായപ്പോൾ സഞ്ജുവിന് അവസരം ലഭിച്ചു. എന്നാൽ, മൂടൽ മഞ്ഞ് കാരണം നാലാമത്തെ കളി നടന്നില്ല.
അവസാന മത്സരത്തിൽ കളിച്ച സഞ്ജു 22 പന്തിൽ 37 റൺസെടുത്ത് പുറത്തായിരുന്നു. ഈ മത്സരത്തിൻ്റെ പിറ്റേ ദിവസമാണ് ടി20 ലോകകപ്പ് ടീം പ്രഖ്യാപിച്ചത്. ഈ ടീമിൽ സഞ്ജു ഉൾപ്പെട്ടതും ഗിൽ പുറത്തായതും അപ്രതീക്ഷിതമായി. ജിതേഷ് ശർമ്മ പുറത്തായപ്പോൾ റിങ്കു സിംഗും ടീമിൽ ഉൾപ്പെട്ടു.
