Daruma doll: പ്രധാനമന്ത്രിയ്ക്ക് ജപ്പാനിൽ നിന്ന് കിട്ടിയ ഭാഗ്യചിഹ്നം ദറുമ പാവയ്ക്ക് കാഞ്ചീപുരത്തും വേരുകളോ?
What is the Daruma doll: തമിഴ്നാട്ടിലെ കാഞ്ചീപുരത്ത് നിന്ന് ചൈനയിലേക്ക് യാത്ര ചെയ്ത ഇന്ത്യൻ സന്യാസിയായിരുന്നു ബോധിധർമ്മൻ. ജപ്പാനിൽ അദ്ദേഹം 'ദറുമ ദൈഷി' എന്ന പേരിൽ അറിയപ്പെടുന്നു.
പ്രധാനമന്ത്രി നരേന്ദ്ര മോദിക്ക് ജപ്പാൻ സന്ദർശനത്തിനിടെ ലഭിച്ച സമ്മാനം ദറുമ പാവ ആയിരുന്നു. ജപ്പാന്റെ ഭാഗ്യ ചിഹ്നം എന്നതിനപ്പുറം ഇതിന് ഒരു തെക്കേഇന്ത്യൻ ബന്ധമുണ്ട്.
ഇന്ത്യയും ജപ്പാനും തമ്മിലുള്ള ചരിത്രപരമായ ബന്ധത്തിൻ്റെ പ്രതീകമായി ജപ്പാനിലെ ദറുമ-ജി ക്ഷേത്രത്തിലെ മുഖ്യ പുരോഹിതൻ റെവ. സെയ്ഷി ഹിരോസെയാണ് പ്രധാനമന്ത്രിക്ക് ഈ പാവ സമ്മാനിച്ചത്.
പേപ്പിയർ-മാഷെയിൽ നിർമ്മിച്ച ഈ പരമ്പരാഗത ജാപ്പനീസ് പാവ, സ്ഥിരതയുടെയും ഭാഗ്യത്തിൻ്റെയും പ്രതീകമായി കണക്കാക്കപ്പെടുന്നു. അഞ്ചാം നൂറ്റാണ്ടിലെ സെൻ ബുദ്ധമത സ്ഥാപകനായ ബോധിധർമ്മൻ്റെ രൂപത്തിലാണ് ഇത് നിർമ്മിച്ചിരിക്കുന്നത്.
തമിഴ്നാട്ടിലെ കാഞ്ചീപുരത്ത് നിന്ന് ചൈനയിലേക്ക് യാത്ര ചെയ്ത ഇന്ത്യൻ സന്യാസിയായിരുന്നു ബോധിധർമ്മൻ. ജപ്പാനിൽ അദ്ദേഹം 'ദറുമ ദൈഷി' എന്ന പേരിൽ അറിയപ്പെടുന്നു. ദറുമ എന്ന വാക്ക് സംസ്കൃത പദമായ 'ധർമ്മ'യിൽ നിന്ന് വന്നതാണെന്ന് വിശ്വസിക്കപ്പെടുന്നു. കൈകാലുകളില്ലാത്ത ഈ പാവ, ഒമ്പത് വർഷം തുടർച്ചയായി ധ്യാനിച്ചിരുന്ന ബോധിധർമ്മൻ്റെ രൂപത്തെയാണ് ഓർമ്മിപ്പിക്കുന്നത്.
എത്ര മറിച്ചിട്ടാലും നേരെ നിൽക്കുന്ന ഈ പാവ, "ഏഴു തവണ വീണാലും, എട്ടു തവണ എഴുന്നേൽക്കുക" എന്ന ജാപ്പനീസ് ചൊല്ലിനെ പ്രതിനിധീകരിക്കുന്നു. ജപ്പാനിൽ ദറുമ പാവകളുടെ പ്രധാന ഉത്പാദന കേന്ദ്രങ്ങളിലൊന്നായ തകസകിയിലാണ് ദറുമ-ജി ക്ഷേത്രം സ്ഥിതി ചെയ്യുന്നത്.
