Womens ODI World Cup 2025: ഐസിസി നൽകുന്നത് 39 കോടി; ബിസിസിഐ നൽകുന്നത് 51 കോടി: ഇന്ത്യൻ വനിതാ ടീമിൽ പണക്കിലുക്കം
BCCI Prize Money For Indian Team: ലോകകപ്പ് ജേതാക്കളായ ഇന്ത്യൻ ടീമിന് ബിസിസിഐയുടെ പാരിതോഷികം. 51 കോടി രൂപയാണ് ബിസിസിഐ ഇന്ത്യൻ ടീമിന് നൽകുക.
ലോകകപ്പ് നേടിയ ഇന്ത്യൻ ടീമിന് സമ്മാനത്തുക പ്രഖ്യാപിച്ച് ബിസിസിഐ. 51 കോടി രൂപയാണ് ഹർമനും സംഘവും ബിസിസിഐ നൽകുക. ലോകകപ്പ് ജേതാക്കൾക്ക് ഐസിസി നൽകുന്ന സമ്മാനത്തുക 39.77 കോടി രൂപയാണ്. ഇത് കൂടാതെയാണ് ബിസിസിഐയുടെ പാരിതോഷികം. (Image Credits- PTI)
ബിസിസിഐ ജോയിൻ്റ് സെക്രട്ടറി ദേവജിത് സൈകിയയാണ് ഇക്കാര്യം അറിയിച്ചത്. താരങ്ങൾ, പരിശീലകർ, സെലക്ടർമാർ, സപ്പോർട്ട് സ്റ്റാഫ് എന്നിവർക്കായാണ് ഈ 51 കോടി രൂപ വീതിക്കപ്പെടുക എന്നും എഎൻഐയ്ക്ക് നൽകിയ അഭിമുഖത്തിൽ അദ്ദേഹം വ്യക്തമാക്കി.
"കഴിഞ്ഞ മാസം, വനിതാ ലോകകപ്പ് സമ്മാനത്തുകയിൽ ഐസിസി ചെയർമാൻ ജയ് ഷാ 300 ശതമാനത്തിൻ്റെ വർധന വരുത്തിയിരുന്നു. നേരത്തെ 3.88 മില്ല്യൺ ഡോളർ ആയിരുന്നത് ഇപ്പോൾ 14 മില്ല്യൺ ഡോളറാണ്. ഇതിനൊപ്പമാണ് ബിസിസിഐ പാരിതോഷികം നൽകുന്നത്."- സൈകിയ പറഞ്ഞു.
ഫൈനൽ മത്സരത്തിൽ ദക്ഷിണാഫ്രിക്കയെ 52 റൺസിന് കീഴടക്കിയാണ് ഇന്ത്യ വിശ്വവിജയി ആയത്. ചരിത്രത്തിൽ ആദ്യമായാണ് ഇന്ത്യൻ വനിതാ ടീമിൻ്റെ ലോകകപ്പ് കിരീടനേട്ടം. മുൻപ് രണ്ട് തവണ ഇന്ത്യൻ ടീം ഫൈനൽ കളിച്ചിട്ടുണ്ടെങ്കിലും ലോക ചാമ്പ്യന്മാരാവാൻ സാധിച്ചിരുന്നില്ല.
ആദ്യം ബാറ്റ് ചെയ്ത ഇന്ത്യ 299 റൺസിൻ്റെ വിജയലക്ഷ്യമാണ് മുന്നോട്ടുവച്ചത്. മറുപടി ബാറ്റിംഗിനിറങ്ങിയ ദക്ഷിണാഫ്രിക്ക 246 റൺസിന് ഓളൗട്ടായി. 87 റൺസും രണ്ട് വിക്കറ്റും നേടിയ ഷഫാലി വർമ്മയാണ് കളിയിലെ താരം. ദീപ്തി ശർമ്മ ലോകകപ്പിലെ താരമായി തിരഞ്ഞെടുക്കപ്പെട്ടു.
